Read Ariun Bible 2013 – Ариун Библи 2013 Езекиел 27 Bible Online

Езекиел 27 - Ariun Bible 2013 – Ариун Библи 2013 bible

Езекиел 27

¹Түүнээс гадна ЭЗЭНий үг надад ирж —

²Хүний хүү чи, Тирийн тухай гашуудлыг гарга.

³Далайн үүдэнд оршиж, олон эргийн хүмүүсийн худалдааны газар Тирт өгүүл. “Эзэн БУРХАН ингэж айлдаж байна. «“Би төгс үзэсгэлэнтэй юм” гэж Тир ээ, чи өгүүлэв.

⁴Хил хязгаар чинь тэнгисийн зүрхэнд байна, Чамайг босгогчид үзэсгэлэнг чинь төгс болгов.

⁵Тэд Сенирийн жодоо модоор хамаг банзыг чинь хийж, Тэд чамд шураг хийхээр Ливаны хуш модыг авав.

⁶Башаны царс модоор тэд чамд сэлүүрүүдийг хийж, Киприйн арлуудын нарс модоор хийсэн Тавцанг чинь тэд зааны соёогоор шигтгэсэн.

⁷Дарвуул чинь Египетийн нэхмэл маалингаар хийгдэж, Энэ нь чиний ялгах тэмдэг болов. Сүүдрэвч чинь Елишагийн арлуудаас авчирсан Хөх, нил ягаан өнгийн бөс даавуу байжээ.

⁸Сидон, Арвадын оршин суугчид Чиний сэлүүрчид байв. Тир ээ, мэргэн хүмүүс чинь Онгоцон дотор чиний залуурчид байв.

⁹Гебалын ахмадууд ба мэргэн хүмүүс нь Чамтай хамт эвдрэлийг чинь засаж байв. Тэнгисийн хамаг онгоц, усан цэргүүд нь Худалдаа наймаанд чинь оролцохын тулд чамтай хамт байв.

¹⁰Перс, Луд ба Пут нь Чиний цэрэгт дайчид байв. Тэд чиний дотор бамбай, дуулгыг зүүжээ. Тэд сүр жавхланг чинь нэмэв.

¹¹Арвадын хөвгүүд цэрэгтэй чинь Чиний хэрмэн дээр эргэн тойронд, Гаммадчууд чиний цамхагт байв. Чиний хэрмэн дээр эргэн тойронд Тэд бамбайнуудаа өлгөв. Тэд үзэсгэлэнг чинь төгс болгожээ.

¹²Бүх төрлийн эд баялгаар дүүрэн байсан учраас Таршиш нь чиний худалдан авагч байсан. Тэд барааг чинь мөнгө, төмөр, цагаан тугалга, хар тугалгаар худалдан авч байв.

¹³Иаван, Тубал, Мешех нар чиний худалдаачид байсан. Хүний амь, хүрэл саваар тэд барааг чинь солилцож байв.

¹⁴Бет-тогармагаас ирсэн хүмүүс эд барааны чинь үнэнд морьд, дайны морьд, илжигнүүдийг өгсөн.

¹⁵Деданы[24] хөвгүүд чиний худалдаачид байсан. Эрэг хавийн олон газар чиний зах зээл болж байсан. Тэд зааны яс, хар модыг төлбөр болгон чамд авчирч байв.

¹⁶Барааны чинь элбэг дэлбэгээс болж Едом чиний худалдан авагч байсан. Тэд барааг чинь маргад, нил өнгийн бөс, нэхсэн даавуу, нарийн маалинга, шүр хийгээд бадмаараг чулуугаар худалдан авч байв.

¹⁷Иуда ба Израиль чиний худалдаачид байсан. Тэд чиний барааг Миннитийн буудай, боов, зөгийн бал, тос, гавраар худалдан авч байв.

¹⁸Барааны чинь элбэгээс болж, бүх төрлийн баялаг эрдэнэсийн элбэгээс болж, Хелбоны дарс, цагаан ноосноос болж Дамаск чиний худалдан авагч байжээ.

¹⁹Ведан ба Иаван нь Узалаас чиний барааны үнийг төлж байсан. Барааны чинь дотор ширэм, шанц, амтат чихрийн нишингэ байв.

²⁰Дедан нь эмээлийн тохмоор чамтай худалдаа хийж байв.

²¹Араб ба Кедарын хамаг ноён хурга, хуц, ямаануудыг чинь худалдан авагчид байв.

²²Шеба ба Раамагийн худалдаачид чамтай худалдаа хийж байсан. Тэд барааг чинь бүх төрлийн үнэртний дээдээр, бүх төрлийн эрдэнийн чулуу, алтаар төлж байсан.

²³Харан, Канне, Еден, Шебагийн наймаачид, Ашур, Хилмад нар чамтай худалдаа хийж байв.

²⁴Тэд чамтай тансаг дээл, хөх өнгийн хувцас, нэхмэл бөс, эрээн хивс, чанга гөрсөн олсоор худалдаа хийж байв.

²⁵Таршишийн онгоцнууд нь чиний барааг зөөж байв. Чи дүүрч, далайн зүрхэнд ихэд алдаршив.

²⁶Сэлүүрчид чинь чамайг их усанд хүргэж, Дорнын салхи чамайг далайн дунд цохиж эвдэв.

²⁷Чиний сүйрлийн өдөрт чиний баялаг, ачаа, эд бараа, Далайчид, залуурчид, засварчид, Барааны худалдаачид чинь, Дотор чинь буй бүх дайчин, Дунд чинь буй хамаг чуулгантай хамт Далайн дунд живэх болно.

²⁸Залуурчдын хашхирах дуунд Бэлчээр нутгууд доргих болно.

²⁹Сэлүүрийг баригч бүх далайчин ба тэнгисийн залуурчид Хөлөг онгоцнуудаасаа буух болно. Тэд газар дээр зогсоно.

³⁰Тэд чиний төлөө дуу хоолойгоо өндөрсгөн Гашуунаар уйлах болно. Тэд өөрсдийнхөө толгойд шороо цацан Үнсэн дотор хөлбөрөх болно.

³¹Чиний төлөө тэд халзан болцгоож, таар ороон Чиний төлөө зүрхнээсээ эмгэнэж Гашуудан уйлах болно.

³²Уйлах дуундаа тэд бас Гашуудлын дууг чиний төлөө гарган гашуудан дуулах болно. Хэн Тиртэй адил, хэн түүнтэй адил Тэнгисийн дунд чимээгүй байна вэ?

³³Ачаанууд чинь далайгаас гарахад Олон ард түмнийг чи цатгажээ. Баялаг эрдэнэс, эд барааныхаа элбэг дэлбэгээр Газрын хаадыг чи баяжуулав.

³⁴Одоо чи усны гүнд далайгаар сүйтгэгдэхэд Доторх эд бараа чинь, хамаг чуулган чинь унав.

³⁵Эргийн хамаг оршин суугч Чамайг хараад хиртхийж байна. Хаад нь ихэд айж, Царай нь түгшүүрт автжээ.

³⁶Ард түмнүүдийн дундах худалдаачид Чам уруу исгэрч, чи айдас түгшүүр болж, Хойшид байхгүй болно»” гэв.