Read Ariun Bible 2013 – Ариун Библи 2013 Езекиел 10 Bible Online

Езекиел 10 - Ariun Bible 2013 – Ариун Библи 2013 bible

Езекиел 10

¹Тэгээд би харлаа. Харагтун, херубуудын толгой дээрх огторгуйн мандалд төрхөөрөө сэнтийтэй төстэй индранил чулуу адил юм байв.

²Тэр маалинган хувцас өмссөн хүнд —Херубуудын доор буй эргэлдэгч дугуйнуудын хооронд нэвтрэн орж, херубуудын дундаас галтай нүүрсээр атгаа дүүргэн хотын дээгүүр цац гэж айлдав. Намайг харж байхад тэр дотогш оров.

³Өнөөх хүнийг нэвтрэн ороход херубууд нь сүмийн баруун талд зогсож байлаа. Тэгээд дотоод хүрээг үүл дүүргэв.

⁴Дараа нь ЭЗЭНий цог жавхлан херубээс дээшлэн сүмийн босгыг чиглэсэн бөгөөд сүм үүлээр дүүрч, хашаа нь ЭЗЭНий цог жавхлангийн туяагаар дүүрэв.

⁵Түүнээс гадна, херубуудын далавчны чимээ нь Төгс Хүчит Бурханы ярих үеийн дуу хоолой мэт гаднах хашаанд хүртэл сонсдов.

⁶Тэгээд тэр маалинган хувцас өмссөн хүнд тушаан —Эргэлдэгч дугуйнуудын хоорондоос, херубуудын хоорондоос галыг ав хэмээхэд өнөөх нь дотогш орж, дугуйны дэргэд зогсов.

⁷Тэгэхэд херубуудын дунд байсан гал уруу нэг херуб нь херубуудын хоорондоос гараа сунган галаас авч, маалинган хувцас өмссөн хүний хоёр алган дээр түүнийг тавив. Тэр түүнийг нь аваад гарав.

⁸Херубуудын далавчных нь доор хүний гарын дүрстэй юм харагдав.

⁹Тэгээд намайг харахад, үзэгтүн, херубуудын дэргэд дөрвөн дугуй, херуб болгоны дэргэд нэг нэг дугуй байлаа. Дугуйнуудын төрх нь биндэръяан гялбаа адил байв.

¹⁰Дүр төрх нь гэвээс тэд дөрвүүлээ нэг адил, дугуйны дотор дугуй буй мэт байв.

¹¹Тэд хөдлөн, дөрвөн зүгийн алийг нь ч чиглэн явахдаа эс эргэв. Харин тэд явах үедээ эргэлгүйгээр, чиглэсэн зүгээ даган явж байв.

¹²Бүхий л бие, нуруу, гар, далавч нь бас тэр дөрөвт харьяалагдах дугуйнууд нь эргэн тойрондоо дүүрэн нүдтэй байв.

¹³Намайг сонсож байхад тэр эргэлдэгч дугуйнууд дуудагджээ.

¹⁴Тусбүр дөрвөн нүүртэй байв. Эхний нүүр нь херубын нүүр, хоёр дахь нүүр нь хүний нүүр, гурав дахь нь арслангийн нүүр мөн дөрөв дэх нь бүргэдийн нүүр байв.

¹⁵Тэгээд херубууд нь дээш босов. Тэд бол Хебар голын дэргэд миний үзсэн амьд биетүүд юм.

¹⁶Херубуудыг явахад дугуй ч хажууд нь явдаг. Мөн херубуудыг газраас хөөрөхөөр далавчнуудаа дэлгэхэд дугуй ч эргэж, эс салан дэргэд нь байв.

¹⁷Херубуудыг тогтуун зогсох үед дугуй ч тогтуун зогсож, дээшээ хөөрөхөд нь дугуй ч тэдэнтэй хамт хөөрөв. Учир нь амьд биетүүдийн сүнс тэдний дотор байсан.

¹⁸Тэгээд ЭЗЭНий цог жавхлан сүмийн босгоноос салж, херубуудын дээр тогтлоо.

¹⁹Херубууд нь одохдоо нүдний минь өмнө далавчаа дэлгэн дэргэдэх дугуйнуудтай хамт газраас дээш хөөрөв. ЭЗЭНий өргөөний зүүн хаалганы орох үүдэнд зогсоход нь Израилийн Бурханы цог жавхлан дээр нь байв.

²⁰Тэдгээр нь Хебар голын дэргэд Израилийн Бурханы доор миний үзсэн амьд биетүүд юм. Тиймээс би тэднийг херубууд мөн болохыг мэдэв.

²¹Тэд тусбүр дөрвөн нүүртэй, тусбүр дөрвөн далавчтай байв. Далавчных нь доор хүний гар мэт хэлбэртэй юм байв.

²²Тэдгээрийн нүүрний төрх нь, Хебар голын дэргэд миний үзсэн тэдгээр царай төрхтэй адил байв. Тусбүр чигээрээ урагшлав.