Read Ariun Bible 2013 – Ариун Библи 2013 Езекиел 1 Bible Online

Езекиел 1 - Ariun Bible 2013 – Ариун Библи 2013 bible

Езекиел 1

¹Гуч дахь оныхоо[1] дөрөвдүгээр сарын тавны өдөр намайг Хебар голын дэргэд цөлөгдөгсдийн дунд байхад тэнгэр нээгдэж, би Бурханы үзэгдлүүдийг үзэв.

²(Иехоиахин хааны цөллөгийн тавдугаар он байв.) Тэр сарын таванд

³халдеичуудын нутгийн Хебар голын дэргэд Бузын хөвгүүн, тахилч Езекиелд ЭЗЭНий үг тодорхойгоор иржээ. Тэнд ЭЗЭНий мутар түүний дээр ирэв.

⁴Харагтун, умардаас салхи шуурга, үргэлжлэн цацарч гялбах галтай асар том үүл ирэхийг би харлаа. Түүнийг нь тойрон хурц гэрэл, галын голд нь улайссан төмөр мэт зүйл байв.

⁵Түүн дотор дөрвөн амьд биет үзэгдлээ. Дүр төрх нь хүмүүн мэт боловч

⁶тэд тусбүрдээ дөрөв дөрвөн нүүр, дөрөв дөрвөн далавчтай аж.

⁷Хөл нь цэх, хөлийн ул нь тугалын туруу мэт агаад өнгөлсөн хүрэл адил гялалзаж байв.

⁸Далавчнуудынх нь доор, дөрвөн талд нь хүний гар байв. Тэр дөрвийн нүүр, далавчнуудын хувьд,

⁹далавчнууд нь хоорондоо шүргэн, хөдлөх үед нүүрнүүд нь эс эргэнэ. Бүгд чигээрээ урагшилж байлаа.

¹⁰Нүүрнүүдийнх нь дүрс болбоос тусбүр хүний нүүртэй, дөрвүүлээ баруун талдаа арслангийн нүүртэй, зүүн талдаа бухын нүүртэй мөн дөрвүүлээ бүргэдийн нүүртэй байлаа.

¹¹Нүүрнүүд нь тийм байв. Далавчнууд нь дээгүүр дэлгэгдсэн агаад тусбүр нь нөгөөхөө шүргэсэн хоёр, биеэ бүрхсэн хоёр далавчтай байв.

¹²Тэд тусбүр чигээрээ явж байлаа. Сүнс хааш явах гэнэ тэд явж, явах үедээ эс эргэнэ.

¹³Амьд биетүүдийн голд, галд шатаж буй нүүрс мэт, амьд биетүүдийн дунд нааш цааш хөдөлж буй бамбарууд мэт харагдах нэг юм байв. Гал нь гэрэлтэй бөгөөд тэр галаас аянга гялбаж байлаа.

¹⁴Амьд биетүүд аянгын гялбаа мэт нааш цааш цахилж байлаа.

¹⁵Намайг амьд биетүүдийг харж байхад үзэгтүн, тэр дөрвөн амьд биетийн дэргэд, тусбүр дөрвүүлэнд нь зориулагдсан нэг нэг дугуй газар дээр байв.

¹⁶Дугуйнуудын гадна төрх, хийц нь гялалзсан биндэрьяа мэт, тэд дөрвүүл адил хэлбэртэй байв. Тэдний гаднах төрх, хийц гэвэл нэг дугуй нөгөө дугуйны дотор байгаа мэт байв.

¹⁷Тэд хөдлөх бүрдээ дөрвөн зүгийнхээ аль нэг уруу чиглэн явж, явах үедээ эс эргэнэ.

¹⁸Мөөрнүүд нь сүрлэг болоод аймшигтай, тэр дөрвөн дугуйн мөөрнүүдийг тойрон дүүрэн нүд байлаа.[2]

¹⁹Амьд биетүүд хөдлөх бүрд дугуйнууд тэдэнтэй хамт хөдөлж мөн амьд биетүүд газраас дээш өргөгдөх бүрд дугуйнууд ч бас өргөгддөг байв.

²⁰Сүнс хаашаа явах гэнэ, тэд Сүнсний явсан тийш явж, дугуйнууд нь тэдэнтэй цуг өргөгдөв. Учир нь амьд биетүүдийн сүнс дугуйнууд дотор ажээ.

²¹Тэдгээрийг явахад эдгээр нь ч явж, тэдгээрийг зогсоход эдгээр нь зогсох ажээ. Амьд биетүүдийг газраас өргөгдөхөд дугуйнууд тэдэнтэй цуг өргөгдөнө. Учир нь амьд биетүүдийн сүнс нь дугуйнууд дотор аж.

²²Амьд биетүүдийн толгой дээгүүр нь огторгуйн мандал мэт, сүрдмээр болор мэт нэгэн зүйл тэдний толгой дээрээс дэлгэгдсэн байв.

²³Мөнхүү огторгуйн мандал дор далавчууд нь нэг нь нөгөөгийнхөө зүгт, шулуухан сунгагдсан байв. Тусбүр нь биеийнхээ нэг ба нөгөө талд биеэ бүтээсэн хоёр далавчтай байв.

²⁴Тэднийг явах үед их усны шуугиан мэт Төгс Хүчит Нэгэний дуу адил далавчуудынх нь чимээг буюу хуарангийн чимээ мэт хөл үймээний чимээг би сонсов. Тэд зогсохдоо далавчуудаа буулгаж байв.

²⁵Тэдний толгой дээрх мөнөөх огторгуйн мандал дээрээс дуу гарлаа. Тэд зогсох бүрдээ далавчуудаа буулгаж байлаа.

²⁶Тэдний толгой дээгүүрх мөнөөх огторгуйн мандлын дээд талд гадна төрхөөрөө индранил чулуун сэнтийтэй төстэй нэгэн юм байжээ. Сэнтийтэй төстэй уг юмны дээр өндөрт хүний төрхтэй дүрс байв.

²⁷Тэгээд би харвал, түүний ууцнаас дээших төрхнөөс нь дотроо мөн эргэн тойрондоо гал мэт харагдах улайссан төмөр мэт юм байх агаад түүний ууц ба түүнээс дооших төрхнөөс нь гал мэт юм бас үзэгдэн түүний эргэн тойронд туяа байв.

²⁸Эргэн тойрны туяа нь бороотой өдрийн үүлэн дэх солонго адил байлаа. Үзэгдэх төрх нь ЭЗЭНий цог жавхлантэй адил байв. Би түүнийг хармагцаа нүүрээрээ унаад, айлдагч нэгний дууг сонсов.