Read Ariun Bible 2013 – Ариун Библи 2013 Леви 4 Bible Online

Леви 4 - Ariun Bible 2013 – Ариун Библи 2013 bible

Леви 4

¹ЭЗЭН, Мосед айлдахдаа —

²Израилийн хөвгүүдэд “ЭЗЭНий хийхийг хориглосон зүйлээс хүн аль нэгийг нь хийж, санамсаргүй нүгэл үйлдэх аваас,

³хэрэв тослогдсон тахилч ард түмнийг ялд унагаж нүгэл үйлдэх аваас тэр хүн үйлдсэн нүгэлдээ залуу, согоггүй бухыг нүглийн тахил болгон ЭЗЭНд өргөг.

⁴Тэрээр бухыг уулзалтын майхны үүдэнд ЭЗЭНий өмнө авчраад, гараа бухын толгой дээр тавьж, үүнийг ЭЗЭНий өмнө нядлаг.

⁵Тослогдсон тахилч бухын цуснаас аваад, үүнийгээ уулзалтын майханд авчраг.

⁶Тахилч цусанд хуруугаа дүрэн ЭЗЭНий өмнө, ариун газрын хөшигний өмнө цуснаас долоон удаа цацах бөлгөө.

⁷Тахилч бас уулзалтын майханд ЭЗЭНий өмнө буй анхилуун утлагат тахилын ширээний эврүүд дээр хэсэг цусыг нялж, уулзалтын майхны үүдэнд байгаа шатаалт тахилын ширээний суурь уруу бухын бүх цусыг асгана.

⁸Нүглийн тахилд тэр үүнээс бухын бүх өөхийг нь буюу сэмж, бүх дотор өөхийг,

⁹хоёр бөөрийг ууц дагуух өөхтэй нь хамт, өнчин элгийг бөөртэй хамт,

¹⁰эвийн тахилын үхрээс салгасан тэр ёсоор салгана. Тахилч эдгээрийг шатаалт тахилын ширээн дээр шатаах бөлгөө.

¹¹Харин бухын арьс болон бүх махыг нь толгой, мөч, гэдэс дотор, сэвс буюу

¹²бухыг бүхэлд нь тэрээр хуарангийн гадаа үнс асгадаг цэвэр газарт аваачиж, модон дээр галдан шатааг. Үүнийг үнс асгадаг газарт шатааг.

¹³Хэрэв Израилийн даяар хотол түмэн санамсаргүй алдаж, уг хэрэг чуулганд анзаарагдахгүй өнгөрөх буюу ЭЗЭНий хийх ёсгүй хэмээн тушаасан аливаа зүйлийг хийснээр тэд ялтай болох аваас

¹⁴тэдний үйлдсэн нүгэл мэдэгдэх үед чуулган нүглийн тахилд зориулан залуу бух өргөг. Үүнийг уулзалтын майхны өмнө авчрах бөлгөө.

¹⁵Хотол түмний ахмадууд ЭЗЭНий өмнө, бухын толгой дээр гараа тавиад, уг бухыг ЭЗЭНий өмнө нядлаг.

¹⁶Тэгээд тослогдсон тахилч бухын цуснаас уулзалтын майханд авчирна.

¹⁷Тахилч цусанд хуруугаа дүрэн ЭЗЭНий өмнө, хөшигний өмнө долоон удаа цацна.

¹⁸Тэрээр хэсэг цусыг уулзалтын майханд ЭЗЭНий өмнө буй тахилын ширээний эврүүд дээр нялна. Бүх цусыг тэр уулзалтын майхны үүдэн дэх шатаалт тахилын ширээний суурь уруу асгана.

¹⁹Тэр мөнөөх бухаас бүх өөхийг нь салган тахилын ширээн дээр шатаан уугиулна.

²⁰Нүглийн тахилын буханд хийсэнчлэн уг буханд мөн тэгж хийнэ. Үүнийг яг тэр ёсоор нь түүнд хийнэ. Тахилч ийнхүү тэдэнд эвлэрүүллийг хийж, тэд уучлагдах болно.

²¹Тэгээд тэр бухыг хуарангийн гадна аваачиж эхний бухыг шатаасантай адил шатаана. Энэ нь чуулганд зориулсан нүглийн тахил юм.

²²Удирдагч нүгэл үйлдэж, ЭЗЭН Бурханы хийхийг хориглосон бүх зүйлээс санамсаргүй үйлдэн ялтай болох аваас

²³хэрэв үйлдсэн нүглийг нь түүнд мэдүүлбэл, тэрээр согоггүй ухныг тахилдаа зориулан авчрах ёстой.

²⁴Тэрээр ухнын толгой дээр гараа тавьж, шатаалт тахилыг нядалдаг газарт ЭЗЭНий өмнө үүнийг нядална. Энэ нь нүглийн тахил юм.

²⁵Тэгээд нүглийн тахилын цуснаас тахилч хуруугаараа авч, шатаалт тахилын ширээний эврүүд дээр нялан, бусад цусыг нь шатаалт тахилын ширээний суурь уруу асгах ёстой.

²⁶Бүх өөхийг нь тэрээр эвийн тахилуудын өөхний адил тахилын ширээн дээр шатааг. Ийнхүү тахилч түүнд нүглийнх нь эвлэрүүллийг хийх бөгөөд тэр уучлагдах болно.

²⁷ЭЗЭН тушаалаараа хориглосон зүйлсийн аль нэгийг жирийн хүмүүний нэг нь санамсаргүй хийснээрээ нүгэл үйлдэн ялтай болох аваас

²⁸хэрэв үйлдсэн нүглийг нь уг хүнд мэдүүлбэл, тэрээр үйлдсэн нүглийнхээ тахилд зориулан согоггүй эм ямааг авчрах болой.

²⁹Тэр хүн нүглийн тахилын толгой дээр гараа тавьж, уг нүглийн тахилыг шатаалт тахилын байранд нядална.

³⁰Тахилч түүний цуснаас хэсгийг хуруугаараа авч, шатаалт тахилын ширээний эврүүд дээр нялан, бусад бүх цусыг нь тахилын ширээний суурь уруу асгах болой.

³¹Эвийн тахилын өөхийг салгасантай адил бүх өөхийг нь салгаг. Тахилч үүнийг тахилын ширээн дээр ЭЗЭНд тааламжит үнэр болгон шатааг. Ийнхүү тахилч түүнд эвлэрүүллийг хийж тэр уучлагдах болно.

³²Тэрээр хургыг өөрийн тахилын өргөл болгон нүглийн тахилд авчрах аваас согоггүй эм хурга авчрах ёстой.

³³Тэр нүглийн тахилын толгой дээр гараа тавьж, үүнийг шатаалт тахил нядалдаг газарт нүглийн тахилд зориулан нядлах болно.

³⁴Тахилч нүглийн тахилын цуснаас хуруугаараа авч, шатаалт тахилын ширээний эврүүд дээр нялаад, бусад бүх цусыг тахилын ширээний суурь уруу асгана.

³⁵Тэгээд тэр бүх өөхийг нь эвийн тахилын хурганы өөхийг салгасантай адил салгах бөгөөд тахилч эдгээрийг тахилын ширээн дээр, галан тахилууд дээр ЭЗЭНд шатаан уугиулна. Ийнхүү тахилч үйлдсэн нүглийнх нь эвлэрүүллийг түүнд хийж тэрээр уучлагдах болно.