Read Ariun Bible 2013 – Ариун Библи 2013 Номлогчийн үгс 7 Bible Online

Номлогчийн үгс 7 - Ariun Bible 2013 – Ариун Библи 2013 bible

Номлогчийн үгс 7

¹Нандин тосноос сайн нэр илүү Төрөх өдрөөс үхэх өдөр дээр.

²Найрын өргөө уруу явснаас гашуудагчийн оромж уруу явсан нь дээр. Учир нь энэ бол хүн бүрийн төгсгөл бөгөөд Амьд байгсад нь үүнийг Зүрхэндээ авдаг юм.

³Инээснээс уйлсан нь дээр Учир нь царай гунигтай байвч Зүрх жаргалтай болж болох буюу.

⁴Ухаантны зүрх гашуудагсдын оромжинд, Тэнэгийн зүрх зугаацагчдын гэрт байх аж.

⁵Тэнэгийн дуулахыг сонссоноос Ухаант хүний зэмлэлийг сонсох нь дээр.

⁶Тэнэгийн инээх нь тогоон доорх гишүү шажигнахын адил бөгөөд энэ бас л хоосон.

⁷Бузар олз мэргэдийг мунхаг болгох Хээл хахууль зүрхийг нь бас эвдэх.

⁸Хэргийн төгсгөл нь эхлэлээсээ чухал. Сэтгэлийн тэвчээр нь зүрхний бардамналаас эрхэм.

⁹Уур тэнэгийн цээжинд оршдог тул Ууранд бүү яар.

¹⁰“Яагаад урьдын өдрүүд өнөөгийнхөөс дээр байсан юм бэ?” гэж бүү хэл. Ингэж асуух чинь мэргэн ухаанаас гардаггүй юм.

¹¹Өвлөгдөх мэргэн ухаан эрхэм бөгөөд нарыг харагчдад үнэтэй буюу.

¹²Мөнгө хамгаалалт болох адил Мэргэн ухаан хамгаалалт юм. Харин мэдлэгийн давуу чанар гэвээс мэргэн ухаан эзэндээ амийг өгдөг билээ.

¹³Бурханы бүтээлийг эргэцүүлэгтүн. Түүний муруйлгасныг хэн шулуун болгож чадах билээ?

¹⁴Азтай өдрүүддээ аз жаргалтай бай, Харин бүтэлгүй өдрүүддээ сэтгэн бод. Аль алийг нь Бурхан бий болгодог тул дараа нь юу болохыг хүн эс мэднэ.

¹⁵Би утгагүй амьдралынхаа туршид олон юм үзэв. Зөвт нь шударга байдал дотроо үхэж байхад, буруут нь худал дотроо удаан амьдрах ажээ.

¹⁶Хэт шударга, хэт мэргэн ч бүү бай. Яагаад чи өөрийгөө хөнөөх ёстой юм бэ?

¹⁷Хэт балмад, хэт тэнэг ч бүү бай. Яагаад чи цагаасаа өмнө үхэх ёстой гэж?

¹⁸Нэгээс нь зуурч, нөгөөг нь тавилгүй байх нь сайн бөгөөд Бурханаас эмээгч нэгэн тэр бүгдээр амжилтад хүрдэг.

¹⁹Мэргэн ухаан хотын арван захирагчаас ч илүүгээр ухаантныг хүчирхэгжүүлдэг.

²⁰Үнэндээ, газар дэлхий дээр нүгэл огт хийдэггүй сайныг үйлдэгч зөвт хүн гэж үгүй.

²¹Олон ярианы үг бүрийг анхаарах хэрэггүй, боол чинь чамайг хараасан ч бай.

²²Чи ч бас бусдыг олонтаа харааж байсныг зүрх чинь мэдэх билээ.

²³Энэ бүхнийг би мэргэн ухаанаар шалгаад “Би ухаантай болно” гэсэн боловч, мэргэн ухаан надаас алс хол байлаа.

²⁴Юу байгаа нь алс бөгөөд гүнээс гүнд байна. Хэн үүнийг нээж чадах вэ?

²⁵Би өөрийн зүрхийг мэргэн ухаан, гүн ухааныг шинжлэн судлах хийгээд тэнэгийн буруутал, солиотны тэнэглэлийн учрыг олоход чиглүүлэв.

²⁶Үхлээс ч илүү гашууныг би олж харав. Юу хэмээвээс эм хүний зүрх нь занга, гар нь гинж аж. Бурханд тааламжит нэгэн нь түүнээс зугтах бөгөөд харин нүгэлтэн нь тэр эмд олзлогдох аж.

²⁷“Үзэгтүн, би үүнийг олж мэдэв” гэж номлогч хэлэхдээ, тайлбарыг нь олохын тулд нэг зүйлийг нөгөө дээр нэмэн,

²⁸сэтгэл минь үүнийг эрсээр байсан боловч эс олов. Мянгаас нэг л эрэгтэйг би олсон атал энэ бүхний дундаас нэг ч эмэгтэйг олсонгүй.

²⁹Үзэгтүн. Миний олж мэдсэн ганц зүйл нь Бурхан хүмүүнийг чигч шударга бүтээсэн боловч тэд олон арга замыг хайдаг явдал юм.