Read Ariun Bible 2013 – Ариун Библи 2013 Сургаалт үгс 15 Bible Online

Сургаалт үгс 15 - Ariun Bible 2013 – Ариун Библи 2013 bible

Сургаалт үгс 15

¹Эелдэг хариулт уурыг зайлуулах. Эвгүй үгс хилэнг хөдөлгөх.

²Мэргэдийн хэл мэдлэг тараах. Мулгуучуудын ам мунхаглал оргилуулах.

³ЭЗЭНий мэлмий хаа сайгүй. Ёрын муу хийгээд сайныг ч бас харах.

⁴Амарлингуй хэл амийн мод. Хазааргүй хэл сүнсний бусниулал.

⁵Эцгийн сургамж мунхагт эс тоомсорлогдох. Түүний гэсгээлийг хэрсүү нэгэн сахих.

⁶Зөвт хүний гэрт арвин их баялаг. Буруутын орлого харин лай ланчиг.

⁷Мэргэн хүний уруул Мэдлэг дэлгэрүүлдэг бол Мулгуучуудын зүрх тийм бус.

⁸Буруутын өргөл ЭЗЭНд адлагдах. Чигч шударга хүмүүсийн залбирал Түүнд таалагдах.

⁹Буруутын зам ЭЗЭНд жигшүүр. Зөвийг мөшгөгчийг Тэр хайрлана.

¹⁰Замаасаа гажигсдад хатуу сахилга. Гэсгээлтийг үзэн ядагсдад үхэл.

¹¹Үхэгсдийн орон хийгээд Сүйрлийн газар ЭЗЭНий өмнө байхад Хүний хөвгүүдийн зүрх бүр ч ил бус уу?

¹²Басамжлагч нь зэмлэгчийг хайрладаггүй. Тэрээр мэргэн хүн уруу зүглэхгүй.

¹³Зүрх хөгжилтэй бол царай тунгалаг. Зүрх шаналахад сүнс зовууртай.

¹⁴Ухаарагч хүний зүрх мэдлэгийг эрэх. Мулгуучуудын ам мунхаглалд идээших.

¹⁵Шаналагчдын өдрүүд хэцүүгээр дүүрэн. Хөгжилтэй зүрхэнд найр наадам дүүрэн.

¹⁶ЭЗЭНээс эмээн хомсхон суух нь Асар их хөрөнгөтэй бас түгшүүртэй сууснаас дээр.

¹⁷Үзэн ядалтаар бордсон шарын махнаас, Үнэн хайр буй газрын өвсөн хоол дээр.

¹⁸Хурц зантай хүн хэрүүл өдөөх. Уурлахдаа удаан хүн маргааныг намжаах.

¹⁹Залхуугийн зам сундуугаар дүүрэн. Чигч шударгын жим шулуун чигээрээ.

²⁰Мэргэн хүү эцгийгээ баярлуулах атал Мулгуу хүн эхийгээ ч үл тоомсорлох.

²¹Ухаан тарчиг мунхаглалд хөөрөх. Ухаарагч хүн цэх замаар явах.

²²Зөвлөмж дутсанаас төлөвлөгөө бүтэлгүйтэх. Зөвлөх олон болбоос бүтэмжтэй болох.

²³Онож хэлсэн хариултад хүн бүр баярладаг. Цагаа олсон үг юутай сайхан бэ!

²⁴Бодлоготой хүнийг амийн зам дээш хөтлөх. Доор буй Үхэгсдийн орноос ангижруулах.

²⁵Бардам хүний гэрийг ЭЗЭН нураана. Бэлэвсэн эмэгтэйн хил хязгаарыг Тэр тогтооно.

²⁶Ёрын муу төлөвлөгөө ЭЗЭНий жигшүүр. Нигүүлсэнгүй үгс Түүнд ариун.

²⁷Ёс бус ашигт шунагч гэрийнхэндээ лай тарих. Хээл хахуулийг үзэн ядагч амьд гарах.

²⁸Зөвтүүдийн зүрх яаж хариулахаа цэгнэх. Буруутын ам ёрын мууг ундраах.

²⁹Буруутуудаас ЭЗЭН алс. Зөвтийн залбирлыг Тэр сонсоно.

³⁰Гэрэлтсэн харц зүрхийг баярлуулах. Сайн мэдээ ясыг шимжүүлэх.

³¹Амийн сануулгад дуулгавартай чих Мэргэдийн дунд байх.

³²Сургамжийг үл ойшоогч өөрийгөө үл хэрэгсэх. Сануулгад дуулгавартай нэгэн ухааныг олж авах.

³³ЭЗЭНээс эмээхүй нь мэргэн ухааны сургамж Алдрын өмнө даруу дорд байдал.