Read Ariun Bible 2013 – Ариун Библи 2013 Сургаалт үгс 29 Bible Online

Сургаалт үгс 29 - Ariun Bible 2013 – Ариун Библи 2013 bible

Сургаалт үгс 29

¹Зэмлэл дуулах тусмаа хүзүү хөшүүн загнагч нь Засал авахгүйгээр гэнэт сүйрнэ.

²Зөвтүүд олшрох тусам Ард түмэн баярлан жаргана. Буруу нэгэн захирваас Ард олон халаглана.

³Мэргэн ухаанд дурлагч, эцгээ баярлуулах Садар эмстэй нөхцөгч эд хөрөнгөө барах.

⁴Хаан хүн улс орныг шударга шүүлтээр тогтворжуулах. Хандив хахууль авагч харин түүнийг хөмрүүлэн сүйрүүлэх.

⁵Хөршөө бялдуучилдаг хүн Хөлд[12] нь урхи тавьж буй хэрэг.

⁶Буруут нь гэмт үйлдэлдээ урхидуулах Харин зөвт нь дуулан баясах.

⁷Зөвт нь ядуусын эрхийг мэддэг бол Буруу нь үүнийг эс ойлгох.

⁸Басамжлагчид хотыг ноцоох Мэргэд уур хилэнг зайлуулах.

⁹Мэргэн хүн мунхаг хүнтэй заргалдахад Ухаарлыг бус хилэгнэл элэглэл хураах.

¹⁰Өөлөх өөгүй нэгэн нь цус урсгагчдад занагдах. Чигч шударга нэгний амь нь хүртэл нэхэгдэх.

¹¹Мунхгийн уур тэсрэмтгий Мэргэн нь түүнээ тэвчимтгий.

¹²Захирагч нь худал үгст анхаарваас Зарц үйлчлэгч нь бүгд буруут болно.

¹³Ядуу хүн ба дарлагч хоёрын нийтлэг зүйл гэвээс ЭЗЭН хоёулангийнх нь нүдэнд гэрэл тусгадаг.

¹⁴Хаан ядуусыг үнэнээр шүүх аваас Сэнтий нь үүрд тогтон батжих.

¹⁵Саваа, гэсгээлт хоёр мэргэн ухааныг өгнө, Харин зөнгөөр өссөн хүүхэд эхийгээ гутаана.

¹⁶Буруутууд олшрох тусам гэмт үйлдэл ихэснэ. Зөвт нь харин тэдний сүйрлийг үзнэ.

¹⁷Хүүгээ сургамжлан хүмүүжүүл Тэгвээс тэр чамайг тайвшруулна. Түүнчлэн сэтгэлийг чинь баярлуулна.

¹⁸Алсын хараа байхгүй аваас Ард түмэн журамгүй, Харин хуулийг сахигч нь жаргалтай.

¹⁹Зарцыг зөвхөн үгээрээ хүмүүжүүлж болохгүй Учир нь тэрээр ойлгосон ч хариу үйлдэл хийхгүй.

²⁰Хэлэх үгэндээ яаруу хүнийг чи харсан уу? Мунхаг нэгэнд тийм хүнээс ч илүү найдвар бий.

²¹Зарцаа багаас нь эрхлүүлэх юм бол Занга болох вий эцэстээ![13]

²²Ууртай хүн эвдрэлцлийг өдөөнө. Цочмог хүн гэмт үйлдэлд автана.

²³Хүний бардам зан өөрийг нь дорд болгох. Даруу сүнс алдар хүндийг хүлээх.

²⁴Хулгайчтай хуваалцагч болбоос амиа үзэн ядаж буй хэрэг Хараал зүхлийг сонссон ч тэрээр мэдүүлгэ эс өгнө.

²⁵Хүнээс айх айдас занга тавих, Харин ЭЗЭНд итгэдэг нь эсэн мэнд байх.

²⁶Захирагчийн ивээлд багтахыг олон хүн зорьдог Үнэндээ хүний шударга ёс гагцхүү ЭЗЭНээс ирдэг.

²⁷Хорон нэгнийг зөвт хүмүүс жигших. Чигч шударга замналтай хүнийг буруут нь жигших.