Read Ariun Bible 2013 – Ариун Библи 2013 Езекиел 30 Bible Online

Езекиел 30 - Ariun Bible 2013 – Ариун Библи 2013 bible

Езекиел 30

¹ЭЗЭНий үг дахин надад ирж —

²Хүний хүү чи, эш үзүүлж, өгүүл. “Эзэн БУРХАН ингэж айлдаж байна. «Уйл. “Хаа-х, тэр өдрийг!”

³Учир нь тэр өдөр ойрхон, ЭЗЭНий өдөр ч ойрхон байна. Энэ нь үүлтэй өдөр, Үндэстнүүдийн мөхлийн цаг байна.

⁴Египет дээр илд бууж, Етиопт зовлон зүдүүр болно. Египетэд алагдагсад унах үед Баялгийг нь тэд авч одно Сууриуд нь нуран унах болно.

⁵Етиоп, Пут, Луд, бүх Араб, Ливи Гэрээний нутгийн хөвгүүд тэдэнтэй хамт илдэнд унах болно»

⁶ЭЗЭН ингэж айлдаж байна. «Үнэхээр, Египетийг түшиглэгчид унаж, Хүч чадлынх нь бахархал доош унана. Мигдолоос Сиене хүртэл Тэд тэр дунд илдэнд алагдах болно» гэж Эзэн БУРХАН тунхаглаж байна.

⁷«Тэд эзгүйрсэн улсуудын дунд эзгүйрч, Хотууд нь ч сүйтгэгдсэн хотуудын дунд байх болно.

⁸Би Египетэд гал тавьж, Бүх тулгуур нь устгагдах цагт Тэд Намайг ЭЗЭН гэдгийг мэдэх болно.

⁹Амар тайван буй Етиопийг айлгахаар тэр өдөр Надаас элч нар онгоцоор илгээгдэнэ. Египетийн өдрийнх шиг тийм зовлон зүдүүр тэдэн дээр байна. Учир нь харагтун, тэр ирж байна»

¹⁰Эзэн БУРХАН ингэж айлдаж байна. «Би Вавилоны хаан Небухаднезарын гараар Египетийн олон түмнийг үгүй болгоно.

¹¹Үндэстнүүдээс хамгийн харгис нь болох Тэр ба түүний ард олон хамтдаа Тэр газрыг устгахын тулд орж ирэх болно. Тэд Египетийн эсрэг илднүүдээ сугална Тэгээд тэр газрыг алагдагсдаар дүүргэнэ.

¹²Би Нилийн сувгуудыг хатаан Муу хүмүүсийн гарт уг нутгийг худалдана. Би гаднынхны гараар тэр нутгийг Тэндэх хамаг юмыг эзгүйрүүлнэ. ЭЗЭН Би айлдлаа»

¹³Эзэн БУРХАН ингэж айлдаж байна. «Би бас шүтээнүүдийг эвдэж, Мемфисээс хөргүүдийг үгүй болгоно. Египетийн нутагт дахин ноён гарахгүй. Би Египетийн газарт айдсыг өгөх болно.

¹⁴Би Патросыг хоосруулж, Зоанд гал тавьж, Тебест шүүлтийг гүйцэлдүүлнэ.

¹⁵Би Египетийн цайз Синд хилэнгээ асгаж, Тебесийн олон түмнийг таслах болно.

¹⁶Би Египетэд гал тавина. Син нь зовлон зүдүүр дотор тарчлах болно. Тебес эвдэрч, Мемфис нь өдөр бүр гай зовлонтой байх болно.

¹⁷Он ба Пибесетийн залуус илдэнд унаж Эмэгтэйчүүд нь олзлогдох болно.

¹⁸Би Тахпанхест Египетийн буулгыг эвдэх үед Тэнд өдөр нь харанхуй болно. Түүний хүч чадлын бахархал нь дотроо алга болно. Түүнийг үүл бүрхэж, охид нь олзлогдоно.

¹⁹Тийнхүү Би Египетэд шүүлтийг гүйцэлдүүлж, Тэд Намайг ЭЗЭН мөн гэдгийг мэднэ»”

²⁰Арван нэгдүгээр оны нэгдүгээр сард, уг сарын долоонд ЭЗЭНий үг надад ирж —

²¹Хүний хүү! Би Египетийн хаан Фараоны гарыг хугалав. Харагтун, тэр нь эмчлүүлэхээр эс ороогдоно, илдийг авахад хүчтэй болохоор үл боогдоно.

²²Тиймээс Эзэн БУРХАН ингэж айлдаж байна. “Харагтун, Би Египетийн хаан Фараоны эсрэг байгаа бөгөөд түүний эрүүл ба хугарсан гарыг хоёуланг нь хугалж, түүний гараас илдийг нь унагаах болно.

²³Би египетчүүдийг үндэстнүүдийн дунд тарааж, улсуудын дунд хөөх болно.

²⁴Учир нь Би Вавилоны хааны гарыг тэнхрүүлж, гарт нь илдээ өгөх болно. Би Фараоны гарыг хугалах болно. Ингэснээр шархадсан хүн ёолох адил Вавилоны хааны өмнө тэр ёолох болно.

²⁵Тийнхүү Би Вавилоны хааны гарыг хүчтэй болгож, харин Фараоны гар унжина. Би Вавилоны хааны гарт илдээ өгч, тэр түүнийг Египетийн газрын эсрэг чиглүүлэх үед тэд Намайг ЭЗЭН мөн гэдгийг мэдэх болно.

²⁶Би египетчүүдийг үндэстнүүдийн дунд тарааж, тэднийг улсуудын дунд хөөн зайлуулах үед тэд Намайг ЭЗЭН мөн гэдгийг мэдэх болно.”