Read Ariun Bible 2013 – Ариун Библи 2013 Исаиа 34 Bible Online

Исаиа 34 - Ariun Bible 2013 – Ариун Библи 2013 bible

Исаиа 34

¹Үндэстнүүд ээ, сонсохоор ойртогтун! Ард түмнүүд ээ, чагнагтун! Газар ба түүнийг дүүргэгч бүхэн, Ертөнц ба түүнээс гарсан бүхэн сонсогтун!

²Учир нь ЭЗЭНий зэвүүцэл Бүх үндэстний эсрэг байж, Тэрээр уур хилэнгээ бүх цэргийнх нь эсрэг гаргаж, Тэднийг бүрмөсөн устгалаа. Тэднийг Тэр алуурчинд өгсөн болой.

³Алагдагсдыг нь гаргаж хаяхад Хүүр нь өмхийрч, Цус нь ууланд нэвчив.

⁴Тэнгэрийн бүх эрхэс устаж, Тэнгэрс ч хуйлмал ном мэт хуйлагдах болно. Бүх эрхэс нь усан үзмийн ороонгын навч шиг, Инжрийн модны инжир хатаж унадаг шиг унана.

⁵Учир нь илд минь тэнгэрт согтоод, Үзэгтүн, Едомын дээрээс, Миний шүүлтийн тулд цээрлэл болсон Ард түмний дээр энэ нь бууна.

⁶ЭЗЭНий илд цусаар бялхсан байна. Илд нь хурга ямааны цусаар дүүрч, Хуцын бөөрний өөхөнд цадав. Учир нь ЭЗЭН Бозрад тахилгалж, Едомын газарт их нядалгаа хийнэ.

⁷Бас зэрлэг үхэр тэдэнтэй, Залуу бух хүчит нэгэнтэй хамт унаж, Газар нь цусаар нэвчиж, Шороо нь өөхтэй хутгалдаж тослог болно.

⁸Учир нь Сионд хариуг нь өгөх жил, Өшөө авалтын өдөр ЭЗЭНд бий.

⁹Едомын урсгалууд нь давирхай болж, Хөрс нь шатаж буй хүхэр болон хувирах бөгөөд Газар нь шатаж буй давирхай болно.

¹⁰Тэр нь өдөр ч, шөнө ч үл унтран, Утаа нь мөнхөд суунаглана. Энэ нь үеийн үед эзгүйрч Үүрд мөнхөд түүгээр хэн ч өнгөрөхгүй.

¹¹Харин тэнд бэгбаатар, зараа нутаглан Ууль, хэрээ үүрлэнэ. Тэр Едомын дээгүүр Эзгүйрлийн шугам, хоосролын хүндрүүлэгч татна.

¹²Едомын язгууртнуудын дотроос Хаан гэж дуудагдах хүнгүй болж, Ноёд нь бүгдээрээ юу ч биш болно.

¹³Бэхлэгдсэн цамхгууд ба хотуудынх нь дотор Сундуу бут, өргөст халгай ургаж, Цөөвөр чонын орогнох газар, Тэмээн хяруулын нутаг болно.

¹⁴Тэнд цөлийн араатнууд зэрлэг ноходтой тааралдаж, Годрон буг ч мөн ижлээ дуудан орилно. Тийм ээ, шөнийн мангас[16] тэнд суурьшиж, Амрах газраа олно.

¹⁵Тэнд суман могой үүрээ засаж Өндгөө хэвтэн дарж, Тэднийгээ нөмөр дороо цуглуулна. Тийм ээ, тас төрөл төрлөөрөө цуглана.

¹⁶ЭЗЭНий номоос олоод уншигтун! Тэдгээрийн нэг нь ч алга болохгүй, Нэг нь ч ижлээ алдахгүй. Учир нь Түүний ам айлдаж, Сүнс нь тэднийг цуглуулсан юм.

¹⁷Тэр тэдний төлөө шавга хаясан. Мутар нь үүнийг тэдэнд Хэмжээгээр нь хувааж өгсөн. Тэд энэ газрыг мөнхөд эзэмшиж, Үеийн үед энд орших болно.