Read Ariun Bible 2013 – Ариун Библи 2013 Сургаалт үгс 21 Bible Online

Сургаалт үгс 21 - Ariun Bible 2013 – Ариун Библи 2013 bible

Сургаалт үгс 21

¹Хааны зүрх ЭЗЭНий мутарт усны урсгал Хаа таалсан зүгтээ Тэр түүнийг чиглүүлэх.

²Хүний зам өөрийн нүдэнд зөв шударга ч Зүрхийг дэнслэгч нь ЭЗЭН.

³Үнэн ба шударгыг үйлдэх нь ЭЗЭНд Нядлах тахилаас ч илүү хүлээн авагдах.

⁴Ихэмсэг харц, бардам зүрх нь буруутын дэнлүү бөгөөд нүгэл ажээ.

⁵Зүтгэлтэй нэгний төлөвлөгөө нь элбэг дэлбэгийг. Адгуу нэгэн зөвхөн ядуурлыг.

⁶Залилагч хэлээр эрдэнэсийг олж авах нь Замхрах уур, үхлийн занга.

⁷Шударгыг үйлдэхээс татгалздаг тул Буруутуудыг хүчирхийлэл нь залгина.

⁸Гэмтний зам нь тахир Гэмгүй цэврийн хандлага нь чигч шударга.

⁹Дэндүү яншаа эхнэртэй нэг байшинд сууснаас Дээврийн буланд амьдарсан нь дээр.

¹⁰Буруутуудын сэтгэл ёрын мууг хүсэх. Хөрш нь түүний нүднээс энэрлийг эс харах.

¹¹Басамжлагчийг шийтгэвээс гэнэн хүн мэргэн болох. Мэргэнийг сургамжлаваас Тэр өөрөө мэдлэгийг олох.

¹²Буруутын гэрийг Зөвт Нэгэн ажиглах Буруу хүнийг мөхөл уруу Тэрээр унагах.

¹³Хоосон ядууг хашхирахад чихээ чи таглаваас Хожим өөрөө орилон дуудавч хариуг эс авна.

¹⁴Нууцхан бэлэг уцаарыг, Өвөр дэх хахууль хилэнг дарах.

¹⁵Биелэгдсэн хууль зөвт хүнд баяр, Ёс бусыг үйлдэгсдэд айдас.

¹⁶Ухааны замаас гажигч хүн Үхэгсдийн чуулганд дуусна.

¹⁷Зугаа цэнгэл хөөвөөс хоосрол. Дарс, тосонд дурлаваас ядуурал.

¹⁸Буруут нь зөвтийн, Зальхай нь чигч шударга нэгний төлөөс.

¹⁹Цухалдан яншдаг эмтэй цуг байснаас Цөл газар амьдрах нь дээр.

²⁰Мэргэний гэрт эрдэнэс, тос тэргүүтэн үлдэвч Мулгуу хүн тэдгээрийг үрж барах.

²¹Зөвт байдал, хайр энэрлийг мөшгөвөөс Амь, зөвтөл, алдрыг олох.

²²Мэргэн хүн хүчтэнүүдийн хотыг авиран дайрдаг Нөгөөдүүлийн найдаж асан хэрмийг тэр нураадаг.

²³Ам хэлээ захирдаг хүн Амь юугаа зовлон шаналангаас сахих.

²⁴Ихэмсэг нэгнийг “Басамжлагч” гэдэг Ихэрхүү зан нь дүрэлзэн байдаг.

²⁵Хойрго залхуугийн хүслэн үхэлд хүргэх нь Хэзээд гар нь ажиллахаас татгалздагийнх.

²⁶Шунахайрагч өдөржин хүсэх. Харин зөвт хүн харамгүй өгөх.

²⁷Буруутын нядлах тахил нь жигшүүр. Булай санаалж авчирваас бүр ч дэндүү.

²⁸Хуурамч гэрч мөхнө. Харин сайн сонсдог хүн мөнхөд ярина.

²⁹Буруу хүн дүр эсгэх. Чигч шударга нэгэн замаа ухаарах.

³⁰ЭЗЭНийг сөрөн чадах мэргэн ухаан, бодрол ухаан, зөвлөгөө ч гэж ер үгүй.

³¹Хүлэг морьдыг тулааны өдөрт бэлддэг ч Ялалт ЭЗЭНийх болой.