Read Ariun Bible 2013 – Ариун Библи 2013 Езекиел 24 Bible Online

Езекиел 24 - Ariun Bible 2013 – Ариун Библи 2013 bible

Езекиел 24

¹Есдүгээр оны аравдугаар сард, уг сарын арванд ЭЗЭНий үг надад ирж —

²Хүний хүү, яг энэ өдрийг, энэхүү өдрийн нэрийг бич. Яг энэ өдөр Вавилоны хаан Иерусалимын эсрэг бүслэлт босголоо.

³Тэрслүү гэрт сургаалт зүйрлэлийг өгүүлэн тэдэнд “Эзэн БУРХАН ингэж айлдаж байна. «Тогоогоо тавь, тогоогоо тавь, Бас дотор нь ус хий.

⁴Хэсгүүд, бүх сайн хэсгүүдийг дотор нь хий, Гуя хаа, шилсэн яснуудаар дүүргэ.

⁵Хонин сүргээс шилдгийг ав. Мөн тогоон дор түлээ овоол. Үүнийгээ сайтар чана. Доторх яснуудыг нь буцалга»

⁶Тиймээс Эзэн БУРХАН ингэж айлдаж байна. «Цуст хот, өнгөр нь үл арилах өнгөртэй тогоо золгүй еэ. Түүнээс хэсэг хэсгийг сонголгүйгээр гарга.

⁷Учир нь түүний цус голд нь байна. Тэр түүнийгээ нүцгэн хадан дээр урсгажээ. Тэр цусаа шороонд хучигдахаар газарт асгасангүй.

⁸Өшөө авах хилэн гарч ирэхээр, Би түүний цусыг далдлуулахгүйн тулд нүцгэн хадан дээр урсгасан»

⁹Тиймээс, Эзэн БУРХАН ингэж айлджээ. «Цуст хот золгүй еэ! Би бас мод овоолсныг агуу их болгоно.

¹⁰Мод овоолон гал ноцоож, Махыг сайтар чанаж, амтлагчуудаар амтал. Яснууд нь шатаагдаг.[23]

¹¹Хоосон тогоог нүүрсэн дээр тавь. Ингэснээр тэр халж, хүрэл нь гялалзан Доторх бузар нь хайлж, өнгөр нь арилах юм.

¹²Тэр Намайг нөр их хөдөлмөрөөр ядраажээ. Гэсэн ч түүний үлэмж их өнгөр нь түүнээс арилсангүй. Түүний өнгөр нь гал дотор байг!

¹³Чамайг Би булай завхайрлаас чинь цэвэршүүлсэн атал Чи цэвэр бус байна. Би чам дээр хилэнгээ гүйцээх хүртэл Чи дахин цэвэршүүлэгдэхгүй.

¹⁴ЭЗЭН Би айлдав. Энэ нь ирж буй бөгөөд Би үйлдэх болно. Би зөөлрөхгүй, Би өрөвдөхгүй, Би харамсахгүй. Зам ба үйлсийн чинь дагуу Би чамайг шүүнэ» гэж Эзэн БУРХАН тунхаглаж байна.”

¹⁵Тэгээд ЭЗЭНий үг надад ирж —

¹⁶Хүний хүү чи, харагтун, Би нэг үлээлтээр нүдний чинь хүслэнг чамаас авах гэж байна. Гэвч чи гаслах ёсгүй, уйлах ёсгүй, нулимс чинь ч урсах ёсгүй.

¹⁷Чимээгүй гашууд. Үхэгсдийн төлөө бүү гасал. Толгойдоо даавуу ороож, хөлдөө гутал өмс. Сахлаа бүү далдал. Хүмүүсийн талхыг бүү ид гэв.

¹⁸Тиймээс өглөө нь би хүмүүст яриад, үдэш нь миний эхнэр үхлээ. Өглөө нь надад тушаасан ёсоор би үйлдсэн.

¹⁹Хүмүүс надаас —Чиний үйлдэж буй энэ зүйлс бидний хувьд ямар учиртай болохыг чи бидэнд хэлж өгөхгүй юм уу? гэж асуув.

²⁰Тэгээд би тэдэнд —ЭЗЭНий үг надад ирж,

²¹“Израилийн гэрт өгүүлэхдээ «Эзэн БУРХАН ингэж айлдаж байна. “Харагтун. Хүч чадлын чинь сүр, нүдний чинь хүслэн, сэтгэлийн чинь баясгалан болох ариун газраа Би буртаглах гэж байна. Та нарын ардаа орхисон хөвгүүд, охид чинь илдэнд унана.

²²Та нар Езекиелийн үйлдсэн адил үйлдэх болно. Та нар сахлаа далдлахгүй, хүмүүсийн талхыг идэхгүй.

²³Толгойдоо боолт ороож, хөлдөө шаахай өмссөн чигээрээ та нар гаслахгүй, уйлахгүй, харин хилэнц дотроо ялзран бие биедээ ёолох болно.

²⁴Тийнхүү Езекиел нь та нарт тэмдэг болно. Түүний үйлдсэн бүхний дагуу та нар ч үйлдэх болно. Энэ нь биелэхэд та нар Намайг Эзэн БУРХАН мөн гэдгийг мэдэх болно.”»

²⁵“Хүний хүү чиний хувьд, Би тэдний бардамналын баясгалан, нүдний хүслэн, зүрхний баясал нь болох бат цайзыг мөн хөвгүүд охидыг нь авах тэр өдөрт,

²⁶тэр өдөр амь мултарсан нэгэн нь чихэнд чинь мэдээ мэдүүлэхээр чамд ирэх бус уу?

²⁷Тэр өдөр амь мултарч ирсэн тэр хүнд ам чинь нээгдэж, цаашид хэлгүй байхгүй, чи ярина. Тийнхүү чи тэдэнд тэмдэг болж, тэд Намайг ЭЗЭН мөн гэдгийг мэдэх болно”