Read Ariun Bible 2013 – Ариун Библи 2013 Исаиа 23 Bible Online

Исаиа 23 - Ariun Bible 2013 – Ариун Библи 2013 bible

Исаиа 23

¹Тирийн тухай зөн. Таршишийн хөлөг онгоц оо, уйлагтун! Тир устаж, орон байр, орогнох газаргүй болов. Үүнийг Кипр орноос тэдэнд мэдэгдэв.

²Эргийн оршин суугчид болон Сидоны наймаачид аа, Чимээгүй байгтун! Танай элч нар тэнгисийг гатлан

³Их усан дээр байсан. Тирийн орлого нь Шихорын үр тариа, Нилийн ургац, Тэр өөрөө үндэстнүүдийн зах зээлийн газар байв.

⁴Сидон оо, далайн цайзууд аа. Ичигтүн гэж далай хэлнэ. “Би хүүхэд төрүүлэх гэж өвдөөгүй. Би хөвгүүдийг өсгөж, охидыг хүмүүжүүлээгүй” гэж өгүүлэв.

⁵Египетэд мэдээ хүрмэгц, тэд Тирийн сургаас болж, ихэд шанална.

⁶Таршишийн хажуугаар өнгөрөгтүн! Эргийн суугчид аа, уйлагтун!

⁷Хаа хол газраас суурьшихаар Хөл дээрээ тэдний дүүрч ирсэн, Эртний өдрүүдээс эхтэй, Энэ та нарын наргиант хот уу?

⁸Наймаачид нь ноёд, Худалдаачид нь дэлхийд хүндлэгдсэн, Титмийн соёрхолт Тирийн эсрэг Хэн үүнийг төлөвлөсөн бэ?

⁹Бүх гоо үзэсгэлэнгийн бардамналыг гутаан Дэлхийд хүндлэгдсэн бүгдийг доромжлохын тулд Түг түмдийн ЭЗЭН үүнийг төлөвлөжээ.

¹⁰Таршишийн охид оо, Нил мөрөн мэт нутгаараа дайран өнгөр! Тэнд ямар ч боомт алга.

¹¹Тэр мутраа далайн дээгүүр сунгаж, Хаанчлалуудыг донсолгов. ЭЗЭН, Канааны цайзуудыг Эвдэх тушаал буулгав.

¹²Тэр “Сидоны гутаагдсан, онгон охин минь. Чи цаашид хөөрөн баясахгүй. Бос, Киприйг дайран өнгөр. Тэнд ч гэсэн чи Ямар ч амралт олохгүй” гэж айлдав.

¹³Халдеичуудын нутгийг харагтун. Энэ ард түмэн үгүй болжээ. Ассири түүнийг цөлийн амьтдын байр болгов. Тэд бүслэлтийн цамхгууд босгож, тэндхийн орд харшуудыг дээрэмдэж, балгас болгосон.

¹⁴Таршишийн хөлөг онгоцууд аа, уйлагтун! Учир нь танай бэхлэлт устсан.

¹⁵Тэр өдөр ирэхэд, нэг л хааны өдрүүд мэт далан жилийн туршид Тир мартагдана. Далан жилийн эцэст янхны дуунд гардаг шиг зүйл Тирд тохиолдоно.

¹⁶“Мартагдсан янхан аа. Өөрийгөө сануулахын тулд босоо ятгаа аваад, Хотоор явж, сайхан тоглож, олон дуу дуулаач!”

¹⁷Далан жилийн эцэст ЭЗЭН Тирд айлчилна. Тэгэхэд Тир янхан болж, биеэ үнэлсний хөлсийг дахин авч, газрын гадарга дээрх дэлхийн бүх хаанчлалтай садарлах болно.

¹⁸Түүний ашиг, биеэ үнэлсний хөлс нь ЭЗЭНд ариун болно. Орлого нь нөөцлөгдөхгүй, хадгалагдахгүй, харин ЭЗЭНий өмнө амьдрах хүмүүсийн сайн хоол, сайхан хувцсанд зориулагдана.