Read Ariun Bible 2013 – Ариун Библи 2013 Исаиа 24 Bible Online

Исаиа 24 - Ariun Bible 2013 – Ариун Библи 2013 bible

Исаиа 24

¹Үзэгтүн, ЭЗЭН газрыг хоосруулан хөмрөх гэж байна. Тэрээр газрын гадаргууг эвдэж, оршин суугчдыг нь тараана.

²Хүмүүс тахилч шиг, боол эзэн шигээ, шивэгчин хатагтай шигээ, худалдан авагч нь худалдагч шиг, зээлдэгч нь мөнгө хүүлэгч шиг, өртөн нь авлагатан мэт байх болно.

³Дэлхий бүрэн хоосрон, бүрэн тоногдоно. Учир нь ЭЗЭН энэ үгийг айлдсан юм.

⁴Дэлхий гашуудан хувхайрна. Ертөнц гаслан хувхайрна. Дэлхийн хүмүүст өргөмжлөгдсөн нь алга болно.

⁵Дэлхий өөрийн оршин суугчдын дор бузарлагдав. Учир нь тэд хуулиудыг зөрчиж, тогтоолуудыг өөрчлөн мөнхийн гэрээг эвдэв.

⁶Иймээс дэлхийг хараал идэж, түүн дээр амьдрагчид нь гэм нүгэлд автав. Иймээс дэлхийн оршин суугчид нь шатаагдаж, цөөхөн хүн үлдэв.

⁷Шинэ дарс хатаж, Усан үзмийн мод нь гандана. Наргианч зүрхтэй бүх хүн санаа алдана.

⁸Бөмбөрийн хөгжөөнт дуу тасран, Наргигчдын шуугиан зогсож, Ятгын баясгалант эгшиг тасарна.

⁹Тэд дарс ууж дуулахаа болино. Сархад уугчдад энэ нь гашуун болно.

¹⁰Самуурсан хот нурж, Байшин бүр хаагдаж, хэн ч үл орно.

¹¹Гудамжинд усан үзмийн дарсны төлөө орилолдон, Бүх баяр баясгалан уйтгар гуниг болов. Дэлхийн зугаа цэнгэл арилав.

¹²Хотын дотор сүйрэл үлдэж, Гулдан хаалга нь эвдрэв.

¹³Тэгээд энэ нь чидун модыг доргиох шиг Усан үзэм хураалтын дараах хаягдал түүх лугаа адил Дэлхийн төвд, хүмүүсийн дунд байх болно.

¹⁴Тэд дуугаа өргөж, баяртайгаар хашхирна. Тэд тэнгисээс ЭЗЭНий сүр жавхланг бахдан хашхирна.

¹⁵Ийм учраас дорно зүгт ЭЗЭНийг алдаршуулж, Далайн арлуудад Израилийн Бурхан ЭЗЭНий нэрийг алдаршуулагтун!

¹⁶Дэлхийн хязгаараас “Зөвт Нэгэнд алдар нь байг” гэх дуунуудыг бид сонсож байна. Гэвч би “Би харамсаж байна. Би харамсаж байна. Золгүй еэ, урвагч урваж, Урвагч нь дэндүү урваж байна” гэж хэлэв.

¹⁷Дэлхийн оршин суугч аа, Аймшиг, нүх, занга нь дээр чинь байна.

¹⁸Аймшгийн дуунаас зугтагч нь нүхэнд унана. Нүхнээс авиран гарагч нь занганд орно. Учир нь орой дээрх цонхнууд нээгдэж, Дэлхийн сууриуд ганхаж байна.

¹⁹Газар бутран эвдэрч, Газар хагарч, газар хүчтэй ганхана.

²⁰Дэлхий архичин шиг гуйвж, Овоохой шиг дайвалзана. Учир нь гэмт үйлдэл нь улам хүнд болж байгаа тул тэр унаж, Дахин хэзээ ч үл босно.

²¹Тэр өдөр өндөрт буй тэнгэрийн дайчид, Дэлхий дээрх газрын хаадыг ЭЗЭН шийтгэнэ.

²²Тэд гяндан дахь хоригдлууд мэт Хамтдаа бөөгнөрөөд шоронд хоригдоно. Олон хоногийн дараа тэд шийтгэгдэнэ.

²³Тэгэхэд сар ичиж, нар гутна. Учир нь түг түмдийн ЭЗЭН Сион уулан дээр Иерусалимын дотор хаанчилж, Ахмадуудынхаа өмнө Сүр жавхлангаа байлгана.