Read Ariun Bible 2013 – Ариун Библи 2013 Леви 2 Bible Online

Леви 2 - Ariun Bible 2013 – Ариун Библи 2013 bible

Леви 2

¹Хэн нэг нь ЭЗЭНд өргөл болгон идээн өргөлийг өргөх аваас өргөл нь сайн гурилынх байх бөгөөд тэр үүн дээр тос асган, дээр нь гүгэл тавиг.

²Тэр үүнийгээ Аароны тахилч хөвгүүдэд авчран, сайн гурилаас атга дүүрнийг, тосноос нь гүгэлтэй нь аваг. Тахилч үүнийг бэлгэдлийн хувь болгон тахилын ширээн дээр шатаах бөгөөд энэ нь ЭЗЭНд тааламжит үнэрт галан тахил болой.

³Харин идээн өргөлийн үлдэгдэл нь Аарон болон түүний хөвгүүдэд ногдох бөгөөд энэ нь ЭЗЭНд өргөх галан тахилууд дотроос ариунаас ариун нь бөлгөө.

⁴Чи зууханд жигнэсэн идээн өргөлийг өргөх аваас энэ нь тосоор багсарсан сайн гурилан исгээгүй боов эсвэл тосоор тосолсон исгээгүй бин байх болой.

⁵Хэрэв өргөл чинь хайруулын таваг дээр хийсэн идээн өргөл байх аваас энэ нь исгээгүй, тосонд багсарсан сайн гурилынх байх ёстой.

⁶Түүнийг жижиглэн хугалж, дээр нь тос асга. Энэ нь идээн өргөл болой.

⁷Хэрэв өргөл чинь саванд бэлтгэсэн идээн өргөл байх аваас үүнийг тостой сайн гурилаар хийсэн байх ёстой.

⁸Та нар эдгээр зүйлээр хийсэн идээн өргөлийг ЭЗЭНд авчран тахилчид өргө. Тэр үүнийг тахилын ширээнд аваачна.

⁹Тахилч идээн өргөлөөс бэлгэдлийн хувийг авч, үүнийгээ тахилын ширээн дээр шатаах бөгөөд энэ нь ЭЗЭНд тааламжит үнэр, галан тахил болой.

¹⁰Идээн өргөлийн үлдэгдэл нь Аарон болон түүний хөвгүүдэд ногдох бөгөөд энэ нь ЭЗЭНд өргөх галан тахилууд дотроос ариунаас ариун нь бөлгөө.

¹¹ЭЗЭНд та нарын авчрах ямар ч идээн өргөл хөрөнгөөр исгэсэн байх ёсгүй. Учир нь та нар ямар ч хөрөнгө ба зөгийн балыг галан тахил болгон ЭЗЭНд зориулан шатаах ёсгүй.

¹²Та нар анхны үр жимсний өргөлийг ЭЗЭНд өргөхдөө үүнийгээ харин тахилын ширээн дээр тааламжит үнэр болгон өргөх ёсгүй.

¹³Идээн өргөл болгоноо давсаар амтал. Идээн өргөлд чинь Бурханы гэрээний давс бүү дутагдаг. Бүх өргөлөө та нар давстай өргөгтүн.

¹⁴Та нар дээж үр жимсний идээн өргөлийг ЭЗЭНд өргөх аваас гал дээр хуурсан шинэ тариан түрүү, үйрүүлсэн шинэ үрийг үр жимсний идээн өргөлдөө өргө.

¹⁵Түүн дээр тос асган, дээр нь гүгэл тавь. Энэ нь идээн өргөл болой.

¹⁶Тахилч түүний бэлгэдлийн хувь болох үйрүүлсэн шинэ үр ба тосыг бүх гүглийн хамт ЭЗЭНд өргөх галан тахил болгон шатааг.