Read Ariun Bible 2013 – Ариун Библи 2013 Леви 27 Bible Online

Леви 27 - Ariun Bible 2013 – Ариун Библи 2013 bible

Леви 27

¹ЭЗЭН, Мосед айлдахдаа —

²Израилийн хөвгүүдтэй ярин “Хүнд хамаарах үнэлгээний талаар ЭЗЭНд зориулах онцгой ам өчгийг хүн өгөх үед

³хориос жар хүртэлх насны эрэгтэйг үнэлж байвал та нарын үнэлгээ ариун газрын шекелээр тавин шекел мөнгө байх ёстой.

⁴Хэрэв эмэгтэй байвал та нарын үнэлгээ гучин шекел байх ёстой.

⁵Хэрэв таван наснаас хорин нас хүртэлх хүн байвал эрэгтэйд зориулсан үнэлгээ чинь хорин шекел, харин эмэгтэйд зориулсан үнэлгээ арван шекел байх ёстой.

⁶Харин нэг сартайгаас таван нас хүртэлх хүн байх аваас эрэгтэйд зориулсан үнэлгээ чинь таван шекел мөнгө, харин эмэгтэйд зориулсан үнэлгээ гурван шекел мөнгө байх ёстой.

⁷Хэрэв жараас дээш насных байх аваас эрэгтэйд зориулсан үнэлгээ чинь арван таван шекел, харин эмэгтэйд арван шекел байх ёстой.

⁸Хэрэв тэр хүн үнэлгээнээс чинь ядуу байх аваас түүнийг тахилчийн өмнө аваачих бөгөөд тахилч түүнийг үнэлэх болой. Ам өчиг өгсөн нэгний хөрөнгө чадлын хэрээр тахилч түүнийг үнэлэг.

⁹Хэрэв ЭЗЭНд тахил болгон өгөхөд зориулагдсан амьтан байвал ЭЗЭНд өгсөн аливаа амьтан ариун болой.

¹⁰Сайныг муугаар буюу мууг сайнаар орлуулж эсвэл сольж болохгүй. Хэрэв амьтныг амьтнаар солих аваас тэр нь болон орлуулсан амьтан хоёулаа ариун болно.

¹¹Хэрэв ЭЗЭНд өргөл болгон өргөдөггүй, бузар төрлийн амьтан байвал уг амьтныг тахилчийн өмнө тавина.

¹²Тахилч үүнийг сайн муугаар нь үнэлэх бөгөөд тахилч таны үнэлгээний дагуу тогтооно.

¹³Харин хүн түүнийг золихыг хүсвэл, үнэлсэн үнийнхээ тавны нэгийг түүн дээр нэмэх ёстой.

¹⁴Хэрэв хүн өөрийн сууцыг ЭЗЭНд ариун болгон ариусган зориулах аваас тахилч түүнийг нь сайн муугаар үнэлнэ. Тахилчийн үнэлсний дагуу тогтоогдоно.

¹⁵Харин орон сууцаа ариусган зориулсан нэгэн үүнийгээ золихыг хүсвэл, таны үнэлсэн үнийн тавны нэгийг дээр нь нэмэг. Ингэж орон сууц түүнийх болно.

¹⁶Хэрэв хүн өмчийн талбайгаасаа ЭЗЭНд ариусган зориулах аваас үнэлгээ тань түүнд шаардагдах үрийн хэмжээгээр байх ёстой. Арвайн үрийн нэг хомер нь тавин шекел мөнгө болой.

¹⁷Хэрэв тэр хүн талбайгаа эвэр бүрээдэлтийн жилээс эхлээд ариусган зориулах аваас энэ нь таны үнэлгээний дагуу тогтох ёстой.

¹⁸Харин тэр хүн эвэр бүрээдэлтийн дараа талбайгаа ариусгавал дараагийн эвэр бүрээдэлтийг хүртэл үлдсэн жилүүдтэй тэнцүүлэн тахилч мөнгийг тооцох ёстой. Энэ нь үнэлгээнээс нь хасагдах ёстой.

¹⁹Харин талбайгаа ариусган зориулсан хүн түүнийгээ золихыг хүсвэл үнэлсэн үнийн тавны нэгийг дээр нь нэмэг. Ингэж талбай түүнд үлдэх болно.

²⁰Хэрэв тэр хүн талбайгаа золихгүй, харин уг талбай нь өөр хүнд худалдагдах аваас үүнийг цаашид золих боломжгүй болж,

²¹эвэр бүрээдэлтээр уг талбай буцах үедээ хориг болсон талбайн адил ЭЗЭНд ариун болой. Энэ нь тахилчийнх болно.

²²Хэрэв хүн эзэмшлийнхээ бус, худалдаж авсан талбайгаасаа ЭЗЭНд ариусган зориулбал,

²³тахилч түүнд эвэр бүрээдэлтийн жил хүртэлх үнийг нь тооцох ёстой бөгөөд тэрээр мөнөөх өдөртөө үнэлсэн үнийг нь ЭЗЭНд ариун хэмээн өгөх ёстой.

²⁴Эвэр бүрээдэлтийн жилд уг талбай нь талбайг зарсан хүнд, газрын өвийн эзэмшигчид буцаж очих болой.

²⁵Таны үнэлгээ бүр чинь ариун газрын шекелээр нэг шекел нь хорин гера байх ёстой.

²⁶Анх төрөгсөд нь ЭЗЭНийх байдаг учир амьтдын ууган төлийг хэн ч ариусган зориулж болохгүй. Үхэр ч бай, хонь ч бай ЭЗЭНийх юм.

²⁷Хэрэв бузар амьтан байх аваас таны үнэлсэн үнийн тавны нэгийг дээр нь нэмэн түүнийг золих ёстой. Хэрэв золигдохгүй байх аваас энэ нь таны үнэлсэн үнийн дагуу зарагдах ёстой.

²⁸Хүн өөрт байгаа бүхэн болох хүн, амьтан эсвэл өмчийнхөө талбайгаас ЭЗЭНд хориг болгосон алив зүйлээ[12] зарах буюу золих ёсгүй. Хориг болсон аливаа зүйл ЭЗЭНд ариунаас ариун юм.

²⁹Хүмүүсийн дундаас хориг болсон аливаа хүний үнийг төлөх ёсгүй бөгөөд тэр нь гарцаагүй үхэх ёстой.

³⁰Газар, газрын үр, модны үр жимсний бүх арван хувь ЭЗЭНийх бөгөөд ЭЗЭНд ариун болой.

³¹Хэрэв хүн өөрийн арван хувиас золихыг хүсэх аваас тэрээр түүний тавны нэгийг түүн дээр нэмэг.

³²Бод болон бог малын арван хувь буюу шилбүүр доогуур гарч тоолуулсан арав дахь нь ЭЗЭНд ариун болох ёстой.

³³Үүнийг сайн, муу гэж ялгах хэрэггүй, сольж ч болохгүй. Хэрэв түүнийг солих аваас тэр болон түүнийг орлогч нь хоёулаа ариун болох бөгөөд золигдох ёсгүй” гэж тэдэнд хэлэгтүн гэв.

³⁴Эдгээр нь Израилийн хөвгүүдэд зориулан Синаи уулан дээр Мосед ЭЗЭНий тушаасан тушаалууд болой.