Read Ariun Bible 2013 – Ариун Библи 2013 Леви 15 Bible Online

Леви 15 - Ariun Bible 2013 – Ариун Библи 2013 bible

Леви 15

¹ЭЗЭН, Мосе Аарон нарт айлдахдаа —

²Израилийн хөвгүүдтэй ярин “Аливаа хүний бие махбодоос шүүрдэс гарвал тэрээр шүүрдсийнхээ улмаас бузар болой.

³Түүний шүүрдэс ингэж бузарлана. Бие махбодоос нь шүүрдэс шүүрч байгаа эсвэл шүүрдсээ саатуулсан ч бай энэ нь түүнд бузар юм.

⁴Шүүрдэстэй хүний хэвтсэн аливаа ор бузар бөгөөд дээр нь суусан юм бүхэн бузар болой.

⁵Түүний оронд хүрсэн аливаа хүн хувцсаа угааж, усанд биеэ булхах бөгөөд үдэш болтол бузар байна.

⁶Шүүрдэстэй хүний сууж байсан зүйл дээр суусан хэн боловч хувцсаа угааж, усанд биеэ булхах ба үдэш болтол бузар байна.

⁷Шүүрдэстэй хүний бие махбодод хүрсэн хэн боловч хувцсаа угааж, усанд биеэ булхах бөгөөд үдэш болтол бузар байна.

⁸Хэрэв шүүрдэстэй хүн цэвэр байгаа нэгэн өөд нулимах аваас тэр хүн нь хувцсаа угааж, усанд булхах бөгөөд үдэш болтол бузар байна.

⁹Шүүрдэстэй хүний тохож явсан аливаа эмээл бузар болой.

¹⁰Мөн түүний доор байсан аливаа зүйлд хүрсэн хэн боловч үдэш болтол бузар байна. Эдгээрийг зөөж явсан хүн хувцсаа угааж, усанд булхах бөгөөд үдэш болтол бузар байна.

¹¹Шүүрдэстэй нэгэн гараа усанд зайлалгүйгээр хэн нэгэнд хүрсэн бол тэр хүн нь хувцсаа угааж, усанд булхах бөгөөд үдэш болтол бузар байна.

¹²Шүүрдэстэй хүний хүрсэн шавар савыг хагалж харин аливаа модон савыг усаар зайлах ёстой.

¹³Шүүрдэстэй хүн шүүрдсээсээ эдгэрч цэвэршихдээ, өөрийн цэвэршилд зориулан долоо хоногийг тоолоод хувцсаа угааж, урсгал усанд бие махбодоо булхаж цэвэр болох ёстой.

¹⁴Тэгээд найм дахь өдөр тэр өөртөө хоёр хүүрзгэнэ эсвэл хоёр өсвөр тагтаа авч, ЭЗЭНий өмнө уулзалтын майхны үүдэн дээр очин эдгээрийг тахилчид өгнө.

¹⁵Тахилч нэгийг нь нүглийн тахилд, нөгөөг нь шатаалт тахилд зориулан эдгээрийг өргөж, шүүрдсийнх нь улмаас ЭЗЭНий өмнө түүнд эвлэрүүллийг хийх ажгуу.

¹⁶Хэрэв эр хүнээс үрийн шингэн гарах аваас тэрээр бүх бие махбодоо усанд булхах бөгөөд үдэш болтол бузар байна.

¹⁷Дээр нь үрийн шингэн тогтсон аливаа хувцас эсвэл аливаа арьсыг усаар угаах бөгөөд тэр нь үдэш болтол бузар байна.

¹⁸Хэрэв эр хүн эмэгтэй хүнтэй унтаж, үрийн шингэн гаргах аваас тэд хоёул усанд булхах бөгөөд үдэш болтол бузар байна.

¹⁹Хэрэв эмэгтэй хүн цусан шүүрдэстэй байж, тэр нь түүний бие махбодын ердийн шүүрдэс байх аваас тэрээр сарын тэмдгийн бузарталдаа долоо хоногийн турш байх бөгөөд түүнд хүрсэн хэн боловч үдэш болтол бузар байна.

²⁰Мөн сарын тэмдгийнхээ үед түүний хэвтсэн аливаа зүйл бузар бөгөөд дээр нь суусан аливаа зүйл бузар болой.

²¹Оронд нь хүрсэн аливаа хүн хувцсаа угааж, усанд булхах бөгөөд үдэш болтол бузар байна.

²²Түүний суусан аливаа зүйлд хүрсэн хэн боловч хувцсаа угааж, усанд булхах бөгөөд үдэш болтол бузар байна.

²³Түүний ор ч бай, дээр нь сууж байсан зүйл ч бай, түүнд нь хүрсэн хүн үдэш болтол бузар байна.

²⁴Хэрэв эр хүн уг эмэгтэйтэй унтаж хэвтээд, эмэгтэйн бузар нь түүн дээр хүрэх аваас тэр эрэгтэй долоо хоногийн турш бузартсан байх бөгөөд эрэгтэйн хэвтсэн аливаа ор бузар болох ажгуу.

²⁵Хэрэв эмэгтэй хүн сарын тэмдгээс өөр үед олон хоног цусан шүүрдэстэй байх эсвэл тийм үеэс цааш үргэлжлэн шүүрдэстэй хэвээр байх аваас шүүрлийнхээ бүх өдрүүдэд тэрээр сарын тэмдгийнхээ бузарталд байгаа мэт байх болой. Тэрээр бузар байна.

²⁶Шүүрдсийнхээ бүх өдрүүдэд түүний хэвтсэн аливаа ор нь сарын тэмдгийн бузартлынх нь үеийн орны адил болох болой. Түүний дээр нь суусан аливаа зүйл тэр үеийнх нь бузрынхтай нь адил бузар болой.

²⁷Тэдгээрт хүрсэн хэн боловч хувцсаа угааж, усанд булхах бөгөөд үдэш болтол бузар байна.

²⁸Тэр эмэгтэй шүүрдсээсээ эдгэрч цэвэршихдээ долоо хоногийг тоолоод, үүний дараа цэвэр болно.

²⁹Найм дахь өдөр тэр өөртөө хоёр хүүрзгэнэ эсвэл хоёр өсвөр тагтаа авч, эдгээрийг уулзалтын майхны үүдэнд тахилчид авчирна.

³⁰Тахилч нэгийг нь нүглийн тахилд, нөгөөг нь шатаалт тахилд зориулан тахина. Ийнхүү бузар шүүрдсийнх нь улмаас тахилч ЭЗЭНий өмнө тэр эмэгтэйд эвлэрүүллийг хийнэ.

³¹Израилийн хөвгүүд өөрсдийнх нь дунд байгаа Миний асрыг бузарласнаар бузар дотроо үхэхгүйн тулд та нар тэднийг бузраас нь сэрэмжлүүлэгтүн” гэв.

³²Энэ нь шүүрдэстэй нэгний тухай мөн үрийн шингэн гаргаж түүгээр бузартсан хүний тухай хууль бөгөөд

³³түүнчлэн сарын тэмдгийн бузартлын улмаас зовууртай болсон эмэгтэй мөн эр ч бай, эм ч бай шүүрдэстэй нэгэн эсвэл бузартсан эмэгтэйтэй унтсан эрэгтэйн тухай хууль юм.