Read Ariun Bible 2013 – Ариун Библи 2013 Гашуудал 3 Bible Online

Гашуудал 3 - Ariun Bible 2013 – Ариун Библи 2013 bible

Гашуудал 3

¹Бурханы хилэнт савааг амсаж Зовлон зүдүүр үзсэн хүн гэвэл би юм.

²Түүнд туугдаж, гэрэл ч үгүй харанхуйд би орсон

³Тэрээр мутар юугаа өдөржин бас Миний эсрэг олонтаа эргүүлсэн.

⁴Арьс махыг минь хатааж, Яснуудыг минь хэмхчив.

⁵Уй гашуу, хүнд бэрхшээлд унаган Гарах газаргүй болгон хашив.

⁶Галавын үеийн цогцос мэт Харанхуйд намайг суулгав.

⁷Гарч зугтаалгахгүйгээр Намайг Тэр хашив. Гав гинж нь хүртэл даах үүрэхэд хүнд

⁸Хашхиран, тусламж дуудсан ч Залбирлыг минь бас хаажээ.

⁹Замыг минь цавчсан чулуугаар хааж, Жимийг минь тахир болгов.

¹⁰Баавгай мэт Тэр намайг отон хэвтэв. Арслан мэт гэтэв.

¹¹Зам юугаас минь угзран гаргаж хэсэгчлэн тастав. Сүйрэл болгов, намайг.

¹²Нум юугаа Тэрээр татжээ. Сумных нь бай би байлаа.

¹³Бөөрийг минь саадагныхаа сумаар нэвт сүлбэв.

¹⁴Өөрөө би ард олны тохуурхал болжээ Өдөр тутмынх нь элэглэл дуу мөн ажээ.

¹⁵Гашуун өвсийг хоол болгон идүүлэв. Шарилж мэт ундааг бас Тэр уулгав.

¹⁶Хайрга зажлуулж шүд хугалав, Хөөрхий намайг тоосонд хутгав.

¹⁷Амар амгалангаас амь минь хагацав. Амсах жаргалыг бас мартав.

¹⁸Иймд “Хүч чадал минь ч, ЭЗЭНээс хүлээх найдвар минь ч бас мөхөв” гэж би өчлөө.

¹⁹Зовлон зүдүүр болон тэнүүчлэлээ бодох тусам Шарилж ба хор мэт гашуун.

²⁰Ахуй сэтгэл минь үүнийг санах тусам Алд биедээ агшиж гудайв.

²¹Гэвч оюун бодолдоо тунгаах тусам Найдвар бас надад байна аа.

²²ЭЗЭНий хайр энэрэл дуусдаггүй Өршөөл юунд нь төгсгөл үгүй.

²³Өглөө бүр энэ нь цоо шинэ. Таны итгэлт байдал юутай аугаа вэ.

²⁴“ЭЗЭН миний хувь” гэж Амин сэтгэлээсээ Би өгүүлдэг “Түүнд л хамаг найдлага минь буй”

²⁵Хүсэн хүлээгсэд хийгээд Өөрийг нь хайгсдад ЭЗЭН сайн.

²⁶ЭЗЭНий авралыг тэрээр чимээгүйхэн хүлээх нь сайн.

²⁷Залуу насандаа буулгыг үүрэх нь сайн.

²⁸Тохогч нь Тэр тул ганцаар суун, чимээгүй бай.

²⁹Хошуу юугаа шороонд хийг, Үүнд найдвар байж магад.

³⁰Хацраа бас цохигчид өг, Зэмлэлээр тэр дүүрэг.

³¹Эзэн татгалзсан ч мөнхөд бус.

³²Энэлэлд Тэр хүргэсэн ч Энэрэл хайр нь аугаа тул өршөөл нь бат.

³³Хэнийг ч зовоож, энэлгэхийг үл хүсэгч нь Тэр билээ.

³⁴Нутгаа хоригдлуудын хөлд талхлуулж,

³⁵Хамгийн Дээд Нэгэний оршихуйн өмнө Шударга хүн үгүйсгэгдэж,

³⁶Хэн нэгний хэрэг явдал хэлбэрэхэд Эзэн хардаггүй гэж үү?

³⁷Эзэн л тушаагаагүйсэн бол хэн хэлээд л хэрэгжүүлчихдэг билээ?

³⁸Сайн ба сайн бус нь Хамгийн Дээд Нэгэний амнаас л гардаг бус уу?

³⁹Ийн атал гэм нүглийн шийтгэл буулаа гэж Амьсгаат нэгэн нь гоморхоно гэж үү?

⁴⁰Зам мөрөө нягтлаад, ЭЗЭНий зам уруу эргэцгээе.

⁴¹Зүрхээ тэнгэр дэх Бурхандаа хандуулж Гараа бас сунгая.

⁴²Нүгэл үйлдэн, тэрсэлсэн Биднийгээ Та эс уучлав.

⁴³Хилэн тань Таныг бүрхжээ, Бид хөөгдөн мөшгөгдөв. Өршөөл үгүйгээр биднийг бас хядав.

⁴⁴Үүл Таныг бүрхжээ, Залбирал минь эс нэвтэрнэм.

⁴⁵Биднийгээ ард түмнүүдийн дундах ялгадас хог болгов,

⁴⁶Бүх дайсан маань бидний эсрэг Ам юугаа ангайв

⁴⁷Цочрол гансрал нөмрөн унал сүйрэлд оров.

⁴⁸Гол мэт нулимс минь урсана, Ард олны охин минь сүйрчээ.

⁴⁹Нүдний минь нулимс тасрах ч, татрах ч үгүй агаад

⁵⁰Тэнгэрээс ЭЗЭНийг доош өнгийх хүртэл Энэ маань үргэлжилнэ.

⁵¹Хот болон охидоо хэрхсэнийг Нүд минь үзээд, зүрх минь зүсэгдэв.

⁵²Шалтаггүйгээр дайсандаа шувуу мэт харвуулав.

⁵³Чулуугаар таглуулж, нүхэн дотор чимээгүй болов.

⁵⁴Толгой дээр минь ус урсав. “Амь таслагдав” гэж би хэлэв.

⁵⁵Гүнээс нэрийг тань би дуудлаа, ЭЗЭН!

⁵⁶“Сонороо бүү холдуулаач! Гуйж байна, Тайтгарал минь” гэх дууг минь Та сонссон.

⁵⁷Дуудахад минь Та ойртон ирээд “Бүү ай!” гэж наддаа бас айлдав.

⁵⁸Ай Эзэн, сэтгэлийн минь хэрэг өмгөөлөл олж, Амь амьдрал минь золилт хүртэв.

⁵⁹Ай ЭЗЭН, дарамтыг минь харжээ. Хэргийг минь Та шүүгээч.

⁶⁰Та харсан билээ, Өс хонзон, далд явуулга бүгдийг.

⁶¹ЭЗЭН, Та сонссон билээ, Зэмлэл хийгээд далд явуулга бүхнийг.

⁶²Дайрагчдын маань уруул хийгээд шивнээ нь Өдөржин миний эсрэг байна.

⁶³Сууж, босохыг нь алдалгүй хараач. Тэдний шог дуу нь намайг өгүүлнэ.

⁶⁴ЭЗЭН, Та хариу цохиоч, Гарынх нь үйлсэд хариулаач.

⁶⁵Хатуу зүрхээр тэдэнд хандаж, Хараал тань тэдний дээр байг.

⁶⁶Уурандаа тэднийг мөшгөөч Устгаач тэднийг ЭЗЭНий тэнгэр дороос!