Read Ariun Bible 2013 – Ариун Библи 2013 Дуулал 9 Bible Online

Дуулал 9 - Ariun Bible 2013 – Ариун Библи 2013 bible

Дуулал 9

¹Удирдаачид. Давидын дуулал, Мут-лаббен дээр. Бүхий л зүрхээрээ би ЭЗЭНд талархах болно. Бүх гайхамшгийг тань Би тунхаглана.

²Би баярлаж, Танд баясна. Хамгийн Дээд Нэгэн, Таны нэрд магтаалыг би дуулна.

³Дайснууд минь ухрахдаа Таны өмнө бүдрэн унаж, сөнөмүй.

⁴Учир нь Та шударга заргыг минь дэмжсэн билээ. Та зөв шударгаар шүүн сэнтийдээ заларсан билээ.

⁵Та үндэстнүүдийг зэмлэж, Та гэм буруутнуудыг устгасан. Та тэдний нэрийг үүрд мөнхөд үгүй болгосон.

⁶Дайсан үүрдийн сүйрлээр сүйрсэн бөгөөд Та тэдний хотуудыг нураасан агаад Тэдний талаар дурсагдах ч юмгүй болсон билээ.

⁷Харин ЭЗЭН мөнхөд захиран сууж байдаг. Тэрээр шүүхийн төлөө сэнтийгээ зэхсэн бөгөөд

⁸Тэр дэлхийг зөв шударгаар шүүх болно. Тэрээр ард түмнүүдийг чигч шударгаар шүүнэ.

⁹ЭЗЭН бол дарлагдагсдыг хамгаалах бэхлэлт, Бэрх цагийн бэхлэлт болно.

¹⁰Нэрийг тань мэдэгсэд Танд найдна. ЭЗЭН, Өөрийг тань эрэн хайгчдыг, Та орхиогүй билээ.

¹¹Сионд оршигч ЭЗЭНд Магтаалыг дуулагтун. Түүний үйлсийг хүмүүсийн дунд зарлагтун.

¹²Цус урсгалтаар өшөө авагч Тэрээр тэднийг санадаг. Зовогсдын хашхирахыг Тэрээр үл мартдаг.

¹³ЭЗЭН, намайг өршөөгөөч. Үзэн ядагчдаас болсон Зовлон зүдүүрийг минь хараач. Үхлийн үүд хаалганаас Намайг босгодог нь Та билээ.

¹⁴Тэгвэл би Таны бүх магтаалыг зарлах бөгөөд Сион охины үүд хаалган дээр Таны авралд би баясна.

¹⁵Үндэстнүүд өөрсдийнхөө ухсан нүхэнд унасан билээ. Өөрсдийнх нь нуусан торонд тэдний хөл орсон билээ.

¹⁶ЭЗЭН Өөрийгөө мэдүүлж, шүүлтийг гүйцэлдүүлжээ. Гэм буруутан гарынхаа үйлээр урхидуулжээ. Хиггаион. Села

¹⁷Бурханыг мартдаг бүх үндэстэн, Гэм буруутнууд Үхэгсдийн орон уруу буцна.

¹⁸Гачигдагсад үүрд мартагдахгүй, Зовогсдын найдлага ч мөнхөд тасрахгүй.

¹⁹ЭЗЭН, босооч, Хүмүүн бүү дийлэг, Үндэстнүүд өмнө тань шүүгдэг.

²⁰ЭЗЭН, тэднийг эмээлгээч. Хүн л юм гэдгийг нь Үндэстнүүдэд мэдүүлээч. Села