Read Ariun Bible 2013 – Ариун Библи 2013 Езекиел 4 Bible Online

Езекиел 4 - Ariun Bible 2013 – Ариун Библи 2013 bible

Езекиел 4

¹Одоо хүний хүү чи өөртөө нэг шавар тоосго авч, өөрийнхөө өмнө тавиад, түүн дээр нэгэн хотыг, Иерусалимыг сийлэгтүн.

²Тэгээд түүний эсрэг бүслэлт байгуулж, бүслэх цамхаг барьж, овоолго далан босгон, хуарангуудыг байгуулж, түүнийг тойруулаад хэрэм эвдэгчийг байрлуул.

³Дараа нь төмөр тавгийг авч, түүнийг хот ба өөрийнхөө хооронд төмөр хэрэм мэт босгож, энэ хотыг бүсэлж, түүнийг хүрээлж буйтай адил нүүрээ түүнд чиглүүл. Израилийн гэрт өгөх тэмдэг энэ юм.

⁴Ингээд чи зүүн талаараа хэвтэж, Израилийн гэрийн хилэнцийг тэр тал дээр тавь. Хажуулдан хэвтэх хоногийнхоо тоогоор чи тэдний хилэнцийг үүрнэ.

⁵Учир нь хилэнцийнх нь жилүүдэд дүйцүүлэн гурван зуун ерэн хоногийг Би чамд товлосон. Ийнхүү чи Израилийн гэрийн хилэнцийг үүрэх болой.

⁶Чи үүнийг дуусгаад хоёр дахь удаагаа, баруун талаараа хэвтэж, Иудагийн гэрийн хилэнцийг үүрэгтүн. Би нэг жилийг нэг хоног болгон чамд дөчин хоногийг товлов.

⁷Тэгээд чи Иерусалимын бүслэлт уруу нүүрээ чиглүүлж, нүцгэн гараа сунган түүний эсрэг эш үзүүл.

⁸Одоо харагтун. Би чамайг олсоор хүлэх болно. Ингэснээр чи бүслэлтийн хоногуудыг дуусгах хүртэл нэг талаас нөгөө тийш эргэж чадахгүй болно.

⁹Гэвч чиний хувьд, буудай, арвай, вандуй, зармаг, хар будаа, хөц будааг авч, тэдгээрийг нэгэн саванд хийж, түүгээр өөртөө талх хий. Чи хажуулдан хэвтэх хоногуудын тоогоор, гурван зуун ер хоногийн турш түүнийг идэх ёстой.

¹⁰Идэх хүнс чинь жингээрээ хоногт хорин шекел байх ёстой. Чи үүнийг хэд хэд хуваан идэх ёстой.

¹¹Уух ус чинь хэмжээгээрээ хинийн зургааны нэг байж, чи үүнийг хэд хэд хуваан уух ёстой.

¹²Чи үүнийг арвайн бин мэт болгож, нүднийх нь өмнө хүний баасаар шарж ид гэв.

¹³Тэгээд ЭЗЭН —Ийнхүү Би тэднийг цөлөх үндэстнүүдийн дунд Израилийн хөвгүүд бузар хүнсээ идэх[3] болно гэж айлдав.

¹⁴Дараа нь би —Аяа, Эзэн БУРХАН. Харагтун, сэтгэл минь хэзээ ч бузартаагүй. Би залуу наснаасаа эдүгээ хүртэл үхдэл юмуу сэглүүлж тасчуулсныг хэзээ ч идсэнгүй. Мөн цэвэр бус мах миний аманд ороогүй гэв.

¹⁵Тэгээд Тэр надад —Хар, би чамд хүний баасны оронд үхрийн аргалыг өгье. Чи түүгээр талхаа бэлдэгтүн гэв.

¹⁶Тэгээд Тэр надад —Хүний хүү, харагтун, Би Иерусалимд хүнсний нөөцийг үгүй болгох гэж байна. Тэд талхыг жинлэн зовнилтойгоор идэж, усыг хэмжиж хиртхийлт дор уух болно.

¹⁷Талх, ус хомс болно. Тэд бие биенээ хиртхийн харж хилэнц дотроо турж эцнэ.