Read Ariun Bible 2013 – Ариун Библи 2013 Сургаалт үгс 24 Bible Online

Сургаалт үгс 24 - Ariun Bible 2013 – Ариун Библи 2013 bible

Сургаалт үгс 24

¹Хорон нэгэнд бүү атаарх Холбогдохыг бүү хүс

²Зүрхнийх нь сэдэл хүчирхийлэл Уруулынх нь яриа зовлон болой.

³Мэргэн ухаанаар гэр орон сүндэрлэж Бодрол ухаанаар тэр чухамдаа тогтдог.

⁴Мэдлэг нь өрөөнүүдийг чинь Тааламжит үнэт баялгаар дүүргэнэ.

⁵Чадалтайгаас мэргэн нь Хүчтэйгээс ухаантай нь илүү.

⁶Дайтваас мэргэн удирдамжийг дага. Зөвлөхүүд арвин аваас ялалт ирнэ.

⁷Мунхагт мэргэн ухаан нь дэндүү өндөрдөнө. Тэрээр хэлцэх хаалганы дэргэд амаа эс нээнэ.

⁸Хорон мууг зорьдог нэгэн Хорлогч хэмээн зайлшгүй дуудагдана.

⁹Мунхгийн сэдэл бүр нь нүгэлд Басамжлагч нь хүмүүсийн жигшил.

¹⁰Зовлон шаналангийн цагт сул байх аваас Хүч тэнхээ чинь сул аж.

¹¹Үхэл уруу туугдах хүмүүсийг Алагдах газрынхаа зүг гэлдрэх хүмүүсийг Буцааж авчрахаас хойш бүү суу.

¹²“Харагтун, бид үүнийг мэдээгүй” гэж чи хэлэх аваас Зүрхийг чинь дэнслэгч анхаарахгүй гэж үү? Сэтгэлийг чинь хамгаалагч мэдэхгүй гэж үү? Тэрээр үйлсийнх нь хариуг хүмүүнд өгөхгүй гэж үү?

¹³Идээний сайн нь зөгийн бал, ид хүү минь Тагнайд чинь чихэрлэг нь сархинагаас дусах бал.

¹⁴Мэргэн ухаан болбоос сэтгэлд чинь үүнтэй адил билээ. Хэрэв олох аваас ирээдүйгээ олох агаад Ингэх аваас найдвар чинь үл тасарюу.

¹⁵Буруут чи, зөвтийн байр оронг отож бүү хэвт. Амьдран суудаг газрыг нь бүү хүчирхийл!

¹⁶Учир нь зөвт нь долоо бүдрэвч нэг сэхнэ. Буруут харин гай гамшигт нэгмөсөн бүдэрнэ.

¹⁷Дайсан чинь уналаа гээд бүү баярла. Тэднийг бүдрэх үед нь зүрхээ бүү хөөргө!

¹⁸Эс тэгвээс ЭЗЭН хараад, үүнийг эс таалах ба Дайснаас чинь уур хилэнгээ буцааж магад.

¹⁹Бурууг үйлдэгчдээс болж бүү уурс, Ёс бусыг үйлдэгчдэд бүү атаарх.

²⁰Учир нь ёрын мууд ирээдүй үгүй Ёс бусын дэнлүү бөхнө.

²¹ЭЗЭНээс эмээгтүн, хаанаас эмээгтүн, хүү минь, Эсэргүү нартай бүү нийл.

²²Эдний гамшиг гэнэт ирнэ. Дээрх хоёрын хэнээс нь сүйрэл буусныг хэн мэднэ?

²³Эдгээр нь ч мэргэдийн үгс юм. Шүүхдээ тал засах нь сайн зүйл бус.

²⁴“Таны зөв” гэж буруутанг дуудваас хүмүүст зүхэгдэнэ. Үндэстэндээ зэвүүцэгдэнэ.

²⁵Тийм хүнийг зэмлэгчдэд талархал байх. Тэдний дээр сайн ерөөл мөн орших.

²⁶Зүйтэй үгсийг хэлэх нь уруул дээр үнсэж буй хэрэг.

²⁷Гаднах ажилаа цэгцэлж, Талбайд буй юмсаа бэлэн болгож, дараа нь гэр орноо барь.

²⁸Хөршийнхөө эсрэг шалтгаангүйгээр бүү гэрчил, Уруулаараа бүү мэхэл.

²⁹“Хийснийг нь би ч мөн түүнд хийх болно, Үйлийнх нь дагуу хариу хүртээнэ дээ” гэж бүү хэл.

³⁰Залхуу хүний тариан талбай, Ухвар мөчидийн усан үзмийн цэцэрлэгийн дэргэдүүр би өнгөрөв.

³¹Харагтун, бүх газарт нь өргөст бут битүү ургаж, Халгайгаар гадарга нь дүүрч, чулуун хашаа нь нурсан байлаа.

³²Харуутаа л Би үүнийг зүрхэндээ тусгаж, эндээс сургамж авав.

³³Жаахан унтаж, жаахан дугхийгээд, Гараа жаахан хумхисаар хэвтэх зуур чинь

³⁴Ядуурал дээрээс чинь дээрэмчин мэт, Гачаал зэвсэгт дайчин мэт ирэх вий.