Read Ariun Bible 2013 – Ариун Библи 2013 Дуулал 88 Bible Online

Дуулал 88 - Ariun Bible 2013 – Ариун Библи 2013 bible

Дуулал 88

¹Дуу. Корагийн хөвгүүдийн дуулал. Удирдаачид: Махалат Леаннотын дагуу. Езра хүн Хеманы маскил. Аяа ЭЗЭН, авралын минь Бурхан, Би өдрөөр болон шөнөөр ч Таны өмнө хашхирсан.

²Миний залбирлыг өмнөө авчраач! Миний хашхиралтад чихээ тавиач!

³Учир нь сэтгэл минь Зовлон бэрхшээлээр дүүрч Амь минь Үхэгсдийн оронд ойртов.

⁴Би нүх уруу буугчдын дунд тоологдов.[48] Би хүч чадалгүй хүн адил,

⁵Үхэгсдийн дунд хаягдсан, Булшинд тавигддаг үхдэлтэй адил болов. Та тэднийг дахин үл санана. Учир нь тэд Таны мутраас таслагджээ.

⁶Та намайг хамгийн гүнзгий нүхэнд, Харанхуй газруудад, гүнд тавив.

⁷Таны хилэн намайг хүндээр дарсан бөгөөд Та бүх давалгаагаараа намайг зовоов. Села

⁸Та танилуудыг минь надаас холдуулав. Та намайг тэдэнд жигшүүрт зүйл болгов. Би түгжигдэн гарч эс чадна

⁹Зовлон зүдүүрээс болж нүд минь ч сульдана. Аяа ЭЗЭН, би Таныг өдөр бүр дуудна. Би Тан уруу гараа сунгана.

¹⁰Та үхэгсдэд гайхамшиг үйлдэх үү? Үхэгсдийн сүнснүүд босоод, Таныг магтах уу?

¹¹Хайр энэрэл тань булшинд, Таны үнэн Сүйрлийн газарт тунхаглагдах уу?

¹²Таны гайхамшгууд харанхуйд, Таны зөвт байдал марталтын газар мэдэгдэх үү?

¹³Харин ЭЗЭН, би тусламж гуйн Тан уруу хашхирна. Өглөөд залбирал минь Таны өмнө ирэг.

¹⁴Өө ЭЗЭН, Та юунд амийг минь хаяна вэ? Юунд Та надаас нүүрээ нууна вэ?

¹⁵Би залуугаасаа зовж, үхэх шахсан. Би Таны аюумшигуудыг амсан тэвднэм.

¹⁶Таны шатаж буй хилэн Дээгүүр минь өнгөрсөн. Таны аймшгууд намайг устгасан.

¹⁷Тэдгээр нь намайг ус мэт өдөржин хүрээлж Тэд хамтдаа намайг бүсэлсэн.

¹⁸Та амраг хайртыг бас анд нөхрийг Надаас холдуулсан. Танилууд минь ч харанхуйд байна.