Read Ariun Bible 2013 – Ариун Библи 2013 Езекиел 42 Bible Online

Езекиел 42 - Ariun Bible 2013 – Ариун Библи 2013 bible

Езекиел 42

¹Тэгээд тэр хойд зүгийг чиглэн намайг гаднах хашаанд авчирлаа. Тэрээр тусгаарлагдсан талбай мөн барилгын харалдаа орших хойд зүгийг чиглэсэн танхимд намайг дагуулж ирэв.

²Зуун тохой түүний уртынх нь дагуу явахад хойд үүд байлаа. Өргөн нь тавин тохой байв.

³Дотоод хүрээнд хамаарах хорин тохойны эсрэг талд мөн гаднах хашаанд хамаарах засмал замын эсрэг талд гурван давхар дахь хонгилтой харалдаа хонгил байв.

⁴Танхимуудын өмнө арван тохой өргөнтэй, зуун тохой урттай дотоод зам байв. Тэдгээрийн орох үүднүүд нь хойд талд байв.

⁵Байшин дахь доод, дунд давхрын танхимуудаас илүү их зайг хонгилууд эзэлсэн тул дээд давхрын танхимууд илүү бага байв.

⁶Эдгээр нь гурван давхраар орших бөгөөд хашааны баганатай адил ганц ч багана байсангүй. Тиймээс дээд давхрын танхимууд нь доод, дунд давхрынхаас арай бага байв.

⁷Танхим уруу харсан гаднах хашаа тийш чиглэсэн гаднах хэрмийн хувьд, түүний урт нь тавин тохой байв.

⁸Учир нь гаднах хашаанд байсан танхимуудын урт нь тавин тохой байв. Харагтун, сүм уруу харсан танхимуудын урт нь зуун тохой байв.

⁹Эдгээр танхимуудын доод талд нь гаднах хашаанаас тэдэн уруу орох үүд шиг тийм үүд зүүн талд нь байв.

¹⁰Тусгаарлагдсан талбай мөн байшин уруу харсан, зүүн зүгт чиглэсэн хашааны хэрмийн өргөн дотор нь танхимууд байв.

¹¹Өмнөх зам нь хойд талын танхимуудын байдалтай адил, тэдгээрийн урт, өргөний дагуу мөн бүх гарц нь байгууламж ба үүднүүдийн дагуу байв.

¹²Танхимуудын өмнө зүгийг чиглэсэн орох хаалгануудтай адил замын эхэнд үүд байсан ба тэдгээрээр ороход зам нь зүүн зүгт чиглэсэн хэрмийн урд талд байв.

¹³Дараа нь тэр надад —Тусгаарласан талбайн харалдаа буй хойд танхимууд ба өмнөд танхимууд нь ЭЗЭНд ойртох тахилч нарын ариунаас ариун юмсыг идэх ариун танхимууд юм. Тэр газар ариун тул тэнд тэд ариунаас ариун юмс, идээн өргөл, нүглийн тахил, ялын тахил зэргийг тавих болой.

¹⁴Тахилч нар дотогш орвол үйлчлэхдээ өмссөн хувцсаа тэнд нь тайлж орхилгүйгээр ариун газраас гаднах хашаа уруу гарах ёсгүй. Учир нь тэдгээр хувцас нь ариун юм. Тэд өөр хувцас өмсөх ёстой. Дараа нь тэд ард түмэнд ойртож болно гэв.

¹⁵Тэр доторх сүмийг хэмжиж дуусаад намайг зүүн зүгийг харсан дааман хаалганд гадагш авчирч, эргэн тойрныг бүхэлд нь хэмжив.

¹⁶Тэр хэмжих саваагаар зүүн талыг хэмжихэд тэр нь хэмжих саваагаар таван зуун тохой болов.

¹⁷Тэр хойд талыг хэмжихэд тэр нь хэмжих саваагаар таван зуун тохой байв.

¹⁸Өмнө талд тэр хэмжих саваагаар таван зуун тохойг хэмжив.

¹⁹Тэрээр баруун тал уруу эргээд, хэмжих саваагаар таван зуун тохойг хэмжив.

²⁰Тэр түүнийг дөрвөн талд нь хэмжив. Энэ нь ариун ба бузрыг хооронд нь ялгахаар эргэн тойронд хэрэмтэй бөгөөд урт нь таван зуу, өргөн нь таван зуун тохой байв.