Read Ariun Bible 2013 – Ариун Библи 2013 Номлогчийн үгс 12 Bible Online

Номлогчийн үгс 12 - Ariun Bible 2013 – Ариун Библи 2013 bible

Номлогчийн үгс 12

¹Хүнд өдрүүд ирж “Надад аятай юм алга” гэж хэлэх тийм жилүүд ирэхээс өмнө залуу насныхаа өдрүүдэд, Бүтээгчээ[4] санагтун.

²Нар, гэрэл, сар, одод харанхуйлан борооны дараа үүлс эргэн хургахаас өмнө санагтун.

³Юун гэвээс, тэр өдөр гэр хамгаалагчид нь салгалан, хүчит эрс нь бөгтийж, нунтаглуурууд нь цөөрөөд няцлахаа больж, цонхоор харагсад нь харанхуйд автана.

⁴Ийнхүү гудамжны хаалга хаагдан тээрмийн дуу намдаж, шувуудын жиргээнээр сэрэх авч, охидын дуу нам жим болох үед

⁵өгсүүр газраас зүрхшээж, замаар явах ч аймшигтай санагдаж, бүйлсийн цэцэг шиг бууралтаад, цатгалан голио шиг хөшилдсөөр янгирцгана[5] шиг хагдарна. Ийнхүү хүн мөнхийн гэртээ одоход гашуудагсад гудамжаар алхах болно.

⁶Мөнгөн утас тасарч, алтан хул хэмхэрч, булгийн хундага бутарч, худгийн хүрд эвдрэхээс өмнө Түүнийг санагтун.

⁷Тэгээд тоос нь урьд байсан газар шороондоо буцаж, амь амьсгаа[6] нь үүнийг өгсөн Бурхандаа буцах ажээ.

⁸Номлогч хэлэхдээ “Хоосноос хоосон бөгөөд бүгд утгагүй” гэв.

⁹Номлогч мэргэн ухаантан байсан бөгөөд ард олныг мэдлэгт сургав. Тэр цэгнэж, судалснаар олон сургаалт үгсийг эмхлэн гаргав.

¹⁰Номлогч онч мэргэн үгсийг эрэлхийлэн байж, үнэний үгсийг зөвөөр буулгав.

¹¹Мэргэдийн үгс болбоос хатгуурт шилбүүр, хадаас адил орох бөгөөд тэдгээрийг бичигчид нь нэг л Хоньчиноор өгөгдсөн ажгуу.

¹²Энэ бүхнээс гадна хүү минь “Олон ном зохиоход төгсгөл үгүй ба үлэмж их сурах нь бие махбодод халтай” гэдгийг санаж явтугай.

¹³Энэ бүхнийг дүгнээд, сонордуулахад Бурханаас эмээж, Түүний тушаалыг дагагтун. Энэ нь хүн бүхэнд хамаарна.

¹⁴Сайн, муу гэж ялгалгүй нууцлагдсан юм бүрийг, бүх үйлсийг Бурхан шүүлтэд аваачих болно.