Read Ariun Bible 2013 – Ариун Библи 2013 Езекиел 21 Bible Online

Езекиел 21 - Ariun Bible 2013 – Ариун Библи 2013 bible

Езекиел 21

¹ЭЗЭНий үг надад ирж —

²Хүний хүү, нүүрээ Иерусалимын зүг харуулж, ариун газруудын эсрэг өгүүлэн Израилийн газрын эсрэг эш үзүүлэгтүн.

³Израилийн газарт “ЭЗЭН айлдахдаа «Харагтун, Би та нарын эсрэг байна. Би илдээ хуйнаас нь сугалж, дотроос чинь зөвт ба буруутын аль алийг тасална.

⁴Дундаас чинь Би зөвт ба буруутын аль алийг нь таслахаар илд минь хуйнаасаа сугарч, өмнөдөөс умард хүртэл бүх махбодын эсрэг явна.

⁵Ийнхүү ЭЗЭН Би илдээ хуйнаас нь сугалсан гэдгийг бүх махбод мэдэх болно. Түүнийг буцааж хийхгүй» хэмээв” гэж хэл.

⁶Харин хүний хүү чиний хувьд, элэг эмтрэм, гашуун зовлонтойгоор гасал, тэдний нүдэн дээр гасал.

⁷Тэд чамд “Юунд чи гасална вэ?” хэмээвэл чи “Ирж буй мэдээнд. Хамаг зүрх зориг нь мохож, бүх гар суларч, хамаг сүнс доройтож, бүх өвдөг ус мэт чичирнэ. Харагтун, тэр нь ирж буй бөгөөд биелнэ. Эзэн БУРХАН тунхаглаж байна” гэж хэл гэв.

⁸Дахиад ЭЗЭНий үг надад ирж,

⁹«Хүний хүү, эш үзүүл. “Эзэн ингэж айлдаж байна” гэж өгүүл. Илд, илд хурцлагдаж, өнгөлөгдөв.

¹⁰Аллага хийхээр хурцлагдаж, Аянга мэт гялбуулахаар өнгөлөгдөв. Хүүгийн минь таяг нь Дэг бүрийг жигшиж байна. Бид баясах юм уу?[14]

¹¹Түүнийг гарт бариулахын тулд өнгөлүүлэхээр өгөгдсөн. Алуурчны гарт өгөгдөх илд хурцлагдаж, өнгөлөгдөв.

¹²Хүний хүү, хашхиран цурхир. Учир нь тэрээр ард түмний минь эсрэг, Израилийн бүх түшмэлийн эсрэг юм. Тэднийг ард түмэнтэй минь хамт илдэнд өгсөн учир гуяа цохь.

¹³Учир нь энд сорилт буй. Жигшигч таяг ч хүртэл цаашид байхгүй байвал юу болох вэ? гэж Эзэн БУРХАН тунхаглаж байна.»[15]

¹⁴«Тиймээс хүний хүү, эш үзүүлэн алгаа таш. Аллагын илдийг гурав дахь удаагаа хоёр дахин том болго. Тэднийг хүрээлсэн, асар их аллагын илд энэ юм.

¹⁵Энэ нь тэдний зүрхнүүд хайлж, Бүх дааман хаалган дээр нь олон хүн унахын тулд юм. Надад гялалзсан илд өгөгдсөн. Аяа! Үүнийг аянга мэт цохихоор бүтээж, Алахад бэлэн болгож ирлэсэн.

¹⁶Баруун тийш ч, зүүн тийш ч довтол. Царай чинь хаа зүглэнэ, тийшээ яв.[16]

¹⁷Би бас алга хавсарч, хилэнгээ намдаана. ЭЗЭН Би айлдлаа.»

¹⁸ЭЗЭНий үг надад ирж —

¹⁹Хүний хүү чиний хувьд, Вавилоны хааны илд ирэхийн тулд хоёр зам тавь. Тэр нь хоёулаа нэг газраас гарах болно. Тэмдгийг үйлд. Түүнийг хотыг чиглэх замын эхэнд тавь.

²⁰Аммоны хөвгүүдийн Рабба уруу эсвэл Иуда уруу бэхлэгдсэн Иерусалимын дотор орох илдэнд зориулсан замыг чи тэмдэглэх ёстой.

²¹Учир нь Вавилоны хаан мэргэ төлгийг ашиглахаар замын уулзвар дээр, хоёр замын эхэнд зогсож байна. Тэрээр сумаа сэгсэрч,[17] гэрийн шүтээнүүдээс асууж, элэг шинжиж байна.

²²Баруун гарт нь “Иерусалим уруу” хэмээх мэргэ төлгө таарсан нь хэрэм эвдэгчийг тавьж, аллагад зориулан ам нээж, чанга дуугаар уухайлж, хэрэм эвдэгчүүдийг дааман хаалганы зүг чиглүүлж, овоо босгож, далан ухахын тулд юм.

²³Энэ нь тэдний нүдэнд худал мэргэ төлгө мэт болно. Тэд тангараг тавьсан билээ. Гэвч тэднийг баривчлуулахын тулд тэрээр хилэнцийг сануулжээ.

²⁴Тиймээс Эзэн БУРХАН ингэж айлдаж байна. “Та нарын хилэнцийг сануулж, гэмт үйлдлийг чинь дэлгэсэн бөгөөд ингэснээр бүх нүгэл, хамаг үйлдэл чинь үзэгдэв. Та нарт сануулсан учир та нар гарт авагдах болно.

²⁵Харин Израилийн бузар буруут ноён чиний төгсгөлийн шийтгэлийн цаг, чиний өдөр иржээ”

²⁶Эзэн БУРХАН ингэж айлдаж байна. “Малгайг авч, титмийг тайл. Энэ нь цаашид урьдынх шигээ байхгүй. Дорд нэгнийг өргөмжил, өндөрт буй нэгнийг дорд үз.

²⁷Би түүнийг балгас, балгас, балгас болгоно. Эрхт Нэгэнийг ирэх хүртэл тэр нь тогтохгүй бөгөөд Би үүнийг Түүнд өгнө.”

²⁸Хүний хүү чи, эш үзүүлэн “Эзэн БУРХАН Аммоны хөвгүүд ба доромжлолынх нь тухай ингэж айлдаж байна” гэж хэл. “Илд, илд сугалагдсан, аянга мэт байж залгихын төлөө аллагад өнгөлөгдсөн байна.

²⁹Чамд зориулан хуурамч үзэгдлүүдийг үзэж, худал хуурмагийг төлгөлсөөр, тэд чамайг өдөр нь ирж шийтгэлийн цаг нь болсон эдгээр бузар буруутуудын хүзүүн дээр байрлуулж байна.

³⁰Түүнийг хуйнд нь буцаа. Чиний бүтээгдсэн, үүссэн газарт чинь Би чамайг шүүнэ.

³¹Би чиний дээрээс зэвүүцэлээ асгаж, хилэнгийнхээ галаар чам уруу тургих бөгөөд алж устгахдаа чадварлаг, харгис хүмүүсийн гарт Би чамайг тушаана.

³²Чи галын түлээ, газарт шингэх цус болно. ЭЗЭН Би нэгэнт айлдсан тул чи дурсагдахгүй.”