Read Ariun Bible 2013 – Ариун Библи 2013 Леви 24 Bible Online

Леви 24 - Ariun Bible 2013 – Ариун Библи 2013 bible

Леви 24

¹ЭЗЭН, Мосед айлдахдаа —

²Гэрэлтүүлгийг байнга асаалттай байлгахын тулд дэнлүүнд зориулан чидун жимснээс шахсан цэвэр тосыг чамд авчрахыг Израилийн хөвгүүдэд тушаа.

³Уулзалтын майханд, гэрчлэлийн хөшигний гадна Аарон үүнийг үдшээс өглөөг хүртэл ёсоор нь ЭЗЭНий өмнө байнга асаахаар тавих ёстой. Энэ нь хамаг үеийнхэнд чинь үргэлжлэх үүрдийн зарлиг болой.

⁴Дэнлүүнүүдийг тэрээр дэнлүүний шижир алтан суурин дээр ёсоор нь ЭЗЭНий өмнө байнга тавих ёстой.

⁵Сайн гурил авч, түүгээр арван хоёр боов жигнэ. Боов тусбүрд ефагийн аравны хоёр байх ёстой.

⁶Эдгээрийг ЭЗЭНий өмнө шижир алтан ширээн дээр нэг эгнээнд нь зургаа байхаар хоёр эгнээ болгон тавь.

⁷ЭЗЭНд өргөх галан тахил, бэлгэдлийн өргөл болгохын тулд эгнээ бүрийн талхан дээр цэвэр гүгэл тавигтун.

⁸Амралтын өдөр бүр Израилийн хөвгүүдийн өмнөөс тэр үүнийг ёсоор нь ЭЗЭНий өмнө байнга тавих ёстой. Энэ нь мөнхийн гэрээ.

⁹Энэ нь Аарон болон түүний хөвгүүдийнх бөгөөд тэд үүнийг ариун газарт идэх болой. Учир нь ЭЗЭНд өргөх галан тахилуудаас түүнд ариунаас ариун, мөнхийн хувь ногдол нь энэ юм гэлээ.

¹⁰Египет эцэгтэй, израиль эмэгтэйн хүү Израилийн хөвгүүд уруу гарч ирэв. Израиль эмэгтэйн тэр хүү нэгэн эртэй хоёул хуаранд бие биентэйгээ муудалцав.

¹¹Тэгэхэд израиль эмэгтэйн хүү ЭЗЭНий нэрийг доромжлон хараасанд тэд түүнийг Мосед аваачлаа. (Түүний эхийн нэрийг Шеломит гэх бөгөөд тэрээр Дан овгийн Дибрийн охин байлаа.)

¹²Өөрсдөд нь ЭЗЭНий амаар хариу өгөгдтөл тэд түүнийг хорионд байлгав.

¹³ЭЗЭН, Мосед айлдахдаа —

¹⁴Хараасан нэгнийг хуарангийн гадна авчирч, түүний үгийг сонссон бүхэн толгой дээр нь гараа тавиг. Даяар хотол түмэн түүн уруу чулуу чулуудаг.

¹⁵Чи Израилийн хөвгүүдэд “Хэн нэгэн нь Бурханаа хараах аваас тэрээр гэм нүглээ үүрэх болно.

¹⁶ЭЗЭНий нэрийг доромжлох нэгэн нь үхэх ёстой. Уугуул хүн ч бай, ирмэл хүн ч бай ЭЗЭНий нэрийг доромжлох аваас үхэх ёстой бөгөөд даяар хотол түмэн түүнийг чулуугаар чулуудаг.

¹⁷Аливаа хүмүүний амийг хэн нэгэн нь хороох аваас үхэх ёстой.

¹⁸Амьтныг хороосон нэгэн нь амийг амиар нөхөн төлөх ёстой.

¹⁹Хэрэв хүн хөршөө гэмтээх аваас түүний үйлдсэн ёсоор өөрт нь үйлдэгдэх ёстой.

²⁰Хугарлыг хугарлаар, нүдийг нүдээр, шүдийг шүдээр, хүнийг гэмтээснийх нь дагуу түүнд мөн түүнчлэн өгөгдөх ёстой.

²¹Амьтныг алсан хүн үүнийг нөхөн төлнө. Харин хүн алсан нэгэн нь үхэх ёстой.

²²Гаднынханд ч бай, уугуул нутгийнханд ч бай та нарт нэг л шүүлт байх ёстой. Учир нь та нарын Бурхан ЭЗЭН Би билээ” гэж хэл хэмээв.

²³Тэгээд Мосе, Израилийн хөвгүүдэд хэлсэнд тэд хараасан хүнийг хуарангийн гадна аваачин түүн уруу чулуу шидлэв. Мосед ЭЗЭНий тушаасан ёсоор Израилийн хөвгүүд үйлдэв.