Read Ariun Bible 2013 – Ариун Библи 2013 Леви 14 Bible Online

Леви 14 - Ariun Bible 2013 – Ариун Библи 2013 bible

Леви 14

²Арьсны халдварт өвчтөнийг цэвэршүүлэх өдрийн хууль энэ болой. Түүнийг тахилч уруу авчирч,

³тахилч хуарангаас гадагш гарна. Ингээд тахилчийн үзэхэд хэрэв арьсны халдварт өвчтөний арьсны халдварт өвчин эдгэсэн байх аваас

⁴хоёр амьд цэвэр шувуу, хуш мод, улаан хүрэн утас, балуун зэргийг цэвэршигчийн төлөө авч явахыг тахилч тушаана.

⁵Нэг шувууг урсгал усны дээгүүр, шавар саванд нядлахыг тахилч тушаагаад,

⁶харин өөрөө амьд шувууг хуш мод, улаан хүрэн утас, балуунтай хамт авч, эдгээрийг болон амьд шувууг урсгал усны дээгүүр нядлагдсан шувууны цусанд дүрнэ.

⁷Тэгээд арьсны халдварт өвчнөөс цэвэршигч уруу үүнийг долоон удаа цацаад, тэр хүнийг цэвэр хэмээн тодорхойлно. Амьд шувууг хээр талд суллан тавина.

⁸Ингээд цэвэршигч нь хувцсаа угаан бүх үсээ хусаж, усанд орж цэвэр болно. Тэгээд тэр хуаранд орж, долоо хоногийн турш майхныхаа гадна байг.

⁹Долоо дахь өдөр тэрээр бүх үсээ хусна. Тухайлбал толгойн үс, сахал, хөмсөг төдийгүй хамаг үсээ хусаад, хувцсаа угаан усанд биеэ угааж цэвэр болно.

¹⁰Найм дахь өдөр нь тэрээр согоггүй хоёр эр хурга, согоггүй нэг охин төлөг болон идээн өргөлд зориулан тосонд багсарсан ефагийн аравны гурав хэмжээтэй сайн гурил, нэг лог тос авчрах бөгөөд

¹¹цэвэршигчийг цэвэр гэсэн тахилч эдгээр зүйлийг түүнтэй хамт ЭЗЭНий өмнө, уулзалтын майхны үүдэнд авчраг.

¹²Тэгээд тахилч нэг эр хургыг нэг лог тостой хамт авчран ялын тахилд өргөөд, эдгээрийг даллах өргөл болгон ЭЗЭНий өмнө даллах болой.

¹³Тэрээр нүглийн болон шатаалт тахил нядалдаг газар буюу ариун газарт эр хургыг нядална. Учир нь нүглийн тахилын адил ялын тахил нь тахилчийнх бөгөөд ариунаас ариун болой.

¹⁴Тахилч ялын тахилын цуснаас авч, цэвэршигчийн баруун чихний гэдсэнд, баруун гарынх нь эрхий хуруу, баруун хөлийнх нь эрхий хуруунд түрхэнэ.

¹⁵Тахилч нэг лог тосноос авч, зүүн гарынхаа алганд цутгаад,

¹⁶баруун гарынхаа хурууг зүүн алган дахь тосонд дүрж, тосыг хуруугаараа ЭЗЭНий өмнө долоон удаа цацна.

¹⁷Тахилч алган дахь үлдсэн тосноосоо цэвэршигчийн баруун чихний гэдсэнд, баруун гарынх нь эрхий хуруу, баруун хөлийнх нь эрхий хуруунд, ялын тахилын цусан дээгүүр давхар түрхэнэ.

¹⁸Харин тахилчийн алганд үлдсэн тосыг цэвэршигчийн толгой дээр асгана. Ийнхүү тахилч түүнд ЭЗЭНий өмнө эвлэрүүллийг хийнэ.

¹⁹Тахилч нүглийн тахил өргөж, бузраасаа цэвэршиж байгаа нэгэнд эвлэрүүллийг хийнэ. Тэгээд тэрээр шатаалт тахилыг нядалж,

²⁰тахилын ширээн дээр шатаалт тахил болон идээн өргөлийг өргөнө. Ийнхүү тахилч түүнд эвлэрүүллийг хийж, тэр хүн цэвэр болно.

²¹Гэвч тэр хүн ядуу бөгөөд үүнийг олж авах чадалгүй байх аваас тэрээр өөртөө эвлэрүүллийг хийлгэх даллах өргөлд зориулан нэг эр хургыг ялын тахил, идээн өргөлд зориулан тосонд багсарсан ефагийн аравны нэгэн сайн гурил, нэг лог тос авах ёстой.

²²Мөн гарынхаа олж авах чадлын хэрээр хоёр хүүрзгэнэ эсвэл хоёр өсвөр тагтаа авах ёстой бөгөөд нэг нь нүглийн тахил, нөгөө нь шатаалт тахил болой.

²³Тэгээд найм дахь өдөр тэрээр эдгээрийг цэвэршилдээ зориулан ЭЗЭНий өмнө уулзалтын майхны үүдэнд тахилчид авчрах болой.

²⁴Тахилч ялын тахилын хурга, нэг лог тосыг авч, даллах өргөл болгон ЭЗЭНий өмнө даллана.

²⁵Тэрээр ялын тахилын хургыг нядалж ялын тахилын цуснаас аваад, цэвэршигчийн баруун чихний гэдсэнд, баруун гарынх нь эрхий хуруу, баруун хөлийнх нь эрхий хуруун дээр түрхэнэ.

²⁶Тахилч зүүн гарынхаа алганд тосноос хийгээд,

²⁷баруун гарынхаа хуруугаар зүүн алган дахь тосноос долоон удаа ЭЗЭНий өмнө цацна.

²⁸Тахилч алгандаа байгаа тосноос цэвэршигчийн баруун чихний гэдсэнд, баруун гарынх нь эрхий хуруу, баруун хөлийнх нь эрхий хуруун дээр, ялын тахилын цусан дээр давхар түрхэнэ.

²⁹Тэгээд ЭЗЭНий өмнө эвлэрүүллийг хийхийн тулд алгандаа үлдсэн тосыг тахилч цэвэршигчийн толгой дээр асгана.

³⁰Тэрээр олж авах боломжийнхоо хэрээр нэг хүүрзгэнэ эсвэл өсвөр тагтаа нэгийг өргөнө.

³¹Гарынхаа олж авах чадлын хэрээр, нэгийг нь нүглийн тахил, нөгөөг нь шатаалт тахил болгон идээн өргөлийн хамт өргөх болой. Ийнхүү цэвэршигчид зориулан тахилч ЭЗЭНий өмнө эвлэрүүллийг хийнэ.

³²Энэ нь цэвэршилд зориулах чадал боломж хомс, арьсны халдварт өвчний шархтай нэгний тухай хууль болой гэв.

³³ЭЗЭН, Мосе Аарон нартай цааш нь ярин айлдахдаа —

³⁴Миний та нарт эзэмшил болгон өгөх Канаан нутагт та нар орохдоо, та нарын эзэмших нутагт Би аливаа байшинд хөгцний толбыг тавихад

³⁵тэр байшинг өмчлөгч нэгэн нь ирж, тахилчид “Байшинд минь толботой адил зүйл надад харагдав” гэж хэлэх ёстой.

³⁶Тэгэхэд байшин доторх бүх зүйлийг бузарт тооцохгүйн тулд уг толбыг үзэхээр тахилч дотогш орохын өмнө байшинг суллахыг тушаана. Үүний дараа тахилч байшинг үзэхээр дотогш орно.

³⁷Тэрээр толбыг харахад хэрэв байшингийн ханан дээрх толбо ногоовтор эсвэл улбар хонхор бөгөөд хананд гүн суусан харагдах аваас

³⁸тахилч байшингийн үүдэнд гарч, уг байшинг долоо хоногоор тусгаарлана.

³⁹Тахилч долоо дахь өдөр буцаж ирээд, сайтар ажиглана. Хэрэв уг толбо байшингийн ханан дээгүүр тархсан байх аваас

⁴⁰толбо суусан чулуунуудыг салган авч хотын гадна бузар газарт хаяхыг тахилч тушаана.

⁴¹Тэр байшинг дотор талаас нь бүхэлд нь хусуулаад, хусаж авсан шохойг хотын гадна бузар газарт овоолон асгана.

⁴²Тэгээд өөр чулуунуудыг авч, тэдгээр чулууны оронд байрлуулж, өөр шохойг авч, байшинг дахин шохойдох ёстой.

⁴³Харин чулуунуудыг нь салган байшинг хусаад, дахин шохойдсоны дараа уг толбо байшинд дахин гарч ирэх аваас

⁴⁴тахилч дотогш орж, сайтар ажиглана. Хэрэв байшинд толбо тархсан байх аваас энэ нь байшин доторх хортой хөгц бөгөөд байшин бузар болой.

⁴⁵Уг байшин, түүний чулуу, мод болон бүх шаваасыг нь буулгаж, хотын гадна бузар газарт зөөн аваачих ёстой.

⁴⁶Тусгаарлаж байх үед байшинд орсон хэн боловч үдэш болтол бузар байна.

⁴⁷Байшин дотор хэвтсэн хэн боловч хувцсаа угаах ёстой. Уг байшин дотор идсэн хэн боловч хувцсаа угаах ёстой.

⁴⁸Харин тахилч дотогш орж үзэхэд, харагтун, байшинг дахин шохойдсоны дараа байшинд уг толбо тархаагүй байх аваас толбо дахин гарч ирээгүй тул тахилч тэр байшинг цэвэр гэж тодорхойлно.

⁴⁹Уг байшинг цэвэршүүлэхийн тулд тэрээр хоёр шувуу, хуш мод, улаан утас, балууныг аваад,

⁵⁰нэг шувууг урсгал усны дээгүүр шавар саванд нядалж,

⁵¹хуш мод, балуун, улаан утсыг амьд шувуутай хамт авч, нядлуулсан шувууны цусанд болон урсгал усанд дүрж байшин уруу долоон удаа цацна.

⁵²Ийнхүү шувууны цус, урсгал ус, амьд шувуу, хуш мод, балуун, улаан утсаар уг байшинг тэр цэвэршүүлнэ.

⁵³Харин амьд шувууг хотоос гадагш хээр талд суллаж тавина. Ийнхүү байшинд зориулан эвлэрүүллийг хийх бөгөөд энэ нь цэвэр болно гэв.

⁵⁴Энэ нь арьсны халдварт өвчний аливаа шинж тэмдгийн хууль бөгөөд үүнд хамуу,

⁵⁵хувцас эсвэл байшинд гарах хөгц,

⁵⁶гөвдрүү, яр, тод толбо хамаатай.

⁵⁷Эдгээрийг ямар үед бузар, ямар үед цэвэр гэдгийг заах хууль энэ болой. Энэ нь арьсны халдварт өвчний хууль юм.