Read Ariun Bible 2013 – Ариун Библи 2013 Исаиа 10 Bible Online

Исаиа 10 - Ariun Bible 2013 – Ариун Библи 2013 bible

Исаиа 10

¹Ёс бус тогтоол гаргаж, зөв бус шийдвэр бичигсэд хөөрхий еэ!

²Ингэснээрээ тэд ядуусыг шударга явдлаас зайлуулж, Ард түмний минь үгээгүйчүүдийг үнэн зөвөөс холдуулмуй. Ингэж тэд бэлэвсэн эмэгтэйчүүдийг олз болгон, Өнчин хүүхдүүдийг дээрэмддэг.

³Алсаас ирэх сүйрэл ба шийтгэлийн өдөр Та нар юу хийх юм бэ? Та нар хэн уруу тусламж гуйн зугтах вэ? Мөн өөрсдийнхөө алдрыг хаана орхих вэ?

⁴Олзлогдогсдын дунд бөхийн, Алагдсан хүмүүсийн дунд унахаас өөр юу ч үлдэхгүй. Энэ бүхнээс болж Түүний уур хилэн эргэхгүй, Тэрээр мутраа сунгасан хэвээр байна.

⁵Уур хилэнгийн таяг минь болох Ассири хөөрхий еэ! Гарт буй саваа нь Миний зэвүүцэл юм.

⁶Би түүнийг сүсэг бишрэлгүй үндэстний эсрэг, Уур хилэнг минь хөдөлгөсөн ард түмний эсрэг явуулж, Дээрэмдсэн зүйлийг олзлон, Тэднийг гудамжны шавхай шалбааг мэт гишгэчих тушаалыг Би түүнд өгнө.

⁷Хэдийгээр тэр ингэж сэтгэхгүй, Зүрхэндээ ингэж төлөвлөхгүй боловч Олон үндэстнийг тасчин устгах нь Зүрхэн дэх зорилго нь юм.

⁸Учир нь тэр ингэж хэлж байна. “Жанжингууд минь бүгдээрээ хаад бус уу?

⁹Кално нь Кархемиш шиг Хамат нь Арпад шиг Самари нь Дамаск шиг биш үү?

¹⁰Мутар минь шүтээнүүдийн хаанчлалд хүрсний адил, (Сийлмэл хөргүүд нь Иерусалим болоод Самарийнхаас ч илүү агуу)

¹¹Би Самари болоод шүтээнүүдэд нь хэрхэн хандсан шигээ Иерусалим болон хөргүүдэд нь хандах бус уу?”

¹²Сион уул болон Иерусалимд Эзэн бүх ажилаа дуусгамагц “Ассирийн хааны омог бардам зүрхний үрийг болон ихэмсэг байдлынх нь сүр жавхааг Би шийтгэнэ.”

¹³Учир нь тэр “Би өөрийн гарын хүчээр бас мэргэн ухаанаараа үүнийг хийсэн. Учир нь би ухаантай. Би ард түмний хил хязгаарыг шилжүүлэн, Эд баялгийг нь дээрэмдэн, Сэнтийд залрагчдыг Хүчит нэгэн мэт түлхэн унагав.

¹⁴Шувууны үүр мэт ард түмний эд баялагт гар минь хүрч, Орхигдсон өндгийг цуглуулдаг нэгний адил Би бүх газрыг цуглуулан авав. Тэнд жигүүрээ дэвж, хошуугаа нээн жиргэх нэгэн алга” гэлээ.

¹⁵Сүх, цавчигч хүндээ өөрийгөө сайрхах уу? Эсвэл хөрөө, өөрийг нь ашиглаж байгаа хүнийхээ өмнө Өөрийгөө өргөмжлөх үү? Энэ нь өөрөөр нь далайгчийг эзэмших шийдэм, Өөрийгөө мод биш юм шиг өргөх таягтай адил юм.

¹⁶Тиймээс түг түмдийн БУРХАН Эзэн Зоригт дайчид уруу нь доройтуулах өвчнийг явуулж, Сүр жавхлангийнх нь дор Дүрэлзэх дөл мэт галыг ноцооно.

¹⁷Израилийн гэрэл нь гал, Ариун Нэгэн нь дөл болж, Өргөст бут сундуу бутыг нь ганцхан өдөрт шатаана.

¹⁸Тэр түүний шигүү ойн сүр жавхлан, Үр жимст цэцэрлэг бүгдийг нь устгана. Өвчтэй хүн доройтдогийн адил болно.

¹⁹Ойн модноос нь үлдсэн моддын тоо нь Хүүхэд бичиж болмоор тун бага байх болно.

²⁰Тэр өдөр Израилийн үлдэгсэд, Иаковын гэрийнхний амь хэлтрэгсэд өөрсдийг нь цохисон нэгнийг түшихээ болиод, харин ЭЗЭНийг, Израилийн Ариун Нэгэнийг үнэнээр түшнэ.

²¹Үлдэгсэд, Иаковын үлдэгсэд хүчит Бурхан өөдөө эргэнэ.

²²Израиль аа, чиний ард түмэн хэдийгээр Далайн элс мэт байсан ч Үлдэгсэд нь л буцна. Сүйрэл нь тогтоогдсон бөгөөд зөвөөр дүүрэн байна.

²³Учир нь түг түмдийн БУРХАН Эзэн тогтоосон сүйрлийг бүх газрын дунд хэрэгжүүлнэ.

²⁴Иймд түг түмдийн БУРХАН Эзэн ийн айлдаж байна. —Сионд оршдог ард түмэн минь! Египетийн адилаар та нарыг таягаар цохиж, та нар уруу саваа далайж байгаа Ассириас бүү айгтун.

²⁵Учир нь тун удахгүй та нарын эсрэг хандсан зэвүүцэл минь дуусгавар болж, уур хилэн минь тэдний сүйрэл уруу чиглэнэ.

²⁶Түг түмдийн ЭЗЭН, Оребын хаданд Мидианыг цохисон шиг тэднийг ташуурдана. Тэрээр Египетэд хийсэн шигээ таягаа далайн дээгүүр сунгана.

²⁷Тэр өдөр тэдний дарамтыг мөрнөөс чинь, буулгыг нь хүзүүн дээрээс чинь зайлуулна. Таргалснаас болж буулга нь эвдэрнэ.[8]

²⁸Тэр Аиатад[9] ирж, Мигроноор дамжин Михмашт нөөцөө хадгална.

²⁹Тэд давааг даваад “Бид Гебад хоноглох болно” гэв. Рама цочирдож, Саулын Гибеа зугтав.

³⁰Галлимын охид оо. Бүх дуугаараа чанга хашхирцгаа! Анхаарагтун Лаиша. Хөөрхийлөлтэй Анатот оо!

³¹Мадмена зугтаж, Гебимийн оршин суугчид хоргодох газар хайв.

³²Тэр өнөөдөр Нобт буудаллан Сион охины уул, Иерусалимын толгод дээр нударга зангидан заналхийлнэ.

³³Харагтун, Түг түмдийн БУРХАН Эзэн Аюумшигт хүчээр модны мөчрийг тас цавчина. Хэмжээгээр өндөр нь цавчигдана, Ихэмсэг хүмүүс басамжлагдана.

³⁴Тэрээр төмөр сүхээр ширэнгэ ойг цавчиж, Гайхамшигт мододтойгоо Ливан унана.