Read Ariun Bible 2013 – Ариун Библи 2013 Исаиа 26 Bible Online

Исаиа 26 - Ariun Bible 2013 – Ариун Библи 2013 bible

Исаиа 26

¹Тэр өдөр Иудагийн нутагт энэ дуу дуулагдана. “Бидэнд хүчирхэг хот байна. Авралд зориулан Тэрээр Хэрэм, бэхлэлт босгожээ.

²Үүд хаалгаа нээн итгэмжит байдлыг сахигч, Зөвт үндэстнийг оруул!

³Танд итгэдгийн улмаас Санаа бат хүмүүнийг Та амрын амар байлгана.

⁴ЭЗЭНд үүрд итгэгтүн! Учир нь ЭЗЭН БУРХАН дотор Мөнхийн хад бий.

⁵Өндөрт залрагчдыг Тэрээр номхтгож, Халдашгүй хотыг доройтуулан Газарт унаган шороонд шиднэ.

⁶Түүнийг зүдрэгсэд, ядуусын хөл гишгэлж дэвсэлнэ”.

⁷Зөв шударгын зам нь чигч шулуун ажээ. Аяа Зөвт Нэгэн ээ, Зөвт хүний замыг тэгшхэн тавиач.

⁸ЭЗЭН минь, Таны шүүлтийн замаар алхахдаа Таныг хүсэн хүлээнэ. Таны нэр, Таныг дурсан магтах нь Сэтгэлийн маань хүсэл болой.

⁹Шөнөөр сэтгэл минь Таныг хүсэмжлэн сүнс минь Таныг шаргуу эрэлхийлнэ. Дэлхий Таны шүүлтийг эдлэх үед Ертөнцийн суугчид зөв явдалд суралцана.

¹⁰Буруу муу хүн энэрэл хайрыг ававч Зөв явдлыг сурдаггүй. Зөв шударгын газарт бурууг тэрээр үйлдэн ЭЗЭНий цог жавхланг эс олж харна.

¹¹ЭЗЭН, Таны мутар өргөгдөвч тэд үл үзнэ. Хүмүүсийн төлөөх зүтгэлээ Та тэдэнд харуулж, Тэднийг ичээгээч. Үнэхээр Таны дайснуудыг гал залгина.

¹²ЭЗЭН, Та мөн бидний төлөө бүх үйлсийг минь бүтээсэн учраас Та бидэнд энхийг тогтооно.

¹³Аяа Бурхан ЭЗЭН, Танаас өөр эзэд биднийг захирсан боловч Зөвхөн Танаар дамжуулан Нэрийг тань дурдах болно.

¹⁴Үхдэл нь амьдрахгүй, сүүдрүүд босохгүй. Тиймээс Та тэднийг шийтгэн устгаж, Тэдний аливаа дурсамжийг арилгасан.

¹⁵ЭЗЭН минь, Та үндэстнийг олшруулж, Үндэстнийг өсгөж, Та алдаршлаа. Газрын бүх хязгаарт Та хүрсэн.

¹⁶ЭЗЭН минь, тэд шаналахдаа Таныг эрсэн. Таны гэсгээлт дээр нь байхад Шивнэсэн залбирал л гарна.

¹⁷Жирэмсэн эмэгтэй төрөхдөө зовон, Өвдөх шаналлаасаа болж орилдог шиг ЭЗЭН минь бид чинь Таны өмнө ийм л байсан.

¹⁸Жирэмслэн өвдсөн боловч Салхи төрүүлж байгаа мэт байна. Бид дэлхийн төлөөх чөлөөлөлтийг гүйцээж чадсангүй.[13] Ертөнцийн суугчид ч төрүүлсэнгүй.

¹⁹Таны үхэгсэд амилж, Цогцос минь босно. Тоосонд хэвтэгчид ээ! Бос, баярлан хашхирагтун. Таны шүүдэр нь гэрлүүдийн шүүдэр мэт билээ. Газар нь сүгүүдийг гаргана.

²⁰Ард түмэн минь, ирцгээ, Өрөөндөө ороод хаалгаа хаагтун! Уур хилэн өнгөртөл, Түр зуур нуугдагтун!

²¹Учир нь ЭЗЭН дэлхийн оршин суугчдыг Хилэнцийнх нь төлөө шийтгэхээр Өөрийнхөө газраас ирэх гэж байна. Дэлхий асгарсан цусаа илчлэн Алагдагсдыг дахин далдлахгүй.