Read Ariun Bible 2013 – Ариун Библи 2013 Леви 21 Bible Online

Леви 21 - Ariun Bible 2013 – Ариун Библи 2013 bible

Леви 21

¹ЭЗЭН, Мосед айлдахдаа —Аароны хөвгүүд болох тахилчидтай ярин “Ард олны дундах үхсэн хүнээр өөрийгөө бүү бузарла.

²Зөвхөн түүний ойрын цусан төрлүүд болох эцэг, эх, хүү, охин, ах дүүгийнхээ төлөө

³мөн хамт байдаг, нөхөрт гараагүй онгон эгч дүүгийнхээ төлөө тэр өөрийгөө бузарлаж болно.

⁴Тэрээр ураг барилдсан нэгнээр ч бузарлагдан, өөрийгөө гутаах ёсгүй.[10]

⁵Тэд толгойгоо халзалж хусах, сахлынхаа үзүүрийг тайрах, бие махбод дээрээ аливаа зүсэлт хийх ёсгүй.

⁶Тэд Бурхандаа ариун байх бөгөөд Бурханыхаа нэрийг гутаах ёсгүй. Учир нь тэд Бурханыхаа талх, ЭЗЭНий галан тахилуудыг өргөдөг учир ариун байх ёстой.

⁷Тэд янхан эсвэл бузарлагдсан эм болон нөхөртөө хөөгдсөн салсан эмэгтэйг авч болохгүй. Учир нь тэд Бурхандаа ариун болой.

⁸Тэрээр Бурханы чинь талхыг өргөдөг учир чи түүнийг ариун хэмээн өргөмжлөх ёстой. Тэр чамд ариун болог. Учир нь та нарыг ариусгадаг ЭЗЭН Би ариун юм.

⁹Аливаа тахилчийн охин садарласнаар өөрийгөө гутаах аваас тэрээр эцгээ гутаасан хэрэг бөгөөд галд шатаагдах ёстой.

¹⁰Ах дүү нар дотроо тосолгооны тосыг толгой дээрээ цутгуулсан, тахилчийн хувцсыг өмсөхөөр ариусгагдсан тэргүүн тахилч толгойгоо ил гаргах мөн хувцсаа урах ёсгүй.

¹¹Түүнчлэн аливаа үхсэн хүнд ойртох, эцэг эхийнхээ төлөө ч өөрийгөө бузарлах ёсгүй.

¹²Тэрээр ариун газраас гадагш гарах мөн Бурханыхаа ариун газрыг гутаах ёсгүй. Учир нь Бурханых нь тосолгооны тосны ариусгал түүний дээр байгаа болой. Би ЭЗЭН.

¹³Тэрээр эхнэрээ охин онгоноор нь аваг.

¹⁴Бэлэвсэн эхнэр эсвэл хаягдсан эмэгтэй эсвэл бузарлагдсан эм эсвэл янхан эмийг тэр авч болохгүй. Харин тэр ард түмнээсээ онгон охиныг эхнэр болгон авах ёстой.

¹⁵Энэ нь ард түмнийхээ дунд үр удмаа гутаахгүйн тулд юм. Учир нь Би түүнийг ариусгадаг ЭЗЭН болой” гэж тэдэнд хэлэгтүн гэв.

¹⁶ЭЗЭН, Мосед айлдахдаа —

¹⁷Ааронтай ярин “Чиний үр удмын аль ч үеийнхнээс согог гажигтай ганц ч хүн Бурханы талхыг өргөхөөр ойртох ёсгүй.

¹⁸Ойртож болохгүй согог гажигтай хүнд сохор эсвэл доголон эсвэл сэтэрхий хамартай хүн эсвэл гажсан мөчтэй

¹⁹эсвэл хугарсан хөлтэй буюу хугарсан гартай хүн

²⁰эсвэл бөгтөр эсвэл одой эсвэл нүдэндээ цагаатай эсвэл маажууртай эсвэл үлдтэй эсвэл бяцарсан төмсөгтэй хүн багтана.

²¹Тахилч Аароны үр удмаас согог гажигтай нэг ч хүн ЭЗЭНд галан тахил өргөхөөр ойртож ирэх ёсгүй. Тэрээр согог гажигтай тул Бурханыхаа талхыг өргөхөөр ойртон ирэх ёсгүй.

²²Тэрээр Бурханыхаа талхны ариунаас ариун болон ариуны аль алийг нь идэж болох боловч,

²³согог гажигтай учраас Миний ариун газрыг гутаахгүйн тулд, хөшигний дотор орж, тахилын ширээнд ойртох ёсгүй. Учир нь ЭЗЭН Би тэднийг ариусгадаг юм” гэж хэл хэмээв.

²⁴Ийнхүү Мосе, Аарон ба түүний хөвгүүд мөн Израилийн бүх хөвгүүдтэй ярив.