Read Ariun Bible 2013 – Ариун Библи 2013 Дуулал 89 Bible Online

Дуулал 89 - Ariun Bible 2013 – Ариун Библи 2013 bible

Дуулал 89

¹Езра хүн Етаны маскил. Би ЭЗЭНий хайр энэрлийн тухай мөнхөд дуулна. Бүх үеийнхэнд би Таны итгэмжтэйг амаараа мэдүүлнэ.

²Учир нь би “Хайр энэрэл мөнхөд байгуулагдана. Та үнэнээ тэнгэрс дээр тогтооно” гэв.

³Та “Би сонгосон нэгэнтэйгээ гэрээ байгуулсан. Би Өөрийн зарц Давидад тангарагласан.

⁴Би чиний үрийг мөнхөд тогтоож, Хаан ширээг чинь бүх үеийнхэнд байгуулна” гэсэн. Села

⁵Аяа ЭЗЭН, тэнгэрс Таны гайхамшгуудыг магтана. Ариун хүмүүсийн чуулганд Таны итгэмжтэйг бас магтана.

⁶Учир нь тэнгэрт хэнийг ЭЗЭНтэй харьцуулж болох вэ? Тэнгэрлэг биесийн дундаас хэн нь ЭЗЭНтэй адил вэ?

⁷Ариун хүмүүсийн чуулалд Бурханаас эмээнэ. Түүнийг тойрох бүхнээс Тэрээр аугаа болоод сүрдмээр.

⁸Түг түмдийн Бурхан ЭЗЭН, Хэн Тантай адил вэ, хүчит ЭЗЭН? Таны үнэн Таныг тойрон буй.

⁹Та далайн догшролтыг захирдаг. Давалгаанууд нь босоход Та номхруулдаг.

¹⁰Та Рахабыг[49] алагдсан хүн шиг бяц дарсан. Та дайснуудаа хүчит мутраараа тараасан.

¹¹Тэнгэрс Таных, газар ч бас Таных Ертөнц ба түүнийг бүрдүүлж буй бүхнийг Та байгуулсан.

¹²Өмнөд ба умардыг Та бүтээсэн Табор ба Хермон Таны нэрээр баяртайяа уухайлна.

¹³Та хүчирхэг мутартай, Таны мутар хүчтэй, Таны баруун гар өргөмжлөгдсөн.

¹⁴Зөвт ба шударга ёс нь Таны сэнтийн суурь юм. Энэрэл хайр ба үнэн нь Таны өмнө явдаг.

¹⁵Баярт дууг мэддэг ард түмэн Юутай ерөөлтэй вэ! Аяа ЭЗЭН, Таны царайны гэрэлд тэд алхнам.

¹⁶Таны нэрд тэд өдөр бүр баярлаж, Таны зөвт байдлаар тэд өргөмжлөгдөнө.

¹⁷Учир нь Та тэдний Хүч чадлын алдар бөгөөд Таны тааллаар бидний эвэр өргөмжлөгдөнө.

¹⁸Учир нь бидний бамбай ЭЗЭНийх агаад Израилийн Ариун Нэгэн бидний Хаан.

¹⁹Тэр үед Та бишрэлтнүүддээ үзэгдэл дотор айлдаж “Би хүч чадалт нэгэнд тусламж өгсөн. Би ард түмнээс шилж сонгосон нэгнийг өргөмжилсөн.

²⁰Өөрийн зарц Давидыг Би олсон. Би түүнийг ариун тосоороо тосолсон.

²¹Гар минь түүнтэй хамт байж, Мутар минь ч бас түүнийг хүчтэй болгоно.

²²Дайсан түүнээс нэхэн шаардаж чадахгүй, Хорон муугийн хүү ч түүнийг зовоож чадахгүй.

²³Харин Би түүний өмнө өстнүүдийг нь бяцалж, Түүнийг үзэн ядагчийг бут цохино.

²⁴Үнэн ба хайр энэрэл минь түүнтэй хамт байж, Миний нэр дээр түүний эвэр өргөмжлөгдөнө.

²⁵Би бас гарыг нь далай дээр, Түүний баруун гарыг гол мөрнүүд дээр байлгана.

²⁶Тэр Над уруу «Та миний Эцэг, Миний Бурхан бөгөөд авралын минь хад» гэж хашхирна.

²⁷Би мөн түүнийг ууган хүү, Газар дэлхийн хаадаас хамгийн дээд хаан болгоно.

²⁸Би хайр энэрэлээ түүний төлөө мөнхөд хадгалж, Гэрээгээ ч түүнд батжуулна.

²⁹Ингээд Би үр удмыг нь мөнхөд тогтоож, Сэнтийг нь тэнгэрийн өдрүүд мэт болгоно.

³⁰Хэрэв түүний хөвгүүд хуулийг минь мартаж, Шүүлтийн минь дагуу эс явбаас,

³¹Хэрэв тэд тогтоолуудыг минь зөрчиж, Тушаалуудыг минь үл сахих аваас

³²Би тэдний гэмт үйлдлийг саваагаар, Хилэнцийг нь зодуураар шийтгэнэ.

³³Харин Би хайр энэрэлээ Түүнээс бүрмөсөн таслахгүй, Үнэнчээсээ ер няцахгүй.

³⁴Гэрээгээ Би зөрчихгүй, Уруулаасаа гарсныг өөрчлөхгүй.

³⁵Ариунаараа Би нэгэнт тангарагласан тул Давидад Би худал эс хэлнэ.

³⁶Үр удам нь мөнхөд амьдарч, Сэнтий нь Миний өмнөх нар шиг байна.

³⁷Тэр нь сар лугаа адил мөнхөд тогтоно. Тэнгэр дэх гэрч итгэмжит билээ” гэв. Села

³⁸Харин Та хаяж, жигшиж, Өөрийн тослогдогчийн эсрэг машид хилэгнэв.

³⁹Та зарцынхаа гэрээг хайхраагүй Та титмийг нь шороонд хаяж гутаав.

⁴⁰Та түүний бүх ханыг эвдсэн. Та бат цайзуудыг нь сүйрүүлсэн.

⁴¹Замаар өнгөрөн явагч бүхэн түүнийг тоносон. Тэрээр хөршүүддээ буруутгагдсан.

⁴²Та түүний өстнүүдийн баруун гарыг өргөмжилсөн. Та бүх дайсныг нь баярлуулсан.

⁴³Та бас илднийх нь ирийг мохоож, Түүнийг тулалдаанд бат зогсож чадахгүй болгосон.

⁴⁴Та түүний сүр жавхланг дуусган Сэнтийг нь[50] газарт хөмрөв.

⁴⁵Та залуу насных нь өдрүүдийг богиносгож Та түүнд ичгүүр нөмрүүлэв. Села

⁴⁶Өө ЭЗЭН, хэдий болтол вэ? Та Өөрийгөө мөнхөд нуух уу? Таны уур хилэн гал мэт шатах уу?

⁴⁷Амьдралын минь хугацааг санаач! Та хүний хөвгүүдийг юунд дэмий хуурмаг бүтээгээ вэ!

⁴⁸Ямар хүн үхлийг үзэлгүй амьдарч чадах вэ? Тэрээр сэтгэлээ Үхэгсдийн орны эрхшээлээс аварч чадах уу? Села

⁴⁹Өө Эзэн, итгэмж дотроо Давидад Таны тангарагласан Урьдын хайр энэрэл тань хаана байна вэ?

⁵⁰Аяа Эзэн, зарц нарынхаа доромжлолыг санаач! Би өвөртөө бүх олон түмний доромжлолыг хэрхэн тээдгийг ч санаач!

⁵¹Өө ЭЗЭН, тэдгээрээр Таны дайснууд доромжлон Тэдгээрээр тэд Таны тослогдогчийн Алхам бүрийг доромжилсон.

⁵²ЭЗЭН мөнхөд магтагдах болтугай! Амен, Амен.