Read Ariun Bible 2013 – Ариун Библи 2013 Дуулал 94 Bible Online

Дуулал 94 - Ariun Bible 2013 – Ариун Библи 2013 bible

Дуулал 94

¹Өшөө авалтын Бурхан ЭЗЭН, Өшөө авалтын Бурхан, гэрэлтээч!

²Дэлхийн Шүүгч ээ, босож, Бардамнагчдад үйлийнх нь хариуг өгөөч!

³ЭЗЭН, хэдий болтол буруутууд, Хэдий болтол гэм нүгэлтнүүд Баярлаж цэнгэх вэ?

⁴Тэд дээрэлхүү үгсийг ярьдаг. Ёс бусыг үйлдэгчид бүгд өөрсдөөрөө бахархдаг.

⁵Өө ЭЗЭН, тэд Таны хүмүүсийг бяцалж, Таны өвийг зовоодог.

⁶Тэд бэлэвсэн эмэгтэй ба ирмэл хүнийг алж, Өнчнийг хороодог.

⁷Тэд “ЭЗЭН хардаггүй, Иаковын Бурхан анзаардаггүй” гэдэг.

⁸Ард түмний дундах бодлогогүйчүүд ээ, ухаарцгаа! Тэнэгүүд ээ, та нар хэзээ ойлгох юм бэ?

⁹Чихийг бүтээсэн Тэрээр сонсохгүй гэж үү? Нүдийг бүтээсэн Тэрээр харахгүй гэж үү?

¹⁰Үндэстнүүдийг гэсгээдэг, Мэдлэгийг хүмүүнд заадаг Тэрээр зэмлэхгүй гэж үү?

¹¹Хүний эргэцүүлэл нь дэмий хоосон гэдгийг ЭЗЭН мэддэг.

¹²Өө ЭЗЭН, Таны гэсгээдэг, Бас хуулиасаа заадаг хүн ерөөлтэй еэ!

¹³Ингэснээр гэм буруутанд нүх ухах хүртэл Та түүнийг зовлонгийн өдрөөс ангижруулан тайвныг өгнө.

¹⁴Учир нь ЭЗЭН ард түмнээ эс хаяж, Өв юугаа ч эс орхиюу.

¹⁵Учир нь шүүх дахин зөв шударга болж, Зүрх шулуун бүхэн түүнийг дагана.

¹⁶Хэн мууг үйлдэгчийг эсэргүүцэн Миний төлөө босох вэ? Хэн ёс бусыг үйлдэгчийг эсэргүүцэн Миний төлөө зогсох вэ?

¹⁷Хэрэв ЭЗЭН надад тус болоогүйсэн бол Сэтгэл минь удахгүй чимээгүйн дунд оршихсон.

¹⁸Хэрэв би “Миний хөл халтирсан” гэж хэлэх ёстой байсан бол, Аяа ЭЗЭН, хайр энэрэл тань намайг түших байсан.

¹⁹Миний дотор санаа зовоосон бодлууд олшироход Таны тайтгарууллууд сэтгэлийг минь баясгадаг.

²⁰Зарлигийн эсрэг бузар мууг сэдэгчдийн буюу Хорлолын сэнтий Тантай эвсэж чадах уу?

²¹Тэд хамтдаа зөвт хүмүүсийн амийн эсрэг бүлэглэж, Гэмгүй цусанд үхлийн ял өгдөг.

²²Харин ЭЗЭН миний бат цайз, Миний Бурхан миний хоргодох хад байсаар ирсэн.

²³Тэр тэдний цөв мууг Өөрсөд дээр нь авчирсан бөгөөд Тэднийг хорон муугийнх нь дотор устгана. Бурхан ЭЗЭН маань тэднийг устгана.