Read Ariun Bible 2013 – Ариун Библи 2013 Езекиел 25 Bible Online

Езекиел 25 - Ariun Bible 2013 – Ариун Библи 2013 bible

Езекиел 25

¹ЭЗЭНий үг надад ирж —

²Хүний хүү чи, Аммоны хөвгүүдийн зүг нүүрээ хандуулж, тэдний эсрэг эш үзүүлэн

³Аммоны хөвгүүдэд өгүүл. “Эзэн БУРХАНы үгийг сонс! Эзэн БУРХАН ингэж айлдаж байна. «Ариун газар минь бузарлагдан Израилийн газар эзгүйрч, Иудагийн гэр цөлөгдөн явсан үед та нар тэдний эсрэг “ха ха” хэмээсэн.

⁴Тиймээс харагтун, Би та нарыг дорнын хөвгүүдэд өмч болгон өгөх гэж байгаа бөгөөд тэд чиний хотон дунд хуарангаа барьж, сууцаа босгон үр жимсийг чинь идэж, сүүг чинь уух болно.

⁵Би Раббаг тэмээний бэлчээр, Аммоны хөвгүүдийг хонины хэвтэр болгоно. Тийнхүү та нар Намайг ЭЗЭН мөн гэдгийг мэдэх болно”

⁶Учир нь Эзэн БУРХАН ингэж айлдаж байна. «Та нар алга ташиж, хөлөө дэвсэлж, Израилийн нутгийн эсрэг жигшилт зүрхээрээ баяссан тул,

⁷харагтун, Би та нарын эсрэг мутраа сунгаж, та нарыг үндэстнүүдэд олз болгон өгнө. Би та нарыг ард түмнүүдээс таслан та нарыг газруудаас устгана. Би та нарыг сөнөөнө. Ийнхүү та нар Намайг ЭЗЭН мөн гэдгийг мэдэх болно.»

⁸Эзэн БУРХАН ингэж айлдаж байна. «Моаб Сеир нар “Харагтун, Иудагийн гэр нь бүх үндэстэнтэй адил юм” хэмээсэн.

⁹Тиймээс харагтун, Би тэр нутгийн алдар нь болох Бет-иешимот, Баал-меон, Кириатаим, түүний хил хязгаар дахь хотуудыг, Моабын хотуудын хажуу бөөрийг нээх гэж байна.

¹⁰Би түүнийг Аммоны хөвгүүдийн хамт дорнын хөвгүүдэд өмч болгон өгөх нь Аммоны хөвгүүд үндэстнүүдийн дунд дурсагдахгүй байхын тулд юм.

¹¹Тийнхүү Би Моабт шүүхийг хэрэгжүүлж, тэд Намайг ЭЗЭН мөн гэдгийг мэдэх болно.»

¹²Эзэн БУРХАН ингэж айлдаж байна. «Едом нь өшөө авснаараа Иудагийн гэрийн эсрэг үйлдэн эмгэнэлт гэмд унаж, өөрсдийгөө тэдэнд өширхөгч болгосон.»

¹³Тиймээс Эзэн БУРХАН ингэж айлдаж байна. «Би бас Едомын эсрэг мутраа сунгаж, түүнээс хүн амьтныг таслах болно. Би түүнийг балгас болгоно. Теманаас Дедан хүртэл тэд илдэнд унана.

¹⁴Миний ард түмэн Израилийн гараар Би Едомоос өшөөгөө авах болно. Тиймээс уурын минь дагуу, хилэнгийн минь дагуу Едомд үйлдэх болно. Тийнхүү тэд өшөө авалтыг минь мэдэх болно» гэж Эзэн БУРХАН тунхаглаж байна.

¹⁵Эзэн БУРХАН ингэж айлдаж байна. «Филистчүүд эртний дайсагналаар устгахын тулд өс хонзонгоор үйлдэж, жигшсэн зүрхээр өшөө авчээ.»

¹⁶Тиймээс Эзэн БУРХАН ингэж айлдаж байна. «Харагтун, Би филистчүүдийн эсрэг мутраа сунгаж, керетчүүдийг ч хүртэл таслан тэнгисийн эргийн үлдэгсдийг ч устгана.

¹⁷Би тэдний дээр хилэгнэлийн зэмлэлтэй хамт агуу өшөө авалтыг гүйцэлдүүлэх болно. Би тэдний дээр өшөө авалтаа тавих үед тэд Намайг ЭЗЭН мөн гэдгийг мэдэх болно» гэв.