Read Ariun Bible 2013 – Ариун Библи 2013 Сургаалт үгс 31 Bible Online

Сургаалт үгс 31 - Ariun Bible 2013 – Ариун Библи 2013 bible

Сургаалт үгс 31

¹Хаан Лемуелийн үгс буюу эх нь түүнд сургамжилсан эш үзүүллэг.

²Хүү минь боль, хэвлийн минь хүү, ам өчгийн минь хүү, болохгүй!

³Хүч тэнхээ юугаа эмсэд бүү зар. Харгуй зам юугаа тэдэнд бүү зориул. Хаадыг сүйтгэгчид тэд билээ.

⁴Хаан хүнд зохихгүй, Лемуел минь, Дарс уух нь хаан хүнд эс зохино. Захирагч хүнд сархдыг хүсэн тэмүүлэх нь үл зохино.

⁵Уух аваас, хууль тогтоолыг умартан Зовлон зүдүүрийн хөвгүүдийг шүүхдээ эрхийг нь умартуулдаг.

⁶Сөнөж буй хүмүүст сархдыг барь, Сэтгэлдээ гашуудсан хүмүүст дарсыг барь.

⁷Ядуу зүдүүгээ мартан ууг. Зовлон зүдүүрээ дахиж бүү дурсаг.

⁸Ам хэлгүй, арилж одох хөөрхийсийн төлөө амаа нээ.

⁹Амаа нээж, зөв шударгаар шүү Ядуус ба зүдрэгсдийг шүүн өмгөөл.

¹⁰Зохистой чадварлаг эхнэрийг хэн олж чадах вэ? Тийм эхнэр эрдэнэсээс ч үнэтэй.

¹¹Эр нөхөр нь түүнд итгэлээ тавих агаад Эд олз нь эс хомстоно.

¹²Бүхэл амьдралынхаа туршид нөхөртөө Тэрээр мууг бус зөвхөн сайныг л хийнэ.

¹³Маалинга ноосыг базааж, Маш баяртайгаар гар нь ажиллана.

¹⁴Хоол хүнсээ хол газраас зөөх нь Худалдаачны хөлөг онгоцууд мэт.

¹⁵Харуй бүрийгээр тэр босож, Хамаг бүлдээ унд цай бэлтгэнэ Зааварчилгааг шивэгчин бүсгүйчүүлдээ Зааж бас хэлнэ.

¹⁶Газрыг нягтлан үзээд, худалдан авна. Гарынхаа үр жимсээр тэндээ усан үзэм тариална.

¹⁷Тэрээр ууцаараа хүчийг бүсэлж, Гараа хүчтэй болгоно.

¹⁸Үйлс нь бүтэмжтэй байгааг тэр мэдэх тул Дэнлүү нь хүртэл шөнөд үл бөхнө.

¹⁹Гар нь ээрүүл дээр зэхээстэй, Хуруунд нь ээрүүлийн дамар бариастай.

²⁰Ядууст гараа тэрээр сунгана. Гачигдагсдад гар нь дэлгээстэй.

²¹Гэр бүлийнхээ төлөө тэрээр цастайд үл айна. Гэрийнхэн нь хэдийнээ давхар хувцастай байна.

²²Бүтээлгүүдийг өөртөө урлана. Биеэ ёрог даавуун нил ягаанаар хувцаслана.

²³Нөхөр нь гулдан хаалган дээр Нутгийн ахмадуудын дунд сууж байхдаа хүндлэгдэнэ.

²⁴Ёрог даавуу хийж, тэрээр түүнийгээ худалдана. Бөс даавууг худалдаачдад бас нийлүүлнэ.

²⁵Ийм нэгэн нь хүч чадал, хүндэтгэлээр хувцаслана Тийм нэгэн нь ирэх өдрийг инээн баясан угтана.

²⁶Мэргэн ухаанаар амаа нээж, Энэрлийн сургаалыг хэл нь сургамжилна.

²⁷Орон гэртээ тэрээр санаа тавина Залхуурал гэж үгүй.

²⁸Үр хүүхдүүд нь өсөж өндийгөөд, түүнийг ерөөнө Эр нөхөр нь ч түүнийг магтан

²⁹“Олон эмэгтэй зүтгэлтэй ч, чи тэднээс илүү билээ” гэнэ.

³⁰Дур булаам байдал хуурамч, гоо үзэсгэлэн ч хоосон тул ЭЗЭНээс эмээгч эмэгтэй л магтаал авах учиртай.

³¹Гарынх нь үр жимсийг түүнд өг. Гавьяа үйлс нь түүнийг Үүдэн хаалганаа магтах болтугай.