Read Ariun Bible 2013 – Ариун Библи 2013 Езекиел 33 Bible Online

Езекиел 33 - Ariun Bible 2013 – Ариун Библи 2013 bible

Езекиел 33

¹ЭЗЭНий үг надад ирж —

²Хүний хүү чи, ард түмнийхээ хөвгүүдтэй ярьж тэдэнд “Би нэгэн нутагт илд авчрахад, тэр нутгийн ард олон дундаасаа нэг хүнийг сонгож, харуулаа болгох аваас

³нутагт нь илд ирж байхыг тэр хараад бүрээ татаж, ард олныг сэрэмжлүүлэх болой.

⁴Хэн нэгэн нь бүрээн дууг сонссон боловч сэрэмжлүүлгийг эс авахад нь илд ирж түүнийг авч явбал цус нь өөрийнх нь толгой дээр байна.

⁵Тэрээр бүрээн дууг сонссон боловч сэрэмжлүүлгийг эс авав. Түүний цус өөр дээр нь байна. Хэрэв сэрэмжлүүлгийг авсан бол амиа аврах байсан.

⁶Гэвч харуул нь илд ирж буйг хараад бүрээ татахгүй, ард түмнийг сэрэмжлүүлэхгүй байваас илд ирж, тэдний дотроос хэн нэгийг авбал тэр нэгэн хилэнцийнхээ төлөө авагдана. Харин цусыг нь Би харуулын гараас нэхэх болно” гэж хэл.

⁷Хүний хүү! Би чамайг Израилийн гэрт харуул болголоо. Тиймээс чи амнаас минь гарах үгийг сонсоод, Миний өмнөөс тэднийг сэрэмжлүүлнэ.

⁸Би буруут хүнд “Буруут чи заавал үхэх болно” гэж айлдах үед чи тэр буруут хүнд замаасаа эргэхийг сэрэмжлүүлэхгүй аваас тэр буруут хүн хилэнцийнхээ дотор үхэх юм. Харин түүний цусыг Би гараас чинь нэхнэ.

⁹Харин чи буруут хүнд замаасаа эргэхийг сэрэмжлүүлсэн боловч тэр нэгэн замаасаа эргэхгүй байваас хилэнц дотроо тэр үхнэ. Харин чи амиа аварна.

¹⁰Хүний хүү чиний хувьд, Израилийн гэрт өгүүл. “Та нар ярихдаа «Үнэнээр бидний гэмт үйлдэл, бидний нүгэл нь бидэн дээр буй. Бид түүний дотор ялзарч байна. Тэгвэл бид яаж амьд үлдэх вэ?» хэмээв.”

¹¹Тэдэнд өгүүл. “Би амьд!” гэж Эзэн БУРХАН тунхаглаж байна. “Би буруутын үхэлд огтхон ч баярлахгүй. Харин буруут нь замаасаа эргэж, амьд гарахад Би баярлана. Ёрын муу замаасаа буцагтун, буцагтун! Тэгвэл та нар юунд үхэх вэ, Израилийн гэр ээ?”

¹²Хүний хүү чи, нутгийнхандаа “Зөвт хүний зөв нь ч гэм буруугийнх нь өдөрт түүнийг үл аварна. Буруутын гэм буруугийн хувьд, тэрээр гэм буруугаасаа эргэх өдөр түүнээсээ болж бүдрэхгүй. Мөн зөвт хүн ч нүгэл үйлдэх өдрөө зөвт байдлаараа амьд үлдэж үл чадна” гэж хэл.

¹³Би зөвт хүнийг заавал амьд үлдэнэ гэж өөрт нь айлдсан боловч тэрээр зөвт байдалдаа хэт найдсаар гажуудлыг үйлдвээс хамаг зөв үйлс нь дурсагдахгүй. Харин үйлдсэн гажуудлынхаа дотор тэр үхэх болно.

¹⁴Гэвч Би буруу муу хүнд “Чи заавал үхэх болно” гэж айлдахад тэрээр нүглээсээ буцаж, шударга зөвийг үйлдээд,

¹⁵тэрээр барьцаалсан юмыг буцааж, тоносон юмаа нөхөн төлж, гажуудлыг эс үйлдэн амийн зарлигуудыг дагаж явбаас тэр заавал амьд үлдэнэ, тэр үхэхгүй.

¹⁶Түүний үйлдсэн нүглийн нэг нь ч түүний эсрэг дурсахгүй. Тэрээр шударга зөвийг үйлдсэн. Тэр заавал амьд үлдэнэ.

¹⁷Гэсэн ч нутгийнхан чинь “Эзэний зам нь буруу” гэж хэлэх үед өөрсдийнх нь зам буруу байдаг.

¹⁸Зөв хүн ч зөвт байдлаасаа эргэж, гажуудлыг үйлдвээс тэрээр түүн дотроо үхэх болно.

¹⁹Цөвт буруу хүн харин гэм буруугаасаа эргэж шударга зөвийг үйлдвээс тэр түүгээрээ амьд үлдэх болно.

²⁰Гэвч та нар “Эзэний зам нь буруу юм” гэж хэлдэг. Израилийн гэр ээ, Би хүн тусбүрийг чинь замналаар нь шүүх болно хэмээв.

²¹Бидний олзлогдлын арван хоёрдугаар оны аравдугаар сарын таванд Иерусалимаас нэгэн дүрвэгч над дээр ирэн “Хот эзлэгдэв” гэж хэлэв.

²²Тэрхүү дүрвэгчийг ирэхээс өмнө, үдэш ЭЗЭНий мутар миний дээр байсан. Өглөө болж түүнийг над уруу ирэхийн өмнө Тэр миний амыг нээв. Ийнхүү миний ам нээгдээд, би дахин хэлгүй болсонгүй.

²³Дараа нь ЭЗЭНий үг надад ирж, айлдахдаа —

²⁴Хүний хүү! Израилийн газар дахь тэр балгасуудад амьдрагчид нь “Абрахам ганцаараа атал энэ газрыг эзэмшиж байв. Тиймээс бид олон тул энэ газар бидэнд эзэмшил болгогдон өгөгдсөн” хэмээж байна.

²⁵Тиймээс тэдэнд хэл. “Эзэн БУРХАН ингэж айлдаж байна. «Та нар махыг цустай нь идэж, шүтээнүүдэд нүдээ өргөн цус урсгаж байна. Тийм байж та нар энэ газрыг өмчлөх ёстой юу?

²⁶Та нар илдэндээ найдаж, жигшүүрт хэргийг үйлдэн хүн бүр чинь хөршийнхөө эхнэрийг бузарладаг. Тийм байж та нар энэ газрыг өмчлөх ёстой юу?»”

²⁷Чи тэдэнд ингэж хэлэх ёстой. “Эзэн БУРХАН ингэж айлдаж байна. «Би амьд! Балгаснуудад буй хүмүүс нь илдэнд унаж, хээр талд буй хүмүүсийг Би араатнуудад тасчуулахаар өгч, цайз ба агуйд буй хүмүүс нь тахлаар үхэх болно.

²⁸Би тэр газрыг эзгүйрүүлж, балгас болгож, түүний хүч чадлын бардамнал нь үгүй болно. Израилийн уулс нь хоосорч, тийнхүү хэн ч түүгээр үл өнгөрнө.

²⁹Тэдний үйлдсэн хамаг жигшүүрээс болж Би тэр газрыг эзгүйрэл балгас болгох үед тэд Намайг ЭЗЭН мөн гэдгийг мэднэ»”

³⁰«Хүний хүү чиний хувьд, хэрмийн дэргэд, гэрүүдийн үүдэнд чиний тухай ярилцаж, өөр зуураа ах дүүтэйгээ хэлэлцдэг танай нутгийнхан “Одоо ирэгтүн, ЭЗЭНээс ямар үг гарахыг сонс” гэж хэлж байна.

³¹Ард түмэн ирж байгаа мэт тэд чам уруу ирж, Миний ард түмэн адил чиний өмнө сууж, үгийг чинь сонсох боловч тэд түүнийг үйлдэхгүй. Учир нь амаараа тэд таалалт юмсыг үйлдэвч зүрх нь олз ашгийнхаа араас явдаг.

³²Харагтун, чи тэдний хувьд хөгжмийн зэмсгүүдээр сайн тоглодог, сайхан хоолойтой хүний дуулсан тачаангуй дуу мэт юм. Учир нь тэд үгийг чинь сонсдог боловч түүнийг биелүүлдэггүй.

³³Тиймээс тэр нь биелэлээ олоход (заавал биелнэ) өөрсдийнх нь дунд нэгэн эш үзүүлэгч байсныг мэдэх болно.