Read Ariun Bible 2013 – Ариун Библи 2013 Исаиа 21 Bible Online

Исаиа 21 - Ariun Bible 2013 – Ариун Библи 2013 bible

Исаиа 21

¹Тэнгис хавийн зэлүүд газрын тухай зөн. Өмнөдийн нутгаар дайран өнгөрөх хуй салхи, Цөлөөс аймшигт газраас ирнэ.

²Надад аймшигт үзэгдэл үзэгдэв. Урвагч нь урвасаар, Сүйтгэгч нь сүйтгэсээр байна. Елам аа, давш! Медиа аа, бүслэгтүн! Түүний учруулсан бүх шаналлын төгсгөлийг Би хийлээ.

³Үүнээс болж ууц минь бүхэлдээ өвдөн Төрөх эмэгтэйн өвдөлт мэт хүчтэй өвчинд баригдав. Би бөгтийснөөсөө болж сонсож эс чадав, Айснаасаа болж харж үл чадав.

⁴Зүрх минь чичрэн айдас намайг эзлээд Хүсэн тэмүүлсэн бүрэнхий минь Аймшиг болон хувирав.

⁵Тэд ширээ засаж, бүтээлэг дэлгээд, идэж ууна. “Жанжингууд аа, босогтун. Бамбайнуудаа тослогтун”

⁶Тиймээс Эзэн надад айлдан, “Яв. Манаач тавь. Тэр юу үзсэнээ илтгэг.

⁷Тэр морьтонгууд, тэрэгтэнгүүд, илжиг ба тэмээн цувааг хармагцаа Маш анхааралтай, сонор сэрэмжтэй байгтун” гэв.

⁸Тэгээд манаач ийн хашхиран: “Өө, Эзэн, би өдрөөр үргэлж харуулын цамхаг дээр зогсож байна. Шөнө бүр би манааны байрандаа байрлаж байна.

⁹Хараач, тэрэг, морьтой хүн хосоороо айсуй.” Нэг нь “Вавилон унав, унав. Бурхдынх нь бүх хөрөг газар сайгүй хэвтэнэ” гэж хэлнэ.

¹⁰Үтрэм дээр цохигдсон ард түмэн минь! Израилийн Бурхан, түг түмдийн ЭЗЭНээс Юу сонссоноо би та нарт мэдүүлж байна.

¹¹Едомын тухай зөн. Сеирээс нэгэн хүн намайг дуудсаар “Манаач аа, шөнө хэр өнгөрөв? Манаач аа, шөнө хэр өнгөрөв?” гэв.

¹²Манаач хариулж “Өглөө болж байна, гэвч шөнө болно. Та нар асуумаар бол асуу л даа. Дахин буцаж ир гэв.

¹³Арабын тухай зөн. Деданчуудын жинчид ээ! Та нар Арабын шигүү ойд хоноглох ёстой.

¹⁴Темагийн нутгийн оршин суугчид аа, Цангасанд нь ус авчирч, Оргодлуудыг талхтай угтагтун!

¹⁵Учир нь тэд илднээс, далайсан илднээс, Татсан нумаас, дайны дарамтаас зугтсан юм.

¹⁶Эзэн үүнийг надад айлдав. “Хөлсний хүний жилүүд лугаа адил нэг жилийн дотор Кедарын бүх сүр жавхлан үгүй болно.

¹⁷Кедарын хөвгүүдийн хүчит эрсийн үлдсэн тоо нь цөөн байх болно” гэж Израилийн Бурхан ЭЗЭН айлджээ.”