Read Ariun Bible 2013 – Ариун Библи 2013 Соломоны дуун 2 Bible Online

Соломоны дуун 2 - Ariun Bible 2013 – Ариун Библи 2013 bible

Соломоны дуун 2

¹Би Шароны нэгэн сарнай Бэл хөндийн сараана л юм даа.

²Махирсын дунд сараана цэцэг ямар билээ. Миний хайрт, эмс охидын дунд тийм ажээ.

³Ой модон дунд алимын мод хэр билээ. Олон хөвгүүн дунд амраг чи минь тэр билээ Сүүдэр дор нь би суумаар таатай Жимс нь тагнайд минь жигтэйхэн амттай.

⁴Дарст цэнгэлийн өргөөнөө дагуулав тэр, намайгаа Дарцаг болсон хайраараа даруулав бас, намайгаа

⁵Үзмээр намайг сэрээгээч, Алимаар намайгаа сэргээгээч. Үгүй бол би дурлалдаа амь тавьж мэдэх нь

⁶Зүүн гараа тэр толгой дор минь ивээд л Зөв гар нь намайг тэврэнхэн илбээд л.

⁷—Иерусалимын охид оо, Талын гөрөөс, марал бугаар андгайлъя. Таашаал дурыг бэлэн болтол нь битгий өдөөж сэрээ.

⁸Хайртын минь чимээ! Хараач, тэр уулсын дээгүүр дэгдэж, Толгод тойрон сүлжсээр ирмүй.

⁹Хайрт минь яг л Хангал буга, гөрөөс мэт амуй Хараач, хананы маань цаана тэр зогсоод, Цонхоор минь ширтэж Сараалжаар нь шагалзан баймуй.

¹⁰Хайрт минь надад хандаж өгүүлрүүн: —Сэрж босооч, хайр минь Цэвэрхэн ганц минь гарч ирээч.

¹¹Өвөл нэгтээ өнгөрчээ, Бороо ч болиод татарчээ.

¹²Дэлхийд цэцэгс дэлгэрээд Жиргээн дуулиан жигдрээд Хүүрзгэнийн дуу нутагт маань дуулдаад

¹³Инжир мод жимслээд, Усан үзэм цэцэглээд Сэнгэнэм үнэр анхилж байна Сэрж босооч, хайр минь.

¹⁴Ангал цохионы үе нөмөрдөн суугаа ай миний тагтаахан Үзэмж зүс чинь жавхаалаг, өөрийн чинь дуу цовоолог тул Өнгө эгшгээ сонсгоод өөрийгөө нэг үзүүлээч.

¹⁵Цэцэглэж байгаа усан үзмийн минь Цэцэрлэгийг сүйтгэх үнэгнүүдийг, Өчүүхэн тэр үнэгдийг өөрсдөд минь бариад өгөөч.

¹⁶Хайрт минь минийх харин би түүнийх Сараануудын дунд сүргээ тэр бэлчээнэм.

¹⁷Өдрийн амьсгааг сэргэтэл Үнэгэн харанхуйг үргэтэл Жалгат уулс дээрээ миний хайрт Залуу буга, гөрөөс адил эргээрэй.