Read Ariun Bible 2013 – Ариун Библи 2013 Исаиа 32 Bible Online

Исаиа 32 - Ariun Bible 2013 – Ариун Библи 2013 bible

Исаиа 32

¹Үзэгтүн, хаан нь үнэн зөвөөр хаанчлан Ноёд нь шударгаар захирна.

²Хүн бүр салхинаас хоргодох газар, Шуурганаас халхлах халхавч, Хуурай газрын усны суваг, Ангасан газар дахь өндөр хадны сүүдэр адил байх болно.

³Тэгээд хараатай хүмүүсийн нүд хаагдахгүй, Сонсох чихтэй нь сонсох болно.

⁴Адгуу хүний зүрх Мэдлэгийг ялган таньж, Хэлгий хүний хэл нь Тод ярих гэж яарна.

⁵Цаашид тэнэгийг сурвалжит хүн гэж дуудахгүй, Зальт этгээдийг өглөгч гэхгүй.

⁶Учир нь тэнэг хүн утгагүй юм ярьдаг. Тэр өлсгөлөн хүний сэтгэлийг хоосруулж, Ундаасагчийг ундаар дутаахын тулд ЭЗЭНий эсрэг буруу ярьж, Жигшүүрт явдлыг үйлдэхээр Зүрх нь ёс бусыг зохиодог.

⁷Зальт этгээдийн зэвсэг нь ёрын муу билээ. Хэдийгээр ядуу нэгэн шударгыг яривч, Худал хуурмаг үгсээр Үгээгүйчүүдийг хөнөөхийн тулд Булай санааг тэрээр зохиодог.

⁸Харин сурвалжит хүн Уужим сэтгэж, түүн дээрээ тогтдог.

⁹Маадгар эмс ээ. Босож, дуу хоолойг минь сонс, Ихэрхүү охид оо, үгэнд минь чих тавь!

¹⁰Жил гаруйхны дотор Ихэрхүү та нар зовох болно. Учир нь усан үзмийн ургац хураалт төгсөж, Жимс хураалт болохгүй.

¹¹Маадгар эмс ээ, цочирд, Бардам охид оо, зов! Хувцсаа тайлан нүцгэлж, Бэлхүүсээрээ таар ороо!

¹²Үржилтэй талбай, Шүүслэг усан үзмийн төлөө цээжээ дэлд!

¹³Ард түмний минь нутаг, Сундуу бут, өргөст бутаар дүүрэх газрын төлөө, Баясгалант хот, жаргалтай бүх гэрүүдийн төлөө гашууд!

¹⁴Учир нь орд харш хаягдан Их шуугиант хот мартагдан Хэрэм цамхгууд нь үүрд Малын бэлчээр, хулангийн хороо болно.

¹⁵Өндрөөс, дээрээс маань Сүнс цутгах хүртэл, Зэлүүд газар нь үржил шимтэй талбай болж, Үржил шимтэй талбай нь ой мод мэт болтол Тийм байх болно.

¹⁶Тэгээд шударга ёс нь цөлд оршиж, Үнэн зөв нь үржилтэй талбайд байна.

¹⁷Үнэн зөвийн үйлс нь амар тайван байж, Үнэн зөвийн үр дүн нь Үүрдийн амар амгалан, аюулгүй байдал болно.

¹⁸Ард түмэн минь амар тайван орчинд, Аюулгүй гэрүүдэд, ажин түжин газарт амьдарна.

¹⁹Ойд мөндөр орж Хот доош шигдэх болно.

²⁰Бүх усны дэргэд үр суулгаж, Шар, илжгээ чөлөөтэй идээшлүүлэх Та нар юутай ивээлтэй байх бол!