Read Ariun Bible 2013 – Ариун Библи 2013 Дуулал 90 Bible Online

Дуулал 90 - Ariun Bible 2013 – Ариун Библи 2013 bible

Дуулал 90

¹Бурханы хүн Мосегийн залбирал. Аяа Эзэн, Та үеийн үед бидний Орших газар байсан билээ.

²Уулс бий болохоос ч өмнө, Таныг дэлхий ба ертөнцийг төрүүлэхээс ч өмнө, Үүрдээс үүрд мөнх хүртэл Та Бурхан.

³Та хүнийг тоос шороонд нь буцаан Айлдахдаа “Хүний хүүхдүүд ээ, буцагтун” хэмээнэ.

⁴Учир нь Таны мэлмийд мянган жил бол Өнгөрөн одож буй өчигдөр мэт эсвэл Шөнийн манаа адил буюу.

⁵Та тэднийг үерийн ус шиг хамсан бөгөөд Тэд нойронд автжээ Өглөөд тэд шинээр соёолон буй өвс мэт болой.

⁶Өглөө тэр нь цэцэглэж, соёолно. Үдэш нь тэр хагдран хатна.

⁷Учир нь бид Таны хилэнгээр шатаагдаж, Таны ууранд бид мэгдэн сандарсан.

⁸Та хилэнцийг маань өмнөө, Нууцыг маань оршихуйнхаа гэрэлд байрлуулсан.

⁹Учир нь хамаг өдрүүд маань Таны хилэнгийн дунд өнгөрсөн Бид санаа алдах мэт он жилүүдээ дуусгасан.

¹⁰Амьдралын маань өдөр хоногууд далан жил юм. Хүч чадалтай байх аваас наян жил боловч Тэдгээрийн оргил нь зүдүүр, уй гашууд өнгөрдөг. Учир нь энэ нь ч өнгөрч, Бид нисэн оддог.

¹¹Таны уурын хүч чадлыг болон Танаас эмээх хэр хэмжээгээр Таны хилэнг хэн ойлгодог вэ?

¹²Иймээс бид мэргэн зүрх олж авахын тулд Өдрүүдээ тоолохыг бидэнд зааж өгөөч!

¹³Аяа ЭЗЭН, буцаж ирээч Хэдий болтол вэ? Зарц нараа өрөвдөөч!

¹⁴Өглөөд биднийг хайр энэрлээрээ хангаач! Бид баясгалантайгаар дуулж, Бүхий л өдрүүддээ баярлана.

¹⁵Биднийг зүдрээсэн өдрийнхөө тоогоор, Муугаа үзсэн жилүүдийн маань тоогоор Биднийг баярлуулаач!

¹⁶Өөрийнхөө үйлсийг зарц нартаа, Сүр жавхлангаа хүүхдүүдэд нь үзүүлээч!

¹⁷Бурхан Эзэний маань ивээл Бидэн дээр байх болтугай! Бидний гарын үйлсийг Бидний төлөө бат тогтоогооч! Тийм ээ, гарын маань үйлсийг бат тогтоогооч!