Read Ariun Bible 2013 – Ариун Библи 2013 Номлогчийн үгс 10 Bible Online

Номлогчийн үгс 10 - Ariun Bible 2013 – Ариун Библи 2013 bible

Номлогчийн үгс 10

¹Үхсэн ялаа тансаг үнэрт тосыг өмхийрүүлдгийн адил өчүүхэн тэнэглэл л мэргэн ухаан, алдар хүндийг давамгайлдаг.

²Ухаант хүний зүрх баруун тийш нь хөтөлдөг бол мунхгийн зүрх зүүн тийш нь дагуулдаг.

³Мунхаг нэгэн замаар явахдаа хүртэл мэдрэмжгүй байх агаад мунхаглалаа хүн бүрд ярина.

⁴Захирагч чинь чамд хилэгнэх аваас байр сууриа бүү орхи. Учир нь тайван байдал ноцтой гэмийг ч зайлуулдаг.

⁵Эрх мэдэлтнээс үүдэлтэй алдаа болох нэгэн ёрын юмыг би наран доор харав.

⁶Мулгуучууд олон өндөрлөгт заларч харин баячууд шоовдорлогдов.

⁷Боолууд морь унахад хан хөвүүд боол адил явган холхихыг ч би харлаа.

⁸Нүх ухваас түүндээ унах. Хана нурааваас могойд хазуулах.

⁹Чулуу бутлагч чулуундаа цохиулах, Түлээ хагалагч түүнээсээ гэмтэх.

¹⁰Сүх мохож, хэн ч эс ирлэвээс илүү хүч зарцуулах, Харин мэргэн ухаан амжилт авчрах.

¹¹Могой ховсдохоосоо өмнө хаздаг бол Ховсдох нь түүнд илүүц юм.

¹²Ухаант мэргэдийн амнаас гарах үг нь нигүүлсэл, Мунхгийн уруул харин өөрийгөө залгих аж.

¹³Түүний ярианы эхлэл нь тэнэг байдаг бол төгсгөл нь балмад солиорол аж.

¹⁴Мунхаг нэгэн олон үгтэй. Юу болохыг хүн эс мэднэ. Түүний араас юу ирэхийг хэн түүнд хэлж чадах билээ?

¹⁵Мунхаг хүн хотод хэрхэн хүрэхийг ч мэддэггүй тул түүний зүтгэл өөрийг нь туйлдуулах аж.

¹⁶Хаан нь балчир, ноёд нь өглөөжин найрладаг гүрэн, ээ хөөрхий!

¹⁷Харин хаан нь язгууртай, ноёд нь зохистой цагт согтуурахын төлөө бус, харин хүч сэлбэхийн тулд зооглох гүрэн чи ивээлтэй еэ.

¹⁸Залхуугийн дээвэр хотойж, лазан гартны гэрт дусаал гоожих.

¹⁹Хүмүүс найр хуримаар баяр баясгалан хийж, дарсаар амьдралаа хөгжилтэй болгодог ч мөнгө бүхний хариу ажээ.

²⁰Хааныг бүү зүх, бодолдоо ч тэр. Баян хүнийг бүү хараа, унтлагын өрөөндөө ч тэр. Учир нь тэнгэрийн шувууд тэдэнд үг зөөх нь бий бөгөөд жигүүртэн ч хэргийг задалж мэднэ.