Read Ariun Bible 2013 – Ариун Библи 2013 Леви 22 Bible Online

Леви 22 - Ariun Bible 2013 – Ариун Библи 2013 bible

Леви 22

¹ЭЗЭН, Мосетэй ярин айлдахдаа —

²Израилийн хөвгүүдийн надад ариусгасан ариун зүйлд няхуур хандахыг бас Миний ариун нэрийг гутаахгүй байхыг Аарон ба түүний хөвгүүдэд сануулагтүн. Би ЭЗЭН.

³Тэдэнд “Хэрэв аливаа үеийнхний чинь бүх үр удмын хэн нэг нь бузартсан байхдаа Израилийн хөвгүүдийн ЭЗЭНд зориулсан ариун өргөлд ойртох аваас тэр хүн Миний өмнөөс таслагдах болно. Би ЭЗЭН.

⁴Аароны үр удмаас арьсны халдварт өвчтэй эсвэл шүүрдэстэй хүн цэвэр болохоос нааш ариун зүйлсээс идэж болохгүй. Хэрэв хүүрээр бузартсан аливаа зүйлд хүрсэн хэн нэгэн эсвэл үрийн шингэн гаргасан хүн

⁵эсвэл бузартуулах аливаа мөлхөгчид хүрсэн хүн эсвэл бузартуулах аливаа хүнд хүрсэн хүн байх аваас, ямар ч бузар ялгаагүй

⁶ийм аливаа зүйлд хүрсэн хүн үдэш болтол бузар байх бөгөөд бие махбодоо усанд булхахаас нааш ариун зүйлсээс идэх ёсгүй.

⁷Харин нар жаргахад тэр хүн цэвэр болох бөгөөд үүний дараа тэр ариун зүйлсээс идэж болно. Учир нь энэ нь түүний хоол болой.

⁸Тэрээр үхдэл юмуу сэгчүүлж тасчуулсныг идэж, түүгээр бузартах ёсгүй. Би ЭЗЭН.

⁹Тиймээс тэд Миний журам зааврыг сахих ёстой. Эс тэгвээс үүнийг гутааснаас болж гэм нүгэл үүрч үхэх вий. Би тэднийг ариусгадаг ЭЗЭН болой.

¹⁰Ямар ч гаднын хүн ариун зүйлийг идэх ёсгүй. Тахилчийнд түр суугч эсвэл хөлсний хүн нь ариун зүйлээс идэж болохгүй.

¹¹Гэвч тахилч өөрийн мөнгөөр хүнийг худалдаж авбал тэр нь түүнээс идэж болох бөгөөд түүний гэрт төрөгсөд хоолноос нь идэж болно.

¹²Хэрэв тахилчийн охин гаднын хүнтэй гэрлэвэл ариун өргөлийн хувиас идэх ёсгүй.

¹³Гэвч тахилчийн охин нь бэлэвсрэх эсвэл хөөгдөх ба үр хүүхэдгүй, залуу үеийнх шигээ эцгийнхээ гэрт эргэн ирэх аваас тэрээр эцгийнхээ хоолноос идэж болно. Харин ямар ч гаднын хүн түүнээс идэх ёсгүй.

¹⁴Хэрэв хүн ариун зүйлсээс санамсаргүйгээр идэх аваас түүн дээр түүний тавны нэгийг нэмэн уг ариун зүйлийг тахилчид өгөх ёстой.

¹⁵Тэд Израилийн хөвгүүдийн, ЭЗЭНд өргөж буй ариун зүйлсийг гутаах ёсгүй.

¹⁶Мөн ариун зүйлсийг идсэнээрээ өөртөө ял хилэнц үүрүүлэх ёсгүй. Учир нь ЭЗЭН Би тэднийг ариусгадаг юм” гэдгийг хэлэгтүн гэв.

¹⁷ЭЗЭН, Мосед айлдахдаа —

¹⁸Аарон ба түүний хөвгүүд мөн Израилийн бүх хөвгүүдтэй ярин “Израилийн гэрийн болон Израиль дахь аливаа ирмэл хүн ЭЗЭНд шатаалт тахил болгон ам өчгийн эсвэл сайн дурын бүх өргөлийг өргөхдөө

¹⁹хүлээн авагдахын тулд үхэр, хонь эсвэл ямаанаас согоггүй эрийг нь авчрах ёстой.

²⁰Согогтой алив зүйлийг бүү өргө. Юу гэвэл, энэ нь та нарын төлөө хүлээн авагдахгүй.

²¹Хэн нэгэн ам өчгөө биелүүлэхээр эсвэл сайн дурын өргөл болгон үхэр буюу бог малаас ЭЗЭНд эвийн тахил өргөх аваас хүлээн авагдахын тулд тэр нь согоггүй байх ёстой. Түүнд ямар ч согог гажиг байх ёсгүй.

²²Сохор эсвэл гэмтэлтэй эсвэл зэрэмдэг эсвэл идээт шархтай эсвэл хамуутай эсвэл яртай малыг та нар ЭЗЭНд өргөх ёсгүй. Тэдгээрээс тахилын ширээн дээр ЭЗЭНд галан тахилыг бүү өргө.

²³Хэт томорч сунасан эсвэл согогтой жижиг мөчтэй бух эсвэл хургыг чи сайн дурын өргөлд өргөж болох авч ам өчгийн төлөө энэ нь хүлээн авагдахгүй болой.

²⁴Гэмтсэн эсвэл бяцарсан эсвэл тасчуулсан эсвэл засуулсан төмсөгтэй аливаа малыг ЭЗЭНд бүү өргө. Газар нутаг дээрээ ийм юм бүү үйлд.

²⁵Гаднын хүний гараар ч ийм аливаа малыг Бурханыхаа талх болгон бүү өргө. Эдгээр нь гэмтэл, согог гажигтай тул та нарын өмнөөс хүлээн авагдахгүй” гэж тэдэнд хэлэгтүн гэв.

²⁶ЭЗЭН, Мосед айлдахдаа —

²⁷Тугал, хурга, ишиг нь төрөөд эхтэйгээ долоо хоног байх ёстой. Харин найм дахь өдрөөс хойш ЭЗЭНд галан тахил болон хүлээн авагдаж болно.

²⁸Харин үхэр ч бай, хонь ч бай түүнийг төлийнх нь хамт нэг өдөр бүү нядал.

²⁹Та нар ЭЗЭНд талархлын тахилыг өргөхдөө та нарын өмнөөс энэ нь хүлээн авагдахуйцаар өргө.

³⁰Үүнийг тэр өдрөө идэх бөгөөд өглөө болтол түүнээс юуг ч бүү үлдээ. Би ЭЗЭН.

³¹Та нар Миний тушаалуудыг сахин үйлд. Би ЭЗЭН.

³²Би Израилийн хөвгүүдийн дотор ариунаар дуурсагдахын тулд та нар Миний ариун нэрийг бүү гутаа. Би та нарыг ариусгадаг ЭЗЭН бөгөөд

³³та нарын Бурхан байхын тулд та нарыг Египет нутгаас гарган авчирсан. Би ЭЗЭН гэв.