Read Ariun Bible 2013 – Ариун Библи 2013 Исаиа 16 Bible Online

Исаиа 16 - Ariun Bible 2013 – Ариун Библи 2013 bible

Исаиа 16

¹Селагаас цөл дагуу Сион охины уул хүртэлх Нутгийн захирагч уруу хурга илгээгтүн!

²Үүрнээсээ бутран зугтах шувуудын адилаар Моабын охид Арноны гарам дээр байх болно.

³“Зөвлөгөө өгч, шийдвэр гаргаач! Жин үдээр сүүдэрлэн шөнө мэт болгооч. Цөлөгдсөн хүмүүсийг нууж, Оргодлуудыг бүү барьж өгөөч!

⁴Моабын цөлөгдөгсдийг өөр дээрээ байлгаач! Тэдэнд сүйтгэгчээс нуугдах газар нь болооч!” Дарангуйлагчид эцэслэж, сүйрэл зогсож, Түрэмгийлэгчид газраас алга болно.

⁵Энэрэл хайраар нэгэн сэнтий босгогдож, Давидын майханд шударгаар шүүгч тэнд сууна. Тэр шударга үнэнийг хайж, Зөв явдалд эс алгуурлана.

⁶Бид Моабын бардам, хэт бардам, Ихэмсэг догшин зангийн тухай сонссон билээ. Хоосон сайрхал нь хуурамч юм.

⁷Тиймээс Моаб Моабын төлөө орилно. Хүн бүр орилно. Чи Кир-харасетийн үзмийн боовны төлөө Бүрмөсөн цочирдон гашуудна.

⁸Учир нь Хешбоны талбай, Сибмагийн усан үзэм хатав. Иазер хүрч, цөл хүртэл тархсан нахиа нь сунаж, Далайг өнгөрсөн усан үзмийн шилмэл ороонгыг Үндэстнүүдийн эзэд дэвслэв.

⁹Тиймээс Би Иазер уйлах лугаа адил, Сибмагийн усан үзмийн төлөө гашуудан уйлна. Өө, Хешбон, Өө, Елеале! Зуны жимсний чинь дээр, Хөсөр унасан ургацын чинь дээр хадах уухайн төлөө Би нулимсаараа та нарыг услах болно.

¹⁰Би уухайг нь зогсоосон учир Үржил шимт газраас баяр хөөр, наргиан нь алга болов. Усан үзмийн тариалангийн дотор ч Баяр хөөртэй дуу чимээ, хашхирах шуугиангүй болж, Дарс шахуургад гишгэгчид үзэм гишгэхээ болив.

¹¹Тиймээс дотор бие минь Моабын төлөө, Дотор минь Кир-хересийн төлөө Босоо ятга мэт дэлсэнэ.

¹²Ариун шүтээндээ залбирахаар Моаб өндөрлөгт гарч ирэвч, тэр нь ямар ч тус болохгүй.

¹³Энэ нь урьд өмнө Моабын талаар айлдсан ЭЗЭНий үг юм.

¹⁴Гэвч одоо ЭЗЭН —Хөлсний ажилчны жилүүд лугаа адил гурван жилийн дотор Моабын сүр жавхлантай хамт, олон хүн нь бүгдээр доройтно. Үлдэгсэд нь өчүүхэн агаад сул дорой болно хэмээн айлдаж байна.