Read Ariun Bible 2013 – Ариун Библи 2013 Езекиел 7 Bible Online

Езекиел 7 - Ariun Bible 2013 – Ариун Библи 2013 bible

Езекиел 7

¹ЭЗЭНий үг надад ирж —

²Хүний хүү, Израилийн нутагт Эзэн БУРХАН ингэж айлдаж байна. “Төгсгөл! Газрын дөрвөн буланд эцэс төгсгөл иржээ.

³Эдүгээ төгсгөл чиний дээр бөгөөд Би уураа чиний эсрэг илгээж, чамайг замналын чинь дагуу шүүн хамаг жигшүүрийг чинь чиний дээр буцаан төлж буулгана.

⁴Миний мэлмий чамайг өрөвдөхгүй, Би чамайг өршөөхгүй. Харин Би замналын чинь дагуу буцаан төлөх бөгөөд жигшүүрүүд чинь та нарын дунд байна. Тэгэхэд та нар Намайг ЭЗЭН гэдгийг мэдэх болно.”

⁵Эзэн БУРХАН ингэж айлдаж байна. —Харагтун, гамшгийн араас гамшиг ирж байна!

⁶Төгсгөл иржээ. Төгсгөл ирэв. Чиний эсрэг босов. Харагтун, энэ нь иржээ!

⁷Дэлхийн оршин суугч аа, чиний дээр хувь зохиол чинь иржээ. Цаг нь ирэв. Уулсын дээр баярт уухай бус, үймээн самууны өдөр ойртож байна.

⁸Тун удахгүй Би уураа чам дээр асгаж, хилэнгээ чиний эсрэг гүйцээнэ. Би чамайг замналын чинь дагуу шүүн чиний дээр хамаг жигшүүрийг чинь нөхөн төлнө.

⁹Мэлмий минь өрөвдөхгүй, Би өршөөхгүй. Жигшүүрүүд чинь чиний дунд байсаар байх үед Би замналын чинь дагуу чамд нөхөн төлнө. Тэгэхэд цохигч нь ЭЗЭН Би гэдгийг та нар мэднэ.

¹⁰Харагтун, тэр өдөр! Харагтун, тэр ирж байна! Мөхөл чинь гарч ирлээ. Таяг нахиалж, их зан цэцэглэсэн.

¹¹Хүчирхийлэл нь хорон муугийн таяг болтол өссөн. Тэдний хэн нь ч, хурсан олных нь хэн нь ч, баялаг нь ч, тэдний дундах алдартай юу нь ч алга.

¹²Тэр цаг ирэв. Тэр өдөр хүрээд ирлээ. Худалдан авагч нь бүү баясаг. Худалдагч нь бүү гашуудаг. Учир нь хилэн хамаг олных нь эсрэг байна.

¹³Тэдний аль аль нь амьд байх үед худалдагч нь худалдсан юмаа буцааж авахгүй. Олон түмний тухай үзэгдэл ч цуцлагдахгүй, тэдний хэн нь ч хилэнцээрээ амьдралаа батжуулахгүй.

¹⁴Тэд бүрээ үлээж бүгдийг бэлэн болгосон ч, хэн ч тулалдаанд үл орно. Учир нь хилэн минь бүх олон түмнийх нь эсрэг юм.

¹⁵Илд нь гадна байж, гамшиг, өлсгөлөн нь дотор байна. Хээр байгч нь илдэнд алагдаж мөн хотод байгчдыг нь өлсгөлөн, гамшиг устгах болно.

¹⁶Харин тэднээс амьд үлдэгсэд нь зугтан хөндийн тагтаанууд адил гашуудан бүгдээр ууланд байх бөгөөд хүн бүр хилэнцийнхээ улмаас гашуудна.

¹⁷Хамаг гар суларч, хамаг өвдөг ус мэт болно.

¹⁸Тэд өөрсдийгөө таараар ороон айдас жихүүдэс тэднийг нөмөрнө. Бүх нүүрэн дээр ичгүүр байж, бүх толгой нь халзан болно.

¹⁹Тэд мөнгөө гудамж уруу чулуудаж, алт нь бузар зүйл мэт болно. ЭЗЭНий хилэнгийн өдөр мөнгө, алт нь тэднийг чөлөөлж чадахгүй. Тэд сэтгэлээ ханган цатгаж, гэдэс дотроо ч дүүргэж үл чадна. Учир нь тэдний хилэнц нь бүдрэх чулуу болжээ.

²⁰Тэд хээ чимэглэлээ сайрхал болгож, ой гутам юмсынхаа жигшүүрт хөргийг бүтээв. Тиймээс Би тэдэнд үүнийг бузар юм болгоно.

²¹Би түүнийг харь хүмүүсийн гарт дээрмийн зүйлс болгон өгч, дэлхийн гэм буруутнуудын олз болгон тушааж, тэд түүнийг буртаглана.

²²Бас тэднээс нүүрээ буруулахад тэд нандин газрыг минь буртаглана. Дээрэмчид орж, түүнийг буртаглана.

²³Гинж хий. Учир нь газар нутаг цуст аллагаар дүүрэн, хот нь хүчирхийллээр дүүрэн байна.

²⁴Тиймээс Би үндэстнүүдийн хамгийн мууг нь авчирч, гэрүүдийг нь эзлүүлнэ. Би бас хүчит нэгний бардамналыг зогсоож, ариун газрууд нь бузарлагдана.

²⁵Зовлон ирэхэд тэд амар амгаланг эрэх боловч тэр нь байхгүй.

²⁶Гай гамшиг дээр гай гамшиг ирж, цуурхал нь цуурхлаар нэмэгдэнэ. Тэгээд тэд эш үзүүлэгчээс үзэгдлийг эрэх боловч тахилчаас хууль нь, ахмадуудаас зөвлөгөө нь алдагдана.

²⁷Хаан гашуудаж, ноёд нь айдсыг өмсөж нутгийн ард түмний гар нь чичирнэ. Байгаа байдлынх нь дагуу Би тэдэнтэй харьцаж, шүүлтүүдээр нь Би тэднийг шүүх болно. Тэд Намайг ЭЗЭН гэдгийг мэдэх болно.