Read Ariun Bible 2013 – Ариун Библи 2013 Езекиел 32 Bible Online

Езекиел 32 - Ariun Bible 2013 – Ариун Библи 2013 bible

Езекиел 32

¹Арван хоёр дахь оны арван хоёрдугаар сард, уг сарын нэгэнд ЭЗЭНий үг надад ирж —

²Хүний хүү чи, Египетийн хаан Фараоны төлөө гашуудлын дууг дуулан тэдэнд “Чи өөрийгөө үндэстнүүдийн залуу арслантай харьцуулсан. Гэтэл чи далайн мангастай адил юм. Чи урсгалуудаа сөрөн Усыг хөлөөрөө булингартуулж, Голуудыг нь бохиртуулав” гэж хэл.

³Эзэн БУРХАН ингэж айлдаж байна. «Одоо Би олон ард түмний чуулгантай хамт Чиний дээр тороо хаяж, Тэд чамайг тороор минь дээш татах болно.

⁴Би чамайг газарт хаяж, хээр тал уруу хөөнө. Би тэнгэрийн бүх шувууг чам дээр оршоон Бүх газрын араатнуудыг чамаар цатгах болно.

⁵Махыг чинь уулсын дээр тавьж, Хүүрүүдээр чинь хөндийнүүдийг дүүргэх болно.

⁶Би бас уулсад тултал нь чамаас гоожсон цусыг Газарт уулгах болно. Жалганууд ч чамаар дүүрэх болно.

⁷Би чамайг сөнөөх цагт Тэнгэрийг халхалж, оддыг нь бөхөөнө. Би нарыг үүлээр далдлан Сар ч гэрлээ өгөхгүй.

⁸Огторгуйд гэрэлтэгч хамаг гэрлийг Би чам дээр харанхуй болгож, Газарт чинь харанхуйг тогтоох болно» гэж Эзэн БУРХАН тунхаглаж байна.

⁹«Би үндэстнүүдийн дунд, Чиний мэдэхгүй газруудад Сүйрлийг чинь аваачих үедээ Үй олон ард түмний зүрхийг зовоох болно.

¹⁰Би олон ард түмнийг чамаар балмагдуулна. Би илдээ тэдний өмнөөс далайхад Хаад нь ч чамаас болж салгална. Чиний уналтын өдөр хүн бүр амийнхаа төлөө Мөч бүрд тэд айн чичрэх болно»

¹¹Учир нь Эзэн БУРХАН ингэж айлдаж байна. «Вавилоны хааны илд нь чам дээр бууна.

¹²Хүчтэнүүдийн илдээр Би Олон түмнийг чинь унагах болно. Тэд бүгд үндэстнүүдийн харгис хүмүүс нь билээ. Тэд Египетийн бахархлыг сүйтгэж, Түүний хамаг ард олон нь устгагдах болно.

¹³Бүх үхэр сүргийг нь Би бас Их усны дэргэдээс устгах болно. Хүний хөл нь усыг дахин үл булингартуулна.

¹⁴Тэгээд Би усыг нь тогтуун болгож, Голуудыг нь тос мэт урсгах болно» гэж Эзэн БУРХАН тунхаглаж байна.

¹⁵«Би Египетийн нутгийг хоосруулж, дүүрч байсан юмсаасаа тэр газар хоосорч, дээр нь амьдардаг бүхнийг устгах цагт тэд Намайг ЭЗЭН мөн гэдгийг мэдэх болно.

¹⁶Энэ нь гашуудал, тэд үүнийг дуулах ёстой. Үндэстнүүдийн охид үүнийг дуулах ёстой. Египет ба хамаг олон түмнийх нь төлөө тэд үүнийг дуулах ёстой» гэж Эзэн БУРХАН тунхаглаж байна.

¹⁷Арван хоёрдугаар оны тэр сарын арван таванд ЭЗЭНий үг надад ирж —

¹⁸«Хүний хүү! Египетийн олон түмний төлөө гасал. Түүнийг ба хүчирхэг гүрнүүдийн охидыг нүхэнд орогсодтой хамт доод ертөнцөд буулга.

¹⁹“Чи үзэсгэлэнгээрээ хэнээс давуу вэ? Доош явж, хозлуулаагүй хүмүүстэй хамт ороо зас”

²⁰Тэд илдэнд алагдагсдын дунд унах болно. Тэр улс илдэнд тушаагдсан. Тэд түүнийг ба бүх олон түмнийг нь аваад явсан.

²¹Хүчтэнүүдийн дундах хүчтэн нь Үхэгсдийн орны дундаас тэр улс ба туслагчдынх нь тухай “Тэд доош явсан, тэд илдэнд алагдсан хозлуулаагүй хүмүүстэй хамт хөдөлгөөнгүй хэвтэж байна” гэж ярина.

²²Ассири ба түүний хамтрагчид тэнд байна. Булшнууд нь түүний эргэн тойронд байна. Тэд бүгд алагдагсад бөгөөд илдэнд унасан билээ.

²³Булшнууд нь нүхний хамгийн цаад мухарт, хамтрагчид нь булшных нь эргэн тойронд байна. Амьдын газарт айдсыг тараагч тэд бүгд алагдаж, илдэнд унасан байна.

²⁴Елам тэнд, хамаг олон түмэн нь булшных нь эргэн тойронд байна. Тэд бүгд алагдагсад, илдэнд унасан, хозлуулаагүй хүмүүс юм. Тэд газрын хамгийн доод хэсэгт очсон. Амьдын газарт тэд айдсыг төрүүлэгчид юм. Тэд нүхэнд орогсодтой хамт ичгүүрээ үүрсэн.

²⁵Тэд түүнд зориулан бүх олон түмэнтэй нь хамт алагдагсдын дунд ор зассан. Булшнууд нь үүнийг тойрон байна. Тэд бүгд хозлуулаагүй, илдэнд алагдсан. Хэдийгээр тэд амьдын газарт айдсыг төрүүлсэн боловч тэд нүхэнд орогсодтой хамт ичгүүрээ үүрсэн. Тэд алагдагсдын дунд тавигдав.

²⁶Мешех, Тубал болон бүх олон түмэн нь тэнд байгаа. Булшнууд нь тэднийг хүрээлж байна. Тэд бүгд хэдийгээр амьдын газарт айдсыг төрүүлж байсан ч илдэнд алагдсан хозлуулаагүй хүмүүс билээ.

²⁷Толгой доороо илднүүдээ дэрлэж, дайтах зэвсэгтэйгээ Үхэгсдийн орон уруу явсан, хозлуулаагүй унасан хүчтэнүүдийн дэргэд ч тэд хэвтдэггүй. Энэ хүчтэнүүдийн аймшиг нь амьдын газарт байсан хэдий ч хилэнцийнх нь шийтгэл тэдний ясан дээр тавигдсан байна.

²⁸Гэвч хозлуулаагүй хүмүүсийн дунд чи хэмхчүүлж, илдэнд алагдагсадтай хамт хэвтэх болно.

²⁹Тэнд бас Едом, хаад нь бас хамаг ноёд нь байна. Тэд чадал бүрэн авч илдэнд алагдагсадтай хэвтсэн. Тэд хозлуулаагүй хүмүүстэй, нүхэнд орогсодтой хамт хэвтэх болно.

³⁰Тэнд бас умардын тэргүүнүүд бүгдээрээ мөн чадлаас нь гарсан аймшгийг үл хайхарсан, ичгүүр дотор алагдагсадтай хамт доошоо буусан сидончууд бүгд байна. Тийнхүү тэд хозлуулаагүй хүмүүс, илдэнд алагдагсадтай хамт хэвтэж, нүхэнд орогсодтой хамт ичгүүрээ үүрсэн.

³¹Фараон тэдгээрийг хараад, илдэнд алагдсан хамаг олон түмэн буюу Фараон ба бүх цэргийнхээ төлөө тайвшрах болно» гэж Эзэн БУРХАН тунхаглаж байна.

³²«Хэдийгээр Би амьдын газарт түүнээс айх аймшгийг төрүүлсэн ч, Фараон ба хамаг олон түмэн нь хозлуулаагүй хүмүүсийн дунд илдэнд алагдагсадтай хамт хэвтэх болно» гэж Эзэн БУРХАН тунхаглаж байна.