Read Ariun Bible 2013 – Ариун Библи 2013 Исаиа 29 Bible Online

Исаиа 29 - Ariun Bible 2013 – Ариун Библи 2013 bible

Исаиа 29

¹Ариел аа, Ариел аа, Нэгэн цагт Давидын хуарагнаж байсан хот хөөрхий еэ. Жил дээр жил нэмэгтүн, Найрын дугараа тойрох болтугай!

²Би Ариелийг шахамдуулахад Чи халаглал, харууслын хот болно. Надад тэрээр Ариел шиг байна.

³Би чамайг хүрээлэх мэт байрлаж, Чамайг бүслэн, чиний эсрэг бэхлэлт босгоно. Би чиний эсрэг дайтах цамхаг босгоно.

⁴Дараа нь чамайг доош буулгана. Чи газраас ярьж, Чиний үг шороон дотроос бувтнах мэт сонсогдон, Дуу хоолой чинь газраас гарах сүнсний дуу мэт байж, Яриа чинь шорооноос шивтнэх мэт байна.

⁵Гэвч гэнэт нэгэн агшинд л Чиний үй түмэн дайсан Нарийн тоос мэт болж, Үй олон харгис хүн Хийсэн одох хальс, сүрэл мэт болно.

⁶Түг түмдийн ЭЗЭН Чамайг аянга, газар хөдлөлт, их дуу чимээ, хуй салхи, шуурга, түймэрдэгч галын дөлөөр шийтгэнэ.

⁷Ариелийн болон бэхлэлтийнх нь эсрэг байлдагч Бүх үндэстнээс цугласан үй олон ба түүнийг шахамдуулагсад нь зүүд мэт, Шөнийн үзэгдэл мэт болох болно.

⁸Өлссөн хүн идэж байна гэж зүүдлэвч, Сэрэхэд сэтгэл нь цадаагүй байдаг. Цангасан хүн ууж байна гэж зүүдлэвч, Сэрэхдээ тэр тамиргүй болж, Сэтгэл нь ундаассан хэвээр байдаг. Үүнчлэн Сион уулын эсрэг байлдагч Бүх үндэстний үй олон тийм болно.

⁹Саатагтун хүлээгтүн! Өөрсдийгөө сохолж, хараагүй бол! Тэд дарснаас биш атал согтон, Сархаднаас биш атал гуйвж байна.

¹⁰Учир нь ЭЗЭН та нар дээр Гүн нойрны сүнсийг цутгаж, Эш үзүүлэгчид та нарын нүдийг хааж, Үзмэрчид та нарын толгойг битүүлэв.

¹¹Зөн бүр нь та нарт лацдуулсан номын үгс мэт болно. Тэд үүнийг номч хүнд өгч, “Үүнийг уншиж хайрла” гэхэд тэр “Би чадахгүй. Яагаад гэвэл энэ нь лацдуулсан” гэж хэлнэ.

¹²Дараа нь тэр номыг бичиг мэдэхгүй нэгэнд өгч, “Үүнийг уншиж хайрла” гэхэд тэр “Би уншиж мэдэхгүй” гэж хариулна.

¹³Эзэн “Энэ ард түмэн амаараа ойртон, Уруулаараа л Намайг хүндлэвч, Зүрх нь Надаас алс хол байдаг. Тэд Намайг эмээн хүндлэхэд хүний тушаалаар суралцжээ.

¹⁴Тиймээс үзэгтүн. Би энэ ард түмний дотор ер бусын гайхамшигт, Гайхалтай зүйлийг дахин бүтээнэ. Мэргэдийн нь мэргэн нь мөхөж, Ухаантнуудаас ухаан ялгах чадвар нь нууцлагдана” гэв.

¹⁵Өөрсдийн санаагаа ЭЗЭНээс ор тас нууцалж, Үйлсээ харанхуй газарт хийж, “Хэн биднийг харах юм бэ? Хэн биднийг мэдэх вэ?” гэж хэлдэг хүмүүс хөөрхий еэ.

¹⁶Та орвонгоор нь эргүүлжээ! Ваарчинг шавартай адилтган үзэж болох уу? Бүтээгдсэн зүйл нь бүтээгчдээ “Тэр намайг хийгээгүй” гэх юм гэж үү? Ваар нь ваарчиндаа хандан “Тэр мулгуу хүн” гэж өгүүлэх үү?

¹⁷Өчүүхэн хугацааны дараа Ливан нь үржил шимтэй талбай болон хувирч, Үржил шимтэй талбай нь Ой хэмээн тооцогдоно.

¹⁸Тэр өдөр дүлий нь номын үгсийг сонсож, Бүрэнхий харанхуйгаас Сохруудын нүд нь харах болно.

¹⁹Номой нэгний баяр хөөр ЭЗЭНий дотор өсөн нэмэгдэж, Хүн төрөлхтний үгээгүйчүүд Израилийн Ариун Нэгэндээ баясна.

²⁰Учир нь харгислагчдын төгсгөл ирж, Элэглэгчид алга болж, Ёс бусыг үйлдэхийг санаархагч Бүгд таслагдана.

²¹Үгээр хүнийг буруутгагчид, Үүд хаалган дээр шүүгч нэгнийг занганд оруулагчид, Худал баримтаар зөвтнийг буруутан болгогчид таслагдана.

²²Ийм учраас Абрахамыг зольсон ЭЗЭН, Иаковын гэрийн тухай айлдахдаа “Одоо Иаков ичихгүй, нүүр нь улайхгүй болов.

²³Харин мутрын минь бүтээл болох хүүхдүүдээ Тэр өөрийнхөө дотор харахдаа Тэд нэрийг минь нандигнана. Үнэхээр тэд Иаковын Ариун Нэгэнийг нандигнан Израилийн Бурханы аюумшиг дотор зогсоно.

²⁴Сүнсээр төөрөгчид үнэнийг мэдэж, Шүүмжлэгчид зааврыг хүлээн авна” гэв.