Read Ariun Bible 2013 – Ариун Библи 2013 Соломоны дуун 4 Bible Online

Соломоны дуун 4 - Ariun Bible 2013 – Ариун Библи 2013 bible

Соломоны дуун 4

¹Амраг минь чи юутай сайхан А-яа бүр дэндүү сайхан Гивлүүрэн цаанаа тагтаан адил нүдтэй Гилеад уул энгэрлэн буух ямаан сүрэг мэт үстэй

²Хяргуулаад сая угаалгаас гарсан Хонин сүрэг мэт шүдтэй Эдний дунд хурга хаясан нь үгүй Ихрийг бүгд тээсэн гэлтэй.

³Уруул юуг чинь хэлвэл улаан ягаахан тасам ам чинь дур булаам Хацар шанаа чинь гивлүүр цаанаа анар жимсний зүсэм

⁴Хүзүү шил чинь гэвээс хүчирхэг эрсийн зэмсэг Мянган бамбай чимэглэсэн Давидын цамхаг мэт тансаг

⁵Хоёр хөх чинь сараана дунд идээшлэх гөрөөсний ихэр янзага

⁶Өдрийн амьсгааг сэргэтэл Үнэгэн харанхуйг үргэтэл Миррийн уулс, гүглийн толгод тийш Миний бие тэмүүлэн одмуй.

⁷Өвч биеэрээ миний хайрт чи үзэсгэлэнтэй Өө сэв чамд минь ер үгүй.

⁸Сүйт бүсгүй минь, надтай хамт Ливанаас яваач. Хамтдаа надтай Ливанаас одож, Аманагийн оргилоос, Сенир, Хермоны оройгоос, Арслангийн үүрнээс, ирвэсийнн уулнаас аялж бууж ирээч.

⁹Хонгор дүүдэй, сүйт бүсгүй чи минь Зүрх юуг минь догдлуулав. Халтихан ганц харцаараа Зүүлт ганцхан сондроороо Зүрх юуг чинь догдлуулав.

¹⁰Хонгор дүүдэй, сүйт бүсгүй минь Халуун янаглал чинь юутай амттай Халуун тэр янаглал нь дарснаас Ханхлах тос нь алив үнэртнээс давуутай.

¹¹Сүйт бүсгүй минь, уруул чинь балыг дуслуулмуй Сүү бал хоёр хэл дор чинь баймуй Хувцасны чинь анхилал Ливаны анхилаан амуй.

¹²Хаалттай нэгэн цэцэрлэг Сүйт бүсгүй, дүүдэй минь Хаалттай булаг, лацадсан худаг.

¹³Уг суваг чинь анарын цэцэрлэг агаад Шилдгийн шилдэг жимстэй

¹⁴Задь хийгээд суман цэцэг, шанц болоод годоль Гүргэм бас суман цэцэг гүглийн хамаг мод Мирр болон зуун насттай

¹⁵Цэцэрлэгийн нэгэн булаг амьд усны худаг Ливанаас ундрах горхин.

¹⁶Умрын салхи аа, босоорой, өмнийн салхи аа, ирээрэй. Цэцэрлэгт минь сэвэлзэнхэн Сэнгэнэм үнэрийг нь тараагаарай Хайрт минь чи цэцэрлэгтээ ирээрэй Хамгийн шилдэг жимсийг нь идээрэй.