Read Ariun Bible 2013 – Ариун Библи 2013 Сургаалт үгс 22 Bible Online

Сургаалт үгс 22 - Ariun Bible 2013 – Ариун Библи 2013 bible

Сургаалт үгс 22

¹Арвин баялгаас сайн нэр дээр. Алт, мөнгөнөөс таалал хүндлэл илүү.

²Баян ядуу хоёрт нийлэх зүйл гэвэл Хоёуланг бүтээгч нь ЭЗЭН аж.

³Хэрсүү нь гамшгийг хараад нуугддаг. Гэнэн нь угтан явж эцэстээ шийтгэгддэг.

⁴ЭЗЭНээс эмээхүй ба даруу дорд байдалд Эд баялаг, алдар хүнд, амь нь шагнал болно.

⁵Адайрын замд сундуу хийгээд занга. Анхаарал болгоомжтон тэдгээрээс ангид.

⁶Явах ёстой замаар нь хүүхдийг сурга. Тэрээр өтөлсөн ч түүнийг орхихгүй.

⁷Баян хүн ядуугийн захирагч. Өртөн нь зээлдүүлэгчийнхээ зарц.

⁸Ёсон бусыг таригч нь зүдүүр гай хураах. Агсрах хилэнгийнх нь саваа алга бас болох.

⁹Өгөөмөр хүн ерөөгддөг нь Үгээгүйчүүлд хоолноосоо өгдгийнх.

¹⁰Басамжлагчийг холдуулваас хэрүүл зайлах. Зарга болон зүхэл ч зогсоно.

¹¹Цэвэр зүрхийг хайрлагч, нигүүлсэнгүй уруулт хүнтэй Хаан хүртэл анд нөхөр болох.

¹²ЭЗЭНий мэлмий мэдлэгийг сахин хамгаалах. Зальхайн үгсийг Тэрээр мушгин хол хаях.

¹³Залхуу хүн “Гадаа арслан байна Би гудамжинд гарвал алуулах байх” гэдэг.

¹⁴Садар самуун эмийн ам гүн цооног юм. ЭЗЭНийг хилэгнүүлэгч тийш унана.

¹⁵Саваагүй мунхаглал хүүхдийн зүрхэнд уяатай ч Сахилгын саваа үүнээс нь салгаж холдуулах.

¹⁶Бэлжих гэж ядууг зовоож, Баяныг зусардагч хүн хоосролд ордог.

¹⁷Мэргэдийн үгсэд чих тавь Мэдлэг ухаанд минь зүрхээ хандуул!

¹⁸Хэвлийдээ чи эдгээрийг хадгалж, Уруулан дээр чинь энэ үгс бэлэн байваас тааламжтайяа.

¹⁹Бат итгэл чинь ЭЗЭНд байг гэж би чамд мэдүүлэв.

²⁰Би чамд мэдлэг хийгээд зөвлөх үг гучийг бичиж үлдээсэн биш үү?

²¹Ингэсэн нь үнэний үгс итгэлтэйг чамд мэдүүлж, Илгээсэн нэгэндээ чи үнэн үгийг эргүүлэн авчрахын тулд юм шүү!

²²Ядууг ядуу гэж бүү тоно Зүдэрснийг үүд хаалган дээр бүү дарла

²³Тэдний хэргээр заргалдагч нь ЭЗЭН Тэднийг тоногсдыг Тэр тононо.

²⁴Ууранд баригдсан хүнтэй бүү нөхөрлө, Түргэн зантай хүнтэй бүү нийл.

²⁵Учир нь чи түүний замаар суралцаж, өөрийгөө занганд оруулуузай.

²⁶Гар барин амлаж, Өрийн төлөө батлан даагчдын нэг бүү бол.

²⁷Оронд нь төлөх юм чамд үгүй болбоос Ор дэвсгэрийг чинь авах нь юун билээ?

²⁸Эцэг өвгөдийнхөө бий болгосон Эртний хил хязгаарыг бүү өөрчил!

²⁹Ажилдаа чадмаг хүнийг чи харсан уу? Тэрээр хаадын өмнө зогсоно Дорд хүмүүст эс үйлчилнэ.