Read Ariun Bible 2013 – Ариун Библи 2013 Иеремиа 51 Bible Online

Иеремиа 51 - Ariun Bible 2013 – Ариун Библи 2013 bible

Иеремиа 51

¹ЭЗЭН ингэж айлдаж байна. “Үзэгтүн, Би Вавилоны эсрэг Леб-камаин оршин суугчдын эсрэг Устгагчийн сүнсийг босгох болно.

²Түүнийг шигшүүлж, газар нутгийг нь сүйтгүүлэхийн тулд Би Вавилон уруу харийнхныг явуулах болно. Учир нь гай гамшгийнх нь өдөр Тэд тал бүрээс түүнийг эсэргүүцнэ.

³Нумаа татдаг нэгэн бүү татаг, Хөө хуягаа ч өмсөн бүү босож ирэг. Залуусыг нь бүү амьд үлдээ. Бүх цэргийг нь устга.

⁴Тэд халдеичуудын нутагт алагдаж, Гудамжнуудад нь нэвт хатгуулж унана” хэмээв.

⁵Хэдийгээр тэдний газар нутаг Израилийн Ариун Нэгэний өмнө ялаар дүүрэн боловч Израиль ч бас Иуда ч Түг түмдийн ЭЗЭН Бурхандаа орхигдоогүй.

⁶Вавилоны дундаас зугт, Хүн бүр амиа аварцгаа! Энэ бол ЭЗЭНий өшөө авах цаг тул Шийтгэл дотор нь бүү сүйр. Тэр түүнд шанг нь өгөх гэж байна.

⁷Вавилон нь ЭЗЭНий гарт Бүх дэлхийг согтоох алтан аяга байв. Үндэстнүүд дарснаас нь уусан билээ. Тиймээс үндэстнүүд галзуурцгааж байна.

⁸Вавилон гэнэтхэн унаж нурав. Түүний дээр уйл! Өвчин шаналалд нь зориулж гавар авчир. Тэрээр эдгэрч магад.

⁹Бид Вавилоныг эдгээх л байсан, Гэвч тэрээр эдгээгүй. Түүнийг орхиод, Бүгдээрээ нутаг уруугаа явцгаая. Учир нь түүний шүүлт тэнгэрт хүрч, үүлст өргөгдөв.

¹⁰ЭЗЭН зөвтгөлийг маань авчрав. Ирцгээ, Бурхан ЭЗЭНийхээ үйлсийг Сионд хэлцгээе!

¹¹Сумнуудаа хурцалж, саадгуудаа дүүргэ! Зорилго нь Вавилоныг устгахаар Түүний эсрэг байгаа тул ЭЗЭН медечүүдийн хаадын сүнсийг босгов. Учир нь энэ бол ЭЗЭНий өшөө авалт, Сүмийнх нь төлөөх өшөө авалт юм.

¹²Вавилоны хэрмүүдийн эсрэг дохио өргө. Харуулыг бэхжүүлж, манаа тавьж, Хүмүүсийг отуул! Учир нь Вавилоны оршин суугчдын талаар ЭЗЭН айлдсанаа зорьж, биелүүлэв.

¹³Эрдэнэсээр элбэг, их усны дэргэд амьдрагч аа, Төгсгөл чинь, төгсгөлийн чинь хэмжээ ирэв.

¹⁴Түг түмдийн ЭЗЭН Өөрөөрөө тангараглав. “Би чамайг дэвхрэг мэт хүмүүсээр лавтайяа дүүргэх бөгөөд Тэд чамайг ялсан ялалтын дуугаар хашхирах болно.

¹⁵Хүч чадлаараа дэлхийг бий болгож, Мэргэн ухаанаараа ертөнцийг тогтоосон Тэр билээ. Түүний ухаанаар тэнгэрс тэлсэн билээ.

¹⁶Түүнийг дуугарахад тэнгэрс дээр ус хүржигнэдэг бөгөөд Тэрээр дэлхийн төгсгөлөөс үүлсийг хөөргөдөг. Тэрээр бороонд зориулж цахилгаан бүтээж, Агуулахуудаасаа салхийг гаргадаг.

¹⁷Хүн бүр тэнэг бөгөөд мэдлэггүй юм. Дархан бүр хийсэн шүтээнээрээ ичгүүр болмуй. Учир нь цутгамал хөргүүд нь хуурамч бөгөөд тэдэн дотор амьсгал үгүй.

¹⁸Тэд дэмий хоосон, доог тохууны бүтээл. Шийтгэлийнхээ цагт тэд устана.

¹⁹Иаковын хувь эдгээртэй адил биш. Учир нь Тэрээр бүхний Бүтээгч бөгөөд Израиль нь Түүний өвийн овог юм. Түүний нэр нь түг түмдийн ЭЗЭН”

²⁰“Чи миний тулалдааны шийдэм, дайны зэвсэг. Чамаар Би үндэстнүүдийг нураадаг, Чамаар Би хаанчлалуудыг устгадаг.

²¹Чамаар Би морийг унаачтай нь нураадаг, Чамаар Би тэргийг хөлөглөгчтэй нь нураадаг,

²²Чамаар Би эрэгтэй, эмэгтэй хүнийг нураадаг, Чамаар Би хөгшин ба залууг нураадаг, Чамаар Би залуу хүнийг бас онгон охиныг нураадаг,

²³Чамаар Би хоньчинг хонин сүрэгтэй нь нураадаг, Чамаар Би тариачинг буулгат үхэртэй нь нураадаг бөгөөд Чамаар Би захирагч, удирдагчдыг нураадаг.

²⁴Харин нүдний чинь өмнө Сионд тэдний үйлдсэн бүх муу муухай үйлдлийнх нь төлөө Вавилон болон Халдеин бүх оршин суугчдад Би хариуг нь өгөх болно” гэж ЭЗЭН тунхаглаж байна.

²⁵“Бүхий л дэлхийг устгадаг Устгагч уул аа, үзэгтүн, Би чиний эсрэг байна” гэж ЭЗЭН тунхаглаж байна. “Би чиний эсрэг мутраа сунгаж, Чамайг хаднуудаас доошоо өнхрүүлэн Чамайг шатсан уул болгоно.

²⁶Тэд чамаас буланд ч, сууринд ч зориулж чулуу авахгүй. Харин чи мөнхөд зэлүүд хоосон болно” гэж ЭЗЭН тунхаглаж байна.

²⁷Нутагт дохио тэмдэг босгож, Үндэстнүүдийн дунд бүрээ үлээ! Түүний эсрэг үндэстнүүдийг ариусга, Түүний эсрэг Арарат, Минни, Ашкеназын хаанчлалуудыг дуудан цуглуул. Түүний эсрэг өрлөг жанжинг томилж, Морьдыг арвагар дэвхрэгнүүд мэт авчир.

²⁸Түүний эсрэг үндэстнүүдийг, Медечүүдийн хаадыг, Тэдний захирагчдыг, Тэдний удирдагчдыг Тэдний эзэгнэдэг нутаг бүрийг ариусга.

²⁹Ийнхүү газар хөдөлж, тарчилж байна. Учир нь Вавилоны газар нутгийг Оршин суугчгүй зэлүүд газар болгох гэсэн Вавилоны эсрэг буй ЭЗЭНий зорилгууд байсаар байна.

³⁰Вавилоны хүчит эрчүүд тулалдахаа больж, Бат цайзууддаа үлдэв. Тэдний хүч доройтож, Тэд эм хүн шиг болж байна. Тэдний оршин суух газрууд галд шатаагдаж, Хөндлүүд нь эвдрэв.

³¹Хот нь хязгаараас эзлэгдсэн гэдгийг Вавилоны хаанд айлтгахаар Нэг зарлага нөгөөтэй уулзахаар, Нэг элч нөгөөтэй уулзахаар гүйдэг.

³²Гармууд ч гэсэн эзлэгдсэн бөгөөд Тэд намаг балчгуудыг галдан шатаав. Дайчид айцгаав.

³³Учир нь түг түмдийн ЭЗЭН, Израилийн Бурхан ингэж айлдаж байна. “Вавилоны охин нь дэвслүүлж байгаа үтрэмтэй адил. Жаахан азнаад түүний ургац хураах цаг ирнэ” хэмээв.

³⁴“Вавилоны хаан Небухаднезар намайг залгиж, бяцалсан. Тэр намайг хоосон сав болгон доошоо тавив. Тэр намайг мангас мэт залгив. Тэр ходоодоо миний амттанаар дүүргэв. Тэр намайг бөөлжиж гаргав.

³⁵Надад болон махбодод минь үйлдсэн хүчирхийлэл Вавилон дээр байх болтугай” гэж Сионы оршин суугч хэлэх болно. “Цус минь Халдеин оршин суугчид дээр байх болтугай” гэж Иерусалим хэлэх болно.

³⁶Тиймээс ЭЗЭН ингэж айлдаж байна. “Үзэгтүн, Би хэргийг чинь өмгөөлж, Чиний төлөө бүрэн өшөө авна. Би тэнгисийг нь хатааж, Оргилох ундаргыг нь хуурай болгоно.

³⁷Вавилон нь овоо, цөөвөр чононуудын үүр, Оршин суугчидгүй айх, исгэрэх шалтгаан болно.

³⁸Тэд хамтдаа залуу арслангууд мэт архирч, Арслангийн гүег мэт хүрхэрнэ.

³⁹Тэд халсан хойно Би тэдний найрыг хийж, Тэднийг баярлуулан хөөргөж, Үүрдийн нойроор нойрсуулж, Сэрээхгүйн тулд тэднийг согтооно” гэж ЭЗЭН тунхаглаж байна.

⁴⁰“Би тэднийг хурга мэт, Хуц ухна мэт нядалгаанд авчирна.

⁴¹Шешах олзлогдож, Бүх дэлхийн магтаал хэрхэн зогсов оо! Вавилон нь үндэстнүүдийн дунд Юутай айдас болов оо!

⁴²Далай тэнгис Вавилоны дээгүүр гарчээ. Тэрээр шуурган давалгаануудад нь нөмрүүлжээ.

⁴³Хотууд нь айдас болоод Хатаж хагссан нутаг, цөл Ямар ч хүн амьдардаггүй, Ямар ч хүн дамжин өнгөрдөггүй нутаг болжээ.

⁴⁴Би Вавилонд Белийг шийтгэж, Залгисан зүйлийг нь Би амаар нь гаргана. Үндэстнүүд ч түүнд цутгахаа болино. Вавилоны хана хэрэм ч хүртэл унажээ!

⁴⁵Хүмүүс минь ээ, түүний дундаас гарч ирцгээж, Хүн нэгбүр чинь ЭЗЭНий ширүүн уураас Өөрсдийгөө авар.

⁴⁶Газар нутагт сонсогдох мэдээнд Зүрх чинь бүү мохож, бүү айгтун. Учир нь нэг жил мэдээ ирж, Үүний дараа жилд ондоо мэдээ, Удирдагч нь удирдагчийнхаа эсрэг, Газар нутагт хүчирхийлэл ирнэ.

⁴⁷Тиймээс үзэгтүн, Би Вавилоны шүтээнүүдийг шийтгэх өдрүүд ирж байна. Бүх газар нутаг нь ичгүүр болж, Бүх алагдагсад нь түүний дунд унах болно.

⁴⁸Тэгэхэд тэнгэр, газар болон Тэдэн дотор буй бүхэн Вавилон дээгүүр Баярлан хөөрч хашхирах болно. Учир нь устгагчид түүн дээр умардаас ирнэ” гэж ЭЗЭН тунхаглаж байна.

⁴⁹Вавилоны төлөө бүх дэлхийн алагдагсад унасан шиг Вавилон Израилийн алагдагсдын төлөө үнэхээр унах ёстой.

⁵⁰Илднээс зугтагчид аа, та нар явцгаа! Бүү үлд! Алс газраас ЭЗЭНийг сана, Иерусалим бодол санаанд чинь орог.

⁵¹Бид жигшүүрт зүйлс сонссон учир Бид ичиж байна. Бидний нүүр царай шившигт дарагдав. Учир нь харийнхан ЭЗЭНий өргөөний Ариун газруудад оржээ.

⁵²“Тиймээс, үзэгтүн, Би шүтээнүүдийг нь шийтгэх өдрүүд ирж байгаа бөгөөд Үхлийн шархтай нэгэн нь Газар нутаг даяараа ёолох болно” гэж ЭЗЭН тунхаглаж байна.

⁵³“Вавилон хичнээн тэнгэрт өгссөн ч, Өндөр бат цайзуудаа хичнээн бэхэлсэн ч Устгагчид Надаас түүн дээр ирэх болно” гэж ЭЗЭН тунхаглаж байна.

⁵⁴Вавилоноос хашхирааны, Халдеичуудын нутгаас их сүйрлийн дуу чимээ гарч байна!

⁵⁵Учир нь Вавилоныг ЭЗЭН устгах гэж байгаа бөгөөд Тэрээр түүнээс чанга дуу хоолойг үгүй болгоно. Давалгаанууд нь их ус мэт хүрхэрнэ. Дуу хоолойнуудын хүржигнэх нь сонсдоно.

⁵⁶Учир нь устгагч нь түүний эсрэг, Вавилоны эсрэг ирж байгаа бөгөөд Хүчит эрс нь олзлогдож, Тэдний нумууд хугалагдах болно. Учир нь ЭЗЭН бол нөхөн төлбөрийн Бурхан, Тэрээр бүрэн хариулна.

⁵⁷“Би түүний ноёд, мэргэд, Түүний захирагчид, удирдагчид Хүчит эрсийг нь согтооно. Ингэснээр тэд мөнхийн нойроор нойрсож, сэрэхгүй” гэж Түг түмдийн ЭЗЭН нэртэй Хаан тунхаглаж байна.

⁵⁸Түг түмдийн ЭЗЭН ингэж айлдаж байна. “Вавилоны өргөн хана хэрэм бүрэн гүйцэд нурж, Өндөр гулдан хаалганууд нь шатна. Тиймээс хүмүүс юу ч биш юмны төлөө ажиллаж Үндэстнүүд галын төлөө туйлдах болно.”

⁵⁹Иудагийн хаан Зедекиатай хамт, хаанчлалынх нь дөрөвдүгээр онд Вавилон уруу явах үедээ Махсеиагийн ач, Нериагийн хүү Сераиад эш үзүүлэгч Иеремиагийн тушаасан үг энэ юм. (Сераиа нь хангамжийн ахмад байв.)

⁶⁰Иймээс Иеремиа нэг хуйлмал номд, Вавилон дээр ирэх бүх гай гамшгийг буюу Вавилоны талаар бичигдсэн эдгээр бүх үгийг бичив.

⁶¹Тэгээд Иеремиа, Сераиад —Чи Вавилонд очмогцоо эдгээр бүх үгийг чангаар уншиж,

⁶²“ЭЗЭН, Та энэ газрын талаар үүнийг тасална гэж амласан билээ. Ингэснээр хүн ч, араатан амьтан ч, юу ч тэнд амьдрахгүй, харин энэ нь мөнхийн зэлүүд газар болно” гэж хэлэгтүн.

⁶³Чи энэ хуйлмал номыг уншиж дуусангуутаа түүнд чулуу уяж Евфрат мөрний голд шидээд,

⁶⁴“Яг үүн шиг дээр нь Миний авчрах гэж байгаа гай гамшгаас болж Вавилон живээд, дахин босохгүй. Тэд сульдах болно” гэж хэл гэжээ. Эдгээр нь Иеремиагийн үгс юм.