Read Ariun Bible 2013 – Ариун Библи 2013 Исаиа 19 Bible Online

Исаиа 19 - Ariun Bible 2013 – Ариун Библи 2013 bible

Исаиа 19

¹Египетийн тухай зөн. Үзэгтүн, ЭЗЭН хурдан үүл хөлөглөн Египет уруу ирж явна. Египетийн шүтээнүүд Түүний өмнө чичирч, Египетчүүдийн зүрх нь дотроо хайлав.

²“Би египетчүүдийг египетчүүдийн эсрэг турхирна. Тэд ах дүүгийнхээ эсрэг, Хөршийнхөө эсрэг, Хот нь хотын эсрэг, Хаанчлал нь хаанчлалын эсрэг байлдах болно.

³Египетчүүдийн сүнс нь дотроо доройтно. Би зөвлөгөөг нь самууруулахад Тэд шүтээн, үхэгсдийн сүнс, сүнс дуудагчид болон төлгөч нартай зөвлөлдөнө.

⁴Би египетчүүдийг харгис эзний гарт өгнө. Догшин хаан тэднийг захирна” гэж Түг түмдийн БУРХАН Эзэн айлдаж байна.

⁵Далайн ус ширгэж, голын ус хатаж, хуурай болно.

⁶Гол мөрнүүд өмхийрөн Египетийн сувгууд нарийсан ширгэнэ. Зэгс, хулс нь хувхайрна.

⁷Нилийн эргийн, Нилийн аман дахь өвс ургамал, Хагалсан талбай бүгд Хатаж, хийсэн алга болно.

⁸Загасчид гашуудаж Нил мөрөнд дэгээ хаягсад бүгд Уй гашуу болж, усанд тор тавигсад гутарна.

⁹Маалинга боловсруулдаг хүмүүс, Нарийн зотон нэхэгчид ч ичих болно.

¹⁰Багананууд нь бяцлагдан Хөлсний бүх ажилчин сэтгэлээр унана.

¹¹Зоаны ноёд үнэхээр мунхаг хүмүүс болов. Фараоны хамгийн мэргэн зөвлөгчдийн зөвлөгөө ч тэнэг болов. “Би мэргэний хүү, эртний хаадын хүү” гэж Чи Фараонд яаж хэлж чадах юм бэ?

¹²Тэгвэл танай мэргэн хүмүүс хаана байна? Түг түмдийн ЭЗЭН Египетийн эсрэг юу төлөвлөснийг Тэд ойлгож мэдээд та нарт хэлэг.

¹³Зоаны ноёд мунхаглан үйлдэж, Мемфисийн ноёд хууртагдлаа. Овгуудынх нь булангийн чулуу бологсод Египетийг төөрүүлэв.

¹⁴ЭЗЭН түүний дотор Самуурлын сүнсийг цутгав. Тэд Египетийн бүх үйлсийг нь Бөөлжсөндөө хутгалдан согтуу хүн гуйвдаг шиг Төөрөгдөлд оруулав.

¹⁵Толгой болон сүүл, Далдуу модны мөчир зэгс зэрэг ямар ч ажил Египетэд бүтэлгүй болно.

¹⁶Тэр өдөр египетчүүд эм хүн шиг болно. Тэдний дээгүүр даллах түг түмдийн ЭЗЭНий мутрын хөдөлгөөнөөс айж, чичирнэ.

¹⁷Иудагийн газар Египетэд айдас болно. Тэдний эсрэг төлөвлөж буй түг түмдийн ЭЗЭНий зорилгоос болж түүнийг дурссан хүн бүр айдаст автана.

¹⁸Тэр өдөр Египетийн нутгийн таван хот Канааны хэлээр ярьж, түг түмдийн ЭЗЭНд тангараг өргөнө. Энэ хотуудын нэг нь Нарны хот хэмээн нэрлэгдэнэ.

¹⁹Тэр өдөр Египетийн нутгийн төвд ЭЗЭНд тахилын ширээ засагдах бөгөөд хил хязгаарынх нь дэргэд ЭЗЭНд багана босгогдоно.

²⁰Энэ нь Египетийн нутагт түг түмдийн ЭЗЭНий тэмдэг, гэрч болно. Учир нь тэд дарангуйлагчдаас болж ЭЗЭНд хашхирна. Тэр тэдэнд Аврагч, Хүчит Нэгэнийг илгээнэ. Тэр тэднийг чөлөөлнө.

²¹Тэгээд ЭЗЭН Өөрийгөө Египетэд мэдүүлж, тэр өдөр египетчүүд ЭЗЭНийг мэдэх болно. Тэр ч байтугай тэд нядлах тахил, өргөл өргөн мөргөж, ЭЗЭНд ам өчиг өгч түүнийгээ биелүүлнэ.

²²ЭЗЭН Египетийг цохино. Цохих боловч эдгээнэ. Иймээс тэд ЭЗЭНд эргэвэл, Тэр тэдэнд хариулан тэднийг эдгээнэ.

²³Тэр өдөр Египетээс Ассири хүрэх их зам бий болж, ассиричууд Египет уруу, египетчүүд Ассири уруу явж, египетчүүд ассиричуудтай хамт мөргөх болно.

²⁴Тэр өдөр Израиль нь Египет, Ассирийн хамт гурав дахь болж, дэлхийн төв дэх ерөөл болно.

²⁵Тэднийг ерөөсөн түг түмдийн ЭЗЭН “Ард түмэн минь болох Египет, мутрын минь бүтээл болох Ассири, өв минь болох Израиль ерөөлтэй” гэж айлдана.