Read Ariun Bible 2013 – Ариун Библи 2013 Сургаалт үгс 30 Bible Online

Сургаалт үгс 30 - Ariun Bible 2013 – Ариун Библи 2013 bible

Сургаалт үгс 30

¹Иакегийн хөвгүүн Агурын айлдсан үгс буюу эш үзүүллэг. Тэрээр эдгээрийг Итиел ба Укалд уламжилжээ.

²Хүн гэхэд би дэндүү мунхаг юм даа, Хүний ухаарал надаас үл олдоно.

³Мэргэн ухаанд ч эс суралцав, би. Ариун Нэгэний тухай мэдлэг ч надад алга.

⁴Хэн тэнгэр өөд одоод бууж ирэв? Хэн салхийг алгандаа атгаж байв? Хэн усыг дээлэндээ боож чадав? Хэн дэлхийн хамаг хязгаарыг бүтээв? Түүний нэр болон Хүүгийнх нь нэр хэн бэ? Та мэдэх үү?

⁵Бурханы үг бүр тунгаагдсан байдаг Өөрийнх нь дотор хоргодогсдод Тэрээр бамбай

⁶Түүний үгэн дээр бүү нэм, Тэгвээс Тэр чамайг илчлэн зэмлэж, чи худалч болох вий.

⁷Хоёр зүйлийг би Танаас гуйж байна Харин намайг үхэхээс өмнө надад бүү татгалзаарай!

⁸Хоосон хуурмагийг, худал үгийг Хол байлгаач, надаас. Ядуурлыг ч, баян тарган байдлыг ч Надад бүү өгөөч, Ногдох хувь минь болох талхаар намайг тэжээгээч.

⁹Эс тэгвэл би хангалттай дүүрнийг хүртэж, “ЭЗЭН гэж хэн юм бэ?” гээд, Няцаж буцах вий, Эсвэл ядууран хулгай хийж, Бурханыхаа нэрийг бузарлах вий.

¹⁰Эзнийх нь өмнө зарцыг нь бүү гүтгэ Эс тэгвэл тэр чамайг зүхэж, чи ялтан болох вий.

¹¹Эцгийгээ зүхэж, эхийгээ үл ерөөдөг хүмүүс байх.

¹²Нүдэндээ өөрийгөө цэвэр гэх Буртгаасаа угаагдаагүй хүмүүс ч бас байх.

¹³Ихэмсэг нүдтэй, дээгүүр харцтай хүмүүс ч бий.

¹⁴Газар дээрх ядуусыг, Хүмүүсийн дундах үгээгүйчүүдийг залгих Илд мэт шүдтэй, хутга шиг араатай хүмүүс ч бас бий.

¹⁵Шуналын туламд “Өг, Өг” гэцгээдэг Хоёр охин, Ханаж цаддаггүй гурав дахь “Хангалттай” гэж хэлдэггүй дөрөв дэх нь бас буй.

¹⁶Үхэгсдийн орон, Үргүй хэвлий, Ус ууж ханадаггүй газар хийгээд “Хангалттай” гэж хэлдэггүй гал зэрэг нь юм.

¹⁷Эцгийгээ басамжилж, Эхдээ дуулгаварлахыг зэвүүцэгчийн нүдийг Хон хэрээ тоншиж, тас шувуу иднэ.

¹⁸Миний хувьд ухааршгүй гурван зүйл байна. Дөрөв дэхийг нь би бүр ч ойлгохгүй юм.

¹⁹Тэнгэрт халих бүргэдийн зам, Хадан дээгүүр мурилзах могойн зам, Тэнгисийн зүрхэн дунд хөвөх онгоцны зам, Бүсгүйтэй нийлсэн эрийн хувь тавилан болой.

²⁰Садар самуун эмийн зам нь гэвээс тэр идэж амаа арчаад “Би ёс бусыг үйлдээгүй” гэдэг.

²¹Гурван зүйлийн дор дэлхий чичирч, Дөрөв дэхийг нь даадаггүй

²²Хаан сэнтий дэх зарц, Талхаар хангалуун мунхаг,

²³Хайр сэтгэлгүйгээр нөхөрт гарах бүсгүй Хатагтайгаа эзэгнэсэн шивэгчин зэрэг ажгуу.

²⁴Дэлхий дээр өчүүхэн атлаа мэргэнээс мэргэн дөрвөн зүйл бий.

²⁵Шоргоолж том амьтан биш ч зуны турш хоол хүнсээ базаана.

²⁶Дорго хүчтэй амьтан биш ч хад чулуун дунд үүрээ засна.

²⁷Царцаанд хаан байхгүй ч тэд эрэмбээр жагсан явна.

²⁸Гүрвэлийг гараар барьж болох ч тэрээр хааны ордонд ч байх.

²⁹Алхах гишгэхдээ сүрлэг гурав буюу гоёмсог явдаг дөрөв бий.

³⁰Хэний ч өмнөөс ухардаггүй, Араатны хүчирхэг нь болсон арслан,

³¹Ихэмсэг алхлах азарган тахиа, Ухна ба дайчин баатруудтайгаа жагсаж буй хаан болой

³²Өөрийгөө өргөмжилж мунхагласан эсвэл ёр мууг сэдсэн бол Гараа аман дээрээ тавь.

³³Цохисон сүүнээс цөцгий Дэлссэн хамраас цус Тэсрэх уурнаас эвдрэлцэл буй.