Read Ariun Bible 2013 – Ариун Библи 2013 Гашуудал 4 Bible Online

Гашуудал 4 - Ariun Bible 2013 – Ариун Библи 2013 bible

Гашуудал 4

¹Алт хичнээн харлаж, цэвэр алт гундав! Алмаас эрдэнэ нь асгаран бутарч, Гудамны буланд хөглөрөв.

²Шижир алтны үнэтэй Сионы эрдэнэт хөвгүүдийг Ваарчны гарын ажил болох үнэгүй шавар ваар мэт үзэв!

³Цөөвөр чоно ч гэсэн бэлтрэгнүүдээ Хөхөөрөө амлуулж тэжээдэг атал Ард түмэн гэдэг охин минь Цөлд хаягдсан тэмээн хяруул мэт харгислал амсав.

⁴Нялхас минь цангаж, хэл тагнай нь зуурчээ. Багачууд талх нэхэвч хувааж өгөгч нь алга.

⁵Амттаны дээдийг иддэгүүд минь гудманд адлагдав. Даавууны сайныг өмсдөгүүдэд минь Үнс, хогийн сав тэврүүлэв.

⁶Учир нь ард түмэн гэдэг охины минь хилэнц Содомын нүглээс ч үлэмж их ажээ. Хормын дотор хөмрүүлэгдсэн Содом уруу Ямар ч гар эргээгүй билээ.

⁷Ихэс дээдэс минь цаснаас ч цэвэр, сүүнээс ч цагаан байлаа. Тэд биеэрээ шүрнээс ч илүү улаахан, өнгө нь индранил мэт байлаа.

⁸Төрх нь өдгөө хөөнөөс ч хар, гудамжинд ч танигдахгүй болжээ. Арьс нь ясан дээрээ хорчийн хатаж, мод мэт болжээ.

⁹Өлсгөлөнд үрэгдэгсдээс илдээр алуулагсад дээр агаад Талын үр жимс дутагдсанаас Тэд цохигдон хатаж гандана.

¹⁰Өрөвч эмэгтэйчүүд хүртэл Өөрийнхөө гараар хүүхдээ чанахад хүрэв. Ард түмэн гэдэг охин минь Сүйрлийн улмаас хүүхдүүдээрээ хооллов.

¹¹ЭЗЭН хилэнгээ гүйцэлдүүлж, догшин хилэнгээ асган Түймрийн гал илгээн Сионыг туурь болтол шатаав.

¹²Өстөн ба дайсан нь Иерусалимын гулдан хаалгуудаар орно гэдэгт Газар дэлхийн хаад ч, дэлхийн оршин суугчид ч итгэж байгаагүй.

¹³Эш үзүүлэгчид нь нүгэлд унасан, Тахилч нар нь хилэнцэд ороогдон Шударга хүний цусыг урсгасан тул

¹⁴Гудамжинд тэд өдгөө бэдрэн явахад Хувцсанд нь хэн ч хүрч чадахааргүй болтол Тэд цусаар бузарлагдсан байлаа.

¹⁵“Зайлагтун! Бузар” хэмээн хүмүүс тэдэн уруу хашхирна. “Зайл, зайл, бүү хүр!” Тэгээд тэд зугтан хэсүүчилж, “Тэд цаашид энд суух ёсгүй” гэж Үндэстнүүдийн дунд хэлэгдэв.

¹⁶Тэднийг тараагч нь ЭЗЭН агаад тэд ойшоогдохоо болив. Тахилч нар үл хүндлэгдэж, Ахмадууд эс хайрлагдав.

¹⁷Тусламж хайвч сураггүй тул нүд сүүмийв. Аврал хайн улс орнуудыг харуулдавч эс олдов.

¹⁸Алхааг минь отох тул Гудамжнууддаа гарч алхаж чадахгүй нь ээ Төгсгөл маань ойртож, Өдрүүд минь тоологдон төгсгөл маань иржээ.

¹⁹Мөшгөгчид маань тэнгэрийн бүргэдээс хурдан агаад Уулсын дээгүүр биднийг хөөв. Цөлд отон хүлээв.

²⁰ЭЗЭН минь, Таны тосолсон, бидний амьдралын амьсгаа тулгуур бологсод Дайсныхаа нүхэнд унаж олзлогдов. “Сүүдэр дор нь бид харь үндэстнүүдийн дунд амьдарна” хэмээн хэлж байсан бус уу?

²¹Узын нутаг дахь Едом охин! Баясан, баярлан хөөрч л бай! Аяга чам уруу ч тойрон ирнэ Чи согтууран өөрийгөө нүцгэлнэ.

²²Сион охин минь, хилэнц чинь дууслаа. Тэр чамайг цаашид цөлөхгүй. Едом охин минь, Хилэнцийг чинь Тэрээр шийтгэх л болно. Нүглүүдийг чинь дэлгэх л болно!